Сите вработени во Министерството за здравство и стручните лица во комисиите знаеле дека Венко Филипче направил криминал во случајот со модуларната болница во Тетово.

Ниедно стручно лице не сакало да се потпише на анексот на Венко Филипче, кој тој го изготвил по пожарот во модуларната болница и по смртта на 14-те лица во Тетово со цел да се спаси од одговорност, рече на прес-конференција Валентин Манасиевски, член на ЦК на ВМРО-ДПМНЕ.

Венко Филипче и СДС, според Манасиевски, ги потцениле вработените во Министерството за здравство, кои одбиле да го потпишат анексот на договорот што го направил Филипче бидејќи во ревизорскиот извештај се констатирани пропусти и противзаконски дејствија.

„Имено, по заминувањето на Филипче од Министерството за здравство, се прави извештај со правно мислење за анексот што Филипче го има потпишано и во него стои дека договорот најитно треба да се раскине, а анексот на Филипче да се прогласи за ништовен со цел да се спречат идни незаконски, правни и фискални импликации.

Лицето што ја обавувало функцијата проектен менаџер не постапило по извештајот на проектната единица и на своја рака продолжувало да комуницира со изведувачот. Истото лице врши притисок да се продолжи реализацијата според основниот договор и да се наплаќа по тие цени, но вработените, свесни дека овој договор е коруптивен и криминален, одбиваат да се потпишат.

По долг период на непостапување, проектниот менаџер не го раскинува договорот и до септември 2022 година не презема ништо – со што го става изведувачот во поволна состојба за поднесување тужба за надомест на штета.

Тогашниот министер Беким Сали бара внатрешен ревизорски извештај, кој е подготвен кон крајот на јануари 2023 година. Тој заминува од Министерството за здравство на почетокот на февруари 2023, а на негово место доаѓа Фатмир Меџити, кој го игнорира извештајот како да не постои.

Министерството, поради тужби за камати, доставува информација до Владата, со која предлага на изведувачот да му се плати спогодбено под услов да се откаже од каматите. Владата носи одлука на 11.7.2023 година, со која се одобрува исплата преку спогодба.

Но, тука е клучниот момент: Никој од проектната единица не сака да ја потпише спогодбата“, нагласува Манасиевски.

Тоа, како што оценува, е затоа што знаат колку е корумпирана и криминална оваа работа, со 20 % провизија, која завршила во нечиј џеб.

Како што додаде Манасиевски, Јавното обвинителство го штити Венко Филипче.

Додаде дека наместо да се отвори постапка против Филипче, целиот овој процес стои во некоја фиока и не се постапува.