Македонија
(Видео) Милошоски до Ковачевски: Кои се лицата што се разгледувале на Советот за национална безбедност за прогласување персона нон грата

Кои се лицата што беа разгледувани на Советот за национална безбедност за прогласување персона нон грата бидејќи не ги исполнуваат условите од член 11 од Законот за странците, го праша Ковачевски пратеникот од ВМРО-ДПМНЕ, Антонијо Милошоски, на денешната собраниска седница.
Тој посочи дека во ескалацијата на односите со Бугарија, за жал, оштетени се Република Македонија, чувствата на граѓаните, но и европската перспектива на државата.
Второто прашање се однесуваше за повлекување на бугарскиот амбасадор од Македонија за кој, како што рече Милошоски, е чин на спуштање на дипломатските односи меѓу двете држави и го праша Ковачевски кој е неговиот став во однос на овие случувања.
„Повлекување амбасадор од една соседна држава е чин на спуштање на дипломатските односи. Исто така, повлекувањето на амбасадорот претставува на некој начин и потценување на државата домаќин бидејќи се спушта на нивото на комуникација. Прашањето до премиерот е кој е вашиот став и како гледате на овој развој на настаните? Како го оценувате овој потег на повлекување на нивниот амбасадор, при што соседната држава Бугарија тврди дека тоа го прави во знак на незадоволство од односот на институциите во Македонија кон Република Македонија“, изјави Милошоски.
Пратеникот Милошоски го праша министерот за правда, Тупанчески, за кој член на Владата или претставник мислел кога изјавил дека избрзал со давање на изјавата за инцидентот во Охрид.
И третото прашање е до министерот за правда, Тупанчески. Вчера, на една дебатна емисија поврзано со инцидентот во Скопје Вашата изјава беше дека сметате оти некои претставници на власта избрзале со давање изјави дека се работи за завршен случај. Она што можеше да се извлече како заклучок е дека овој Ваш коментар се однесува на изјавите на Вашиот колега, министерот за надворешни работи. Но, јас би сакал, за да не одиме на заклучоци на дадената изјава, да Ве прашам конкретно на кои претставници на власта мислите и дали се работи за членови на Владата, дали мислевте на министерот Бујар Османи или на некој друг дека избрзале при давањето изјави за случајот во Охрид, а за кој Вие сметате дека сè уште не е завршен“, го праша Милошоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.