Македонија
(Видео) Мицевски: Владата секоја година си игра со егзистенцијата и чувствата на пазарџиите

Во текот на вчерашниот ден бевме сведоци на уште еден циркус приреден од страна на Владата. Овој пат тоа беше повлекувањето на Законот за трговија на зелените пазари. Штетноста на овој закон веќе две години ги држи на нозе незадоволните пазарџии, а Владата секоја година си игра со егзистенцијата и чувствата на пазарџиите, вели Никола Мицевски, координатор на пратеничката група на ВМРО-ДПМНЕ.
„Законот за трговија на зелените пазари беше донесен од страна на парламентарното мнозинство во јануари 2018 година по скратена постапка и требаше да се применува од почетокот на 2019 година. Во недостиг на консултации со засегнатите страни, односно пазарџиите, но и со пензионерите, тој наиде на негодувања и протести, со што примената на законот беше одложена за почетокот на 2020 година. Ваквото решение беше исклучиво за умилкување од страна на СДСМ за смирување на пазарџиите што протестираа во пресрет на најавените претседателски избори.
Во меѓувреме, на 8 ноември оваа година пратеничката група на ВМРО-ДПМНЕ поднесе предлог-закон за престанување на важноста на Законот за трговија на зелените пазари и овој закон денес се наоѓа на дневен ред на 123-тата седница на Собранието на Република Македонија. Овој закон го поднесовме бидејќи сакаме најискрено да им помогнеме на пазарџиите, односно да се укине законот, а не да се манипулира со оваа група граѓани во зависност од тоа дали е предизборен период или не, како што тоа го прави Владата предводена од СДСМ и ДУИ.
СДСМ со Законот за трговија на зелените пазари сакаше да им забрани на пензионерите, стечајците и други категории граѓани да не може повеќе да продаваат на зелените пазари во Република Македонија. По повторните реакции на пазарџиите и организаторите на пазари за неприменливоста на вака поставеното законско решение и под притисок на најавениот генерален штрајк на пазарџиите, СДСМ, свесен дека се наоѓа во предизборен период, најавува престанок на важноста на законот посочувајќи ги причините што ВМРО-ДПМНЕ ги говореше уште кога се носеше овој штетен закон.
На овој начин СДСМ уште еднаш покажа дека ниту го интересира да се подобри статусот на пазарџиите ниту сака да им помогнат, туку единствено што го интересира е како да не претрпи штети на предвремените парламентарни избори. Ги повикуваме пратениците од парламентарното мнозинство да го поддржат предлог-законот поднесен од страна на ВМРО-ДПМНЕ за престанок на важноста на Законот за трговија на зелените пазари, кој денес е на дневен ред, а не да чекаат ист ваков закон да биде пратен од страна на Владата, со што ќе докажат дека се борат за интересите на пазарџиите, а не за спроведување на партиските агенди на СДСМ и ДУИ.
Исто така, свесни дека навистина владее хаос во оваа област, бараме да се спроведат длабински анализи, консултации со засегнатите страна и да се направи едно квалитетно и издржливо законско решение, кое нема да има штетни последици за пазарџиите, туку решение што ќе стави ред и стандарди што ѝ прилегаат на една земја која се стреми да биде дел од европското семејство.
Искрено, не веруваме дека СДСМ има капацитет да направи еден ваков квалитетен закон, но среќни сме што оваа сага и циркусот што ги приредува Владата на СДСМ нема да трае уште долго и дека по 12 април, времето на штетни закони ќе заврши“, рече Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: ДУИ не враќа назад, Левица руши и безмилосно ја цицаат и самата партија, а Филипче мисли на Дубаи

