Македонија
(Видео) Мицкоски: ВМРО-ДПМНЕ и СНС имаат одлична соработка, тоа се две партии кои работат за своите земји
 
																								
												
												
											„Успехот на една заедница се мери во тоа колку таа заедница е обединета и колку е вклучена во општествените текови во една држава. Тоа е рецептот како да се здобие почит, како да се даде придонес и како да се избориш за себе и за своите луѓе. Македонците во Србија се заедница која низ годините и децениите со својата вредна работа и со својата лојалност и посветеност изградила доверба и заслужено уважување во Србија. Тие се нашиот најдобар мост за соработка помеѓу народите и двете држави“, рече Христијан Мицкоски, претседател на ВМРО-ДПМНЕ.
„Денес имав можност да видам Македонци тука во Србија, да поразговарам со нив и да заклучам дека тие како и Србите во Македонија се чесни и вредни луѓе, домаќини кои придонесуваат за земјата во која живеат, но и за земјата која е нивна татковина.
Љубовта кон својот народ и кон својата земја е голема, и треба да биде сила која човекот го мотивира да направи нешто кое ќе значи негов личен успех, но и успех на заедницата на која и припаѓа.
Македонија во иднина ја гледам како земја пријател, но и партнер со Србија кои ќе се борат кој повеќе ќе направи за благосостојбата на своите граѓани, бидејќи само таква здрава компетенција и натпревар може да придонесат за општото добро на регионот.
Македонците во Србија се нераскинлив дел од овдешните општествени текови и како што можам да слушнам се исклучително почитувани, што мене многу ме радува. Ме радува секој успех на Македонците било каде на светот, но посебно би ме радувало да го видам тоа и во Македонија. Македонците умеат да ги препознаат политиките кои водат кон успех и тие политики да ги поддржат. Морам да истакнам и да потенцирам дека имаме како ВМРО-ДПМНЕ одлична сестринска соработка со политичката партија СНС.
Тоа се двете партии кои се борат за своите земји. Кога ќе ги прашаш Србите, тие ќе ти речат дека Македонците се вреден и питом народ кој придонесува и тоа ме прави посебно горд“, кажа претседателот на ВМРО-ДПМНЕ.
„Верувам дека Македонците тука во Србија секогаш даваат поддршка на напредокот, на проектите и делата затоа што така прават вистински избор за себе и за своите деца, но и за земјата во која живеат. Тие дела лесно може да се проверат и да се измерат, било да се работи за инфраструктура, патишта, болници, детски градинки или да се работи за економски резултати како привлекување на инвестиции, нови фабрики и работни места.
Резултатите секогаш се гледаат и излегуваат на виделина. Некој ќе се обидува да ги покрива со маглата на дезинформациите но секој човек најдобро може да почувствува по себе и по својот живот што е добро, а што не. Не би сакал да правам паралели, но само сакам да потсетам, дека кај нас во Македонија пред 6 години јавноста беше залажувана со розови лаги за подобар живот, од луѓе кои никогаш ништо не сработиле и не направиле. Тие лаги сега распукаа како меур од сапуница и затоа Македонија се доведе во ситуација да биде на дното по сите економски параметри во регионот. Кога демагозите ќе стивнат, останува само горкото чувство дека ништо не сработиле.
Ние тоа го искусивме и верувајте не е воопшто полезно. Веруваме само во работата и резултатите од таа работа.
Ги повикувам Македонците да се вклучат активно во политичкиот живот тука во Србија. Да бидат гласни и да одбираат мудро за својата и за иднината на своите деца. Политичкиот активизам и учество е своевидна обврска за секој човек и за секоја заедница, за да не дозволи друг да ги прави изборите наместо нив.
Да бидеме сами креатори на својата судбина. Ќе повторам, ако Македонците се перцепирани како домаќини и вредни луѓе, логично е да изберат политичари кои наликуваат на нивниот карактер, да изберат домаќини кои градат и кои создаваат“, изјави Христијан Мицкоски, претседател на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
Со потпишување на „Декларацијата Скопје“ заврши Светскиот енергетски форум
 
														Со потпишување на „Декларацијата Скопје“ заврши 14. Светски форум за одржлива енергија (IFESD-14), што во изминатите три дена го претвори Скопје во глобален центар на енергетскиот дијалог, идеи и визии за иднината. Претставниците на Обединетите нации и петте регионални економски комисии ја оценија организацијата како „беспрекорна“, а Македонија и Скопје како „вистински домаќини на светската енергетска сцена“.
Форумот обедини повеќе од 500 учесници од над 70 земји, со над 150 говорници кои преку 35 тематски сесии и панели донесоа идеи, решенија и конкретни чекори за иднината на глобалната енергетска транзиција. Потписниците на декларацијата се согласија дека патот напред бара регионална поврзаност, паметни инвестиции, дигитална трансформација и инклузивна енергетска транзиција што никого не остава зад себе.
Божиновска: „Од Скопје тргнува нов импулс на енергетска соработка, солидарност и визија“
Во завршното обраќање, министерката за енергетика, рударство и минерални суровини, Сања Божиновска, нагласи дека форумот претставува пресвртна точка за регионот:
„Во изминатите три дена, Скопје беше глобалната сцена на енергетската визија и дијалогот за одржлив развој. Она што го видовме овде беше движење на знаење, соработка и амбиција. Форум кој покажа дека кога институциите, науката, бизнисот и меѓународните партнери ќе седнат на иста маса – настанува промена.“
Божиновска истакна дека „Декларацијата Скопје“ е силна порака дека регионот не е само следбеник на глобалната транзиција, туку нејзин активен двигател:
„Горда сум што токму од Скопје, од срцето на Балканот, тргнува нов импулс на енергетска соработка, солидарност и визија. Ова е доказ дека Македонија може да биде платформа на идеи што го менуваат регионот. 14. Меѓународен форум за енергија и одржлив развој ќе остане запаметен како место каде што не само што зборувавме за иднината – туку ја започнавме. Да продолжиме заедно да ја градиме енергетската иднина што ја заслужуваат нашите граѓани“
Таа им се заблагодари на Обединетите нации, УНДП, партнерите и сите учесници за поддршката, додавајќи дека овој форум ќе остане запаметен како место „каде што не само што зборувавме за иднината – туку ја започнавме.“
Армен Григорјан: „Скопје покажа што значи глобална солидарност на дело“
Постојаниот претставник на Програмата за развој на Обединетите нации во земјава (УНДП), Армен Григорјан, изјави дека патот кон одржлива, сигурна и достапна енергија е јасен, но бара заедништво и визија:
„Потребна е политичка волја, глобална солидарност и посветеност. Во УНДП сме задоволни што заедно со Владата и Министерството за енергетика рударство и минерални суровини како и со регионалните комисии на ОН, работиме на дизајнирање политики, решенија за намалување на емисиите, инклузивност и подобрување на квалитетот на воздухот. Инвестираме во луѓето и во иновациите, со цел да испорачаме мерливи резултати кои граѓаните ќе ги почувствуваат дома, на работа и насекаде“, додаде Григорјан.
Дарио Лигути UNECE: „‘Декларацијата Скопје’ е сигнал на регионална амбиција и визија“
Дарио Лигути, директор на Енергетската дивизија на UNECE, изјави дека документот потпишан во Скопје ќе остане важна референтна точка во глобалните енергетски процеси:
„Декларацијата Скопје’ претставува силен сигнал за регионална и глобална соработка и амбиција. Таа ја потврдува нашата заедничка заложба за забрзување на праведната и инклузивна енергетска транзиција – транзиција што носи вистински напредок за луѓето, планетата и просперитетот.“
Заклучоците: паметни технологии, фер транзиција и зелени инвестиции
Во завршницата на документот се наведува дека потписниците ќе работат на:
· интегрирани и инклузивни енергетски политики,
· модернизација на електромрежите и дигитализација,
· вложувања во обновливи извори и фер транзиција,
· промовирање на зелено финансирање и родова рамноправност во енергетиката.
„Заедно можеме да го трансформираме глобалниот енергетски систем кој ќе обезбеди заштита на климатскиот систем, поттикнување на одржливи решенија и достапност до енергија и просперитет за сите,“ се наведува во завршниот дел на декларацијата.
14-тиот Меѓународен форум за енергија за одржлив развој (IFESD-14) се одржа во организација на Министерството за енергетика, рударство и минерални суровини на Република Северна Македонија, Програмата за развој на Обединетите нации (УНДП) и петте регионални економски комисии на ОН – ECA, UNECE, ECLAC, ESCAP и ESCWA.
„Декларацијата Скопје претставува силен сигнал за регионална и глобална соработка и амбиција. Таа ја потврдува нашата заедничка заложба за забрзување на праведната и инклузивна енергетска транзиција – транзиција што носи вистински напредок за луѓето, планетата и просперитетот.“
Заедно можеме да го трансформираме глобалниот енергетски систем кој ќе обезбеди заштита на климатскиот систем, преку поттикнување нови, одржливи решенија, иновации, со крајна цел да обезбедиме достапност до енергија и просперитет за сите.“ вели Декларацијата Скопје во својата завршница.
14-тиот Меѓународен форум за енергија за одржлив развој (IFESