Македонија
(Видео) Костовски: 100 милиони евра поддршка од ЕУ, процесот на преговори носи придобивки
Почетокот на преговорите со ЕУ, напредокот во евроинтеграциите, носат конкретни и видливи придобивки за нашата држава, истакна на денешната прес-конференција Мартин Костовски, пратеник на СДСМ.
Според него, Европската комисија даде предлог за макрофинансиска помош до 100 милиони евра за Северна Македонија, односно поддршка за економијата за следните две години.
„Помошта ќе придонесе и за покривање на финансиските потреби на Северна Македонија поддржувајќи ги и фискалната одржливост и структурните реформи, a нејзиното спроведување ќе биде дефинирано заеднички со ЕУ преку меморандум за разбирање. Оваа одлука доаѓа само неколку дена откако ЕУ додели грант од 53 милиони евра за три стратешки енергетски проекти. Претходно минатата година, како поддршка за справување со економската и енергетската криза ЕУ на нашата држава ѝ додели 80 милиони евра“, истакна Костовски.
Со ова, како што рече, уште еднаш се докажува кој стои до нашата држава во тешки времиња и во време на економска и енергетска криза.
Сето ова, оценува тој, е директна придобивка од изгласување на заклучоците за европскиот предлог, што ние како парламентарно мнозинство ги изгласавме минатото лето.
„Таа одлука го отвори патот кон почеток на преговорите и донесе придобивки за македонската економија, за нашите граѓани. Тогаш, при процесот на носење на одлуката, ВМРО-ДПМНЕ и Левицата овде во Собранието, но и надвор од него, ширеа лажни вести, ги подбуцнуваа граѓаните на насилни протести, хистерично лажејќи дека ќе се загрозел македонскиот јазик и идентитет. Денес, македонскиот јазик и идентитет се признаени од целиот свет, а државата, економијата и граѓаните ги чувствуваат придобивките од почетокот на преговорите“, додава Костовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Илинден и Ѓорче Петров денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 09:00 до 13:00 часот, улица Бунарџик. (Општина Илинден)
– во периот од 09-00 до 15-00 часот, дел од корисниците на улиците: Мице Козар и Ѓуро Салај. (Општина Ѓорче Петров)
Македонија
Сончево и релативно топло со мала до умерена облачност
Сончево и релативно топло со мала до умерена облачност. Во утринските часови наместа ќе има зголемена облачност која во текот на денот ќе се намали. Ќе дува слаб ветер од северен правец. Минималната температура ќе биде во интервал од -2 до 3, а максималната ќе достигне од 12 до 17 степени.
Во Скопје, претпладне во делови од котлината ќе има услови за појава на слаба магла. Во текот на денот времето ќе биде сончево со мала до умерена облачност и претежно тивко. Минималната температура ќе се спушти до 1, а максималната ќе достигне до 14 степени.
Времето во наредниот период
Продолжува период на стабилно и релативно топло време. Во текот на ноќите и во утринските часови ќе има појава на магла на одредени места и зголемена облачност која во текот на денот ќе се намалува.
Македонија
Сообраќајот на граничниот премин Евзони (ГП Богородица) се одвива нормално
Сообраќајот на ГП Евзони (ГП Богородица) се одвива нормално, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