Претседателот на ВМРО-ДПМНЕ, Христијан Мицкоски, на денешниот митинг во општина Јегуновце, во рамки на изборната кампања за локалните избори 2025 година со слоган „Вистинскиот избор! Твојот човек! Твоето место! За твојата иднина!“, имаше свое обраќање и зборуваше за опозициските партии и нивните претседатели, кои како што вели тој, водат црна кампања и функционираат како непринципиелна коалиција. Мицкоски потсети на тоа што правеше Левица, кога рушеше се што е на народот, и каква кампања водат Али Ахмети и ДУИ, од кои СДСМ зборува за дом, а имаа 7 години да зборуваат и направат нешто за тоа, додека ДУИ ја враќа кампањата со децении наназад, што не соодветствува со светските стандарди.
„Кога сме кај политичките пораки, мојата политичка порака е за да нема дилема. На овие локални избори, бираме помеѓу две концептуално спротивставени опции. Едната е онаа тивка коалиција, која што ја сочинуваат три политички партии, тоа е СДСМ, ДУИ, и политичката партија Левица. Тоа се трите политички партии коишто ја сочинуваат онаа концептуално различна понуда од нашата, која што ја предводи ВМРО-ДПМНЕ и коалицијата. Тие се тие две практично концепти. Тие се тие две спротивставени страни коишто ќе се соочат на овие избори“, рече Мицкоски.
Мицкоски зборуваше за коалицијата Ахмети, Филипче, Апасиев, и истакна дека нивната заедничка поврзаност е гневот кон ВМРО-ДПМНЕ.
„Оваа непринципиелна коалиција, составена од овие три чинители. Венко Филипче, Али Ахмети и Димче Апасиев се здружила, жедна и гладна за власт, моќ, привилегии. Но исто така, најважната работа којашто нив ги поврзува, е големиот гнев кон ВМРО-ДПМНЕ. Тоа е точката која што овие три политички партии ги поврзува. Гневот кон ВМРО-ДПМНЕ“, кажа Мицкоски.
Мицкоски се осврна на сите политички партии потсетувајќи прво што правеше Левица како дел од Шарените кои рушеа се што е создадено со народни пари, дека земаа пари од СЈО кое имаше за цел да го руши ВМРО-ДПМНЕ, а денес безмилосно ја цицаат самата партија.
„Сетете се 2015-2016 што правеа тие низ Македонија. Фарбаа, уништуваа, палеа државен ваш имот направен, со ваши народни пари, за да по насилен пат симнат една влада која што имаше легитимитет од народот. Тоа беше врхушката на денешната политичка партија Левица. Дел од нив станаа составен дел од СЈО, кое што имаше една задача пред себе, а тоа беше да врши тортура и политички прогон врз членовите и активистите на ВМРО-ДПМНЕ. Тоа беше единствената задача кое што ова СЈО ја имаше пред себе. До ден денеска кога гледаме како ја цицаат сопствената партија Левица “.
Мицкоски се осврна и на кампањата на ДУИ и Филипче.
„Венко Филипче излезе пред граѓаните со слоган „Се бориме за нашиот дом“ . Прашањето е за кој дом? За хациендите во Дубаи, за хациендите на Халкидики, за јахтите на Халкидики, за фирмите во Петрич. За што се борат? Имаа тие можност да се борат за својот дом 7 години. ДУИ и Али Ахмети, цела кампања ја водат враќајќи не наназад цели децении, 30-40 години, потсетувајќи не за некакви средби со генерали, или не знам што. Во кампања во која што треба да зборуваме за иднина, во кампања во која што светот зборува за вештачка интелигенција, кога светот зборува за големиот зелен договор, кога светот зборува за освојување на космосот“, заклучи Мицкоски.
Македонија
Костадиноски: Продолжуваме да работиме со уште позасилено темпо за модерно Јегуновце со инвестиции во паркови, во спортот и во младите

Димитар Костадиноски, кандидат за градоначалник за општина Јегуновце од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, ги истакна сите реализирани проекти за неговиот четиригодишен мандат во општина Јегуновце.
Костадиноски истакна дека во општина Јегуновце е регулирано речното корито на реката Вардар, отворени се две нови градинки, асфалтирани улици, и нови тротоари.
„Во изминатиот период го регулиравме речното корито на река Вардар, обезбедивме вода за пиење, изградивме фекални канализации во неколку населени места, отворивме две детски градинки, асфалтиравме локални улици, изградивме тротоари, им дадовме нов живот на училиштата, на парковите, но најмногу од се ја вративме надежта“, истакна Костадиноски.
Во новата програма Костадиноски потенцираше дел од важните проекти и тоа изградба на нови фекални канализации, нови улици, тротоари и земјоделски патишта за земјоделците, како и изградба на современи паркови.
„Во новата програма планираме да изградиме нови фекални канализации во останатите населени места, нови локални улици, тротоари и земјоделски патишта за нашите највредни земјоделци. Изградба на современи паркови опремени во сите стандарди, ќе продолжиме со инвестиции во образованието, културата и спортот, набавка на нови возила за собирање на комунален смет, противпожарно возило кое е потребно за сите жители на општина Јегуновце“, рече Костадиноски.
Македонија
Стојаноска: Вистинскиот избор на овие локални избори е бројот 9

Дафина Стојаноска, член на Извршниот комитет на ВМРО-ДПМНЕ на митинг во Јегуновце во рамки на кампањата за локалните избори која е под слоганот „Вистинскиот избор! Твојот човек! Твоето место! За твојата иднина!“ се осврна на работата на Димитар Костадиновски, кандидат за општина Јегуновце.
„Диме е неуморен, не се плаши од критика, од проблеми, напротив запознаен е со се и знае што може, а што не може и кажува зошто не може. Во Јегуновце нема неасфалтирана улица, нема дете што чека за упис во градинка“, рече Стојаноска.
Според Стојаноска Јегуновце може да стане привлечно место за сите посетители, за вкусна храна, центар за спортски настани.
„Диме добро знае што значи поддршка од централната власт. Тоа го виде во овие 15 месеци откако Влада е на ВМРО-ДПМНЕ, а поддршката за него и ќе продолжи во следниот период“, кажа Стојаноска.
Стојаноска упати пораки и до актуелниот и идниот градоначалник Костадиновски и до личностите кои се на советничката листа на ВМРО-ДПМНЕ за Советот во општина Јегуновце.
„Продолжи со исто темпо и продолжи ја својата приказна. Општината е доказ дека може да се успее, иста е и пораката и до советниците. Ние во ВМРО-ДПМНЕ успеавме поради истрајноста, упорноста, вербата и јасна визија за иднината. Советници следете ја јасната визија на градоначалникот сегашен и иден и јасната визија на претседателот Христијан Мицкоски“, заклучи Стојаноска.
Стојаноска повика и укажа дека вистинскиот избор на овие локални избори е бројот 9.