Македонија
(Видео) Мицевски: Владата секоја година си игра со егзистенцијата и чувствата на пазарџиите
Во текот на вчерашниот ден бевме сведоци на уште еден циркус приреден од страна на Владата. Овој пат тоа беше повлекувањето на Законот за трговија на зелените пазари. Штетноста на овој закон веќе две години ги држи на нозе незадоволните пазарџии, а Владата секоја година си игра со егзистенцијата и чувствата на пазарџиите, вели Никола Мицевски, координатор на пратеничката група на ВМРО-ДПМНЕ.
„Законот за трговија на зелените пазари беше донесен од страна на парламентарното мнозинство во јануари 2018 година по скратена постапка и требаше да се применува од почетокот на 2019 година. Во недостиг на консултации со засегнатите страни, односно пазарџиите, но и со пензионерите, тој наиде на негодувања и протести, со што примената на законот беше одложена за почетокот на 2020 година. Ваквото решение беше исклучиво за умилкување од страна на СДСМ за смирување на пазарџиите што протестираа во пресрет на најавените претседателски избори.
Во меѓувреме, на 8 ноември оваа година пратеничката група на ВМРО-ДПМНЕ поднесе предлог-закон за престанување на важноста на Законот за трговија на зелените пазари и овој закон денес се наоѓа на дневен ред на 123-тата седница на Собранието на Република Македонија. Овој закон го поднесовме бидејќи сакаме најискрено да им помогнеме на пазарџиите, односно да се укине законот, а не да се манипулира со оваа група граѓани во зависност од тоа дали е предизборен период или не, како што тоа го прави Владата предводена од СДСМ и ДУИ.
СДСМ со Законот за трговија на зелените пазари сакаше да им забрани на пензионерите, стечајците и други категории граѓани да не може повеќе да продаваат на зелените пазари во Република Македонија. По повторните реакции на пазарџиите и организаторите на пазари за неприменливоста на вака поставеното законско решение и под притисок на најавениот генерален штрајк на пазарџиите, СДСМ, свесен дека се наоѓа во предизборен период, најавува престанок на важноста на законот посочувајќи ги причините што ВМРО-ДПМНЕ ги говореше уште кога се носеше овој штетен закон.
На овој начин СДСМ уште еднаш покажа дека ниту го интересира да се подобри статусот на пазарџиите ниту сака да им помогнат, туку единствено што го интересира е како да не претрпи штети на предвремените парламентарни избори. Ги повикуваме пратениците од парламентарното мнозинство да го поддржат предлог-законот поднесен од страна на ВМРО-ДПМНЕ за престанок на важноста на Законот за трговија на зелените пазари, кој денес е на дневен ред, а не да чекаат ист ваков закон да биде пратен од страна на Владата, со што ќе докажат дека се борат за интересите на пазарџиите, а не за спроведување на партиските агенди на СДСМ и ДУИ.
Исто така, свесни дека навистина владее хаос во оваа област, бараме да се спроведат длабински анализи, консултации со засегнатите страна и да се направи едно квалитетно и издржливо законско решение, кое нема да има штетни последици за пазарџиите, туку решение што ќе стави ред и стандарди што ѝ прилегаат на една земја која се стреми да биде дел од европското семејство.
Искрено, не веруваме дека СДСМ има капацитет да направи еден ваков квалитетен закон, но среќни сме што оваа сага и циркусот што ги приредува Владата на СДСМ нема да трае уште долго и дека по 12 април, времето на штетни закони ќе заврши“, рече Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Општина Центар: Се отстрануваат паднатите дрвја кај училиштето „Киро Глигоров“
Општина Центар информира дека во моментов екипите на ЈП „Паркинзи на Општина Центар“ и ЈП „Паркови и зеленило“ работат на отстранување на двете паднати дрвја во близина на ООУ „Киро Глигоров“.

Улицата е непроодна за возила додека не завршат активностите, а се очекува дрвјата да бидат целосно отстранети во рок од еден час.




Македонија
Нови летови со „Виз ер“: Бари, Стокхолм, Мадрид и Ларнака од аеродромот во Скопје, Базел од Охрид
Новите пет авионски линии на „Виз ер“ – Бари, Стокхолм, Мадрид, Ларнака и Базел почнуваат од Меѓународниот Аеродром Скопје и од Аеродромот Св. Апостол Павле Охрид, денеска, 27 октомври и утре, 28 октомври, соопштуваат од ТАВ Македонија.
„Многу сум среќен што денеска, на почетокот на зимската сезона, пет нови авиолинии почнуваат од двата аеродроми, во Скопје и Охрид. Секако со поддршка на Владата и благодарение на посветеноста на ‘Виз ер’. Сигурен сум дека овие 5 дестинации дефинитивно ќе бидат посетени и сакам да додадам уште нешто, многу важно, дека овие нови дестинации кои ги најавувам, се избор на патниците, избор на оние патувачи кои што со нетрпение очекуваат да бидат повзрзани со овие градови од двата аеродроми, од овде во Македонија“, изјави Неџат Курт, Генерален директор на ТАВ Македонија.
Новата линија Скопје – Стокхолм започна утрово со првиот лет во 6:05 часот. Овој пат „Виз ер“ лета до главниот аеродром во Стокхолм – Арланда. Првиот лет на линијата Скопјe – Бари ќе започне со полетување на „Виз“ ер до овој град на италијанскиот брег денеска во 14:40 часот. Oд аеродромот во Охрид, првиот лет за Базел полетува денеска во 12 часот.
Утре, на 28 октомври, ќе започне и новата линија Скопје – Мадрид, со првиот лет во 16:05 часот. Враќањето на линијата Скопјe – Ларнака ќе започне со лет што пристигнува од Ларнака до Скопјe утре во 7:15 часот.
Летовите кои што започнуваат денеска, 27 октомври, од Скопје до Стокхолм и Бари, како и од Охрид до Базел, ќе се одвиваат два пати неделно – секој понеделник и петок.
Летовите кои што започнуваат утре, 28 октомври, од Скопје до Мадрид, ќе се реализираат секој вторник, петок и сабота, а од Скопје до Ларнака – вторник и сабота.
Како што соопштуваат од TАВ Македонија, тие очекуваат голем обем на патнички сообраќај на сите пет нови линии на „Виз ер“, имајќи го предвид фактот дека сите овие градови се атрактивни туристички дестинации, кои беа барани од патниците.
Од петте нови линии што започнуваат денескa и утре, Мадрид и Бари се целосно нови дестинации за македонскиот пазар, односно главниот град на Македонија за првпат ќе биде поврзан со шпанската престолнина и со италијанскиот крајбрежен град.
Ларнака и Базел се повторно воспоставени линии, додека Скопје – Стокхолм е нова авионска линија, бидејќи „Виз ер“ отсега ќе лета кон главниот аеродром во шведската метропола – Арланда.
Македонија
Герасимовски: Во Центар одлучуваат граѓаните, во вторник заедно го креираме буџетот за наредната година
Градоначалникот на Општина Центар Горан Герасимовски ги повикува сите жители на општината да учествуваат на првиот буџетски форум за 2026 година, кој ќе се одржи во вторник, 28 октомври, во ООУ „Киро Глигоров“ со почеток во 19.30 часот.
Овој форум претставува можност граѓаните активно да учествуваат во креирањето на општинскиот буџет, да даваат предлози и иницијативи со што ќе придонесат за подобар и поквалитетен живот во општината.
„Заедно со граѓаните, во изминатите четири години реализиравме голем број успешни и квалитетни проекти, а така ќе биде и во наредните четири години. Ги поканувам граѓаните со своите предлози, идеи и размислувања да се вклучат во дефинирањето на приоритетите што ќе придонесат за развој на локалната самоуправа,“ порача Герасимовски.

На буџетскиот форумот ќе учествуваат раководителите од општинската администрација, претставниците на месните и урбани заедници, претставници на невладиниот сектор, и сите жители што сакаат да учествуваат во планирање на општинскиот буџет.
Општина Центар останува посветена на процесот на вклучување на граѓаните во донесување на клучните одлуки, со цел да се обезбеди транспарентност и отчестност, но и за да се задоволат реалните потреби на заедницата.
„Ги поканувам сите центарци да присуствуваат на форумот. Гласот на граѓаните е важен, секоја иницијатива е добредојдена, бидејќи сите заедно сме одговорни за животот во нашата општина,“ додаде Герасимовски.

