Во целост ја поддржуваме истрајноста на СОНК и во целост ја разбираме секоја одлука што тие ќе донесат, а е во насока на унапредување на статусот на образовниот кадар. ВМРО-ДПМНЕ ги поддржува легитимните барања на наставниците и просветниот кадар, изјави Марија Митева, портпарол на ВМРО-ДПМНЕ.

„Власта залудно ги користи механизмите на уцени и притисоци, штрајкот на СОНК беше најавуван два месеца пред да се почне. Владата, доколку вистински сакаше да најде решение за барањата на просветниот кадар, тоа можеше да го направи уште пред почетокот на штрајкот. Така немаше да има прекин во образовниот процес и немаше да биде на штета на децата. Доколку Владата навистина сакаше образованието да биде организиран и постојан процес на унапредување, немаше да го претвори во ресор на експерименти. Машинеријата на СДСМ и ДУИ ги активира сите можни ресурси во обид да го прекинат штрајкот. Изјавите на поединци од Владата се во спротивност со законите во Македонија. Имено, Владата треба да биде свесна дека штрајкот е уставно право на работниците. Министерот Шаќири и Владата во овој момент продолжуваат да бидат најголемиот прекршувач на правата на работниците и наместо да упатуваат закани кон наставниот кадар, треба да упатат решение и да ги поддржат нивните барања. Во овој случај не станува збор за барање за зголемување на правата, туку правата на наставниците се тотално прекршени!

И, конечно, наставниот кадар праќа силна порака дека и тие се најзначајниот фактор во општеството“, рече Митева.

Таа нагласи дека наставниците се истрајни и дека обидите на Владата за кршење на штрајкот не успеваат. Митева вели дека доколку власта била сериозна во изјавите дека наставата е приоритет, тогаш итно требало да ги прифатат барањата на наставниците. Состојбата е итна и неодложна, наместо притисоци и закани, покачете ги платите на наставниците и ставете крај на прекинот на наставата, порача Митева.