Македонија
(Видео) Место на „Дрисла“, „Комунална“ истура отпад на дива депонија среде Скопје
![](https://makfax.com.mk/wp-content/uploads/2019/02/kamionce-Komunalna.jpg)
Мало камионче со ознаки на Јавното претпријатие „Комунална хигиена“, утрово, отпадот, место на „Дрисла“, го истури на дива депонија среде Скопје, во близина на Центарот за азиланти во Шуто Оризари. Екипа на „Макфакс“ го сними камиончето полно со ѓубре како се качува на ридот во близина на Центарот и набргу се симнува празно, без отпад.
Луѓето сместени во Центарот велат дека секојдневно се истура ѓубре на ридот од спротивната страна.
„Има вдлабнатина на ридот, која се полни со ѓубре. Ова овде сè беше покриено со отпад, но го подзачистија кога премиерот Зоран Заев дојде да ги посети бездомниците. Сега дури личи чисто“, велат азилантите кои екипата на „Макфакс“ ги сретна на патот кон дивата депонија.
Ѓубре е расфрлано по целиот земјен пат што води до врвот на ридот каде што се истура ѓубрето. Меѓу градежниот шут на сите страни има и комунален отпад, па целиот простор е претворен во огромна депонија на шест километри од центарот на Скопје.
Од Општина Шуто Оризари се пожалија дека не можe да се справат со камионите што истураат отпад насекаде и велат дека не е првпат камиони на „Комунална хигиена“ да трупаат отпад и да отвораат нови диви депонии во Шуто Оризари. Екипи од Општината од утрово работат на расчистување на дивата депонија од која се шири чад низ Шуто Оризари и Визбегово, а „Комунална“ пред еден месец ја користела како претоварна станица кога ѝ го отстапила просторот на Општината. Камиончето на „Комунална“ се појави во моментот кога се подготвуваше акцијата за чистење, па ја одмина депонијата што ја користела како претоварна станица и ѓубрето го истури на ридот спроти Центарот за азиланти.
Од „Комунална хигиена“ немаат коментар. Најавија дека ќе објаснат кога ќе утврдат дали се работи за нивно возило.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Кривична за Самка Ибраимовски поради закани кон уставен судија преку „Фејсбук“
![](https://makfax.com.mk/wp-content/uploads/2018/10/samka-ibraimovski.png)
Самка Ибраимовски од партијата ПЦЕР и поранешен пратеник доби кривична пријава поради закани кон уставен судија.
Министерството за внатрешни работи објави дека целосно е расчистен случајот, а Ибраимовски преку својот фејсбук профил упатил, како што велат, сериозни закани и повици за насилство кон судија на Уставниот суд.
„Веднаш по добиената пријава, МВР презеде соодветни мерки и беше извршен службен разговор со С.И. во СВР Тетово“, објави МВР.
Против него поднесена е кривична пријава за загрозување на сигурноста.
Ибраимовски негираше дека упатил закани. Тој тврди дека неговите ставови на Фејсбук против Уставниот суд кои дозволи извршителите да продолжат да наплаќаат долгови, се негово демократско право.
„Јас сум поставил само едно прашање – што ако настанат убиства? Сум го пренел гласот на народот, што ми пишуваат мене, во мојот инбокс, каде кажуваат дека: „ќе земам пиштол“ и дека: „ќе отепам некого“ или „јас ќе се отепам“. Тоа е мое едно поставено прашање, кој ќе одговара за настанати убиства ако се случат, не сум се заканувал на судии“, рече Ибраимовски.
Според Ибраимовски, главниот проблем и прашање кое јавноста треба да го постави е како е можно еднаш Уставниот суд да отфрли иницијатива за преиспитување на законитоста и уставноста на измените на Законот за облигациски односи, а потоа истата своја одлука со иста иницијатива повторно да ја преиспитува.
Македонија
Радев: Паднаа маските, власта во Скопје се плаши да препознае „Бугарин“ и „бугарскo“
![](https://makfax.com.mk/wp-content/uploads/2018/04/radev.jpg)
Маските конечно паднаа. Новата власт кај нашиот сосед јасно покажа дека најголемиот страв на политичката класа во оваа држава е да го препознае самото постоење на зборовите „Бугарин“ и „бугарски“ во РСМ. Ова како што пренесуваат бугарските медиумите, пред новинарите го изјавил бугарскиот претседател Румен Радев.
„Сега станува многу јасно зошто во пролетта 2021 година, како претставник на Бугарија во Советот на ЕУ, подолг период го преместив фокусот на европските институции и лидери од заштитата на нашата историја, култура и јазик во заштитата на правата на Бугарите. Стана јасно зошто ја покренав идејата за нивно вклучување во уставот на земјата како важен предуслов за почеток на преговорите за членство и ја бранев оваа кауза до самиот крај“, вели Радев.
„Но денес конечно маските падна кај нашиот сосед и јасно се покажа дека најголемиот страв на политичката класа во оваа земја е да се препознае самото постоење на зборовите „Бугарин“ и „бугарски“ во РСМ. Ова е политика насочена директно против европските принципи и донесени одлуки со консензус на сите земји-членки против меѓународните обврски преземени од РСМ, но особено против сопствените граѓани, кои јасно ги декларираа своите амбиции за европски развој на земјата. Очекувам итни конкретни дејствија и од бугарската влада и од европските институции за почитување на европските принципи и норми во процесот на проширување, за гарантирање на неповратност и одржливост во афирмацијата на принципите на демократијата и главните критериуми во почитувањето на човековите права. Ако ЕУ не се заложи за европската перспектива на Балканот, врз основа на јасни принципи, норми и вредности, тогаш порано или подоцна Балканот ќе ја соочи Европа со балканизација“, рече претседателот Румен Радев, пишуваат медиумите во Бугарија.
Македонија
Филипче: Моја главна грижа ќе биде грешките од минатото никогаш да не се повторат
![](https://makfax.com.mk/wp-content/uploads/2024/06/WhatsApp-Image-2024-06-25-at-20.48.44-1.jpeg)
Венко Филипче, кандидат за претседател на СДСМ, на вчерашните средби со граѓаните во Кисела вода и Штип истакна дека СДСМ мора да учи од грешките, а идниот претседател е должен тие никогаш да не се повторат.
„Историјата е нашиот најголем учител, но само ако избереме да учиме од неа. Иднината на СДСМ ќе остане заложник на минатото ако не направиме суштински промени. Ако бидам избран за претседател, моја главна грижа ќе биде грешките од минатото никогаш да не се повторат“ – истакна Филипче.
Тој рече дека како претседател ќе води со пример и ќе се заложи за обединување на партијата преку взаемно почитување и давање глас на членовите.
„Новото раководство на СДСМ ќе делува суштински различно од сите претходни. Ќе водиме со пример, со многу чувство и емпатија за да осигураме дека секој член се чувствува ценет и слушнат. Сила на обединување ќе бидат другарството, еднаквоста и взаемното почитување. Само така од СДСМ ќе направиме вистинско семејство“ – рече Филипче.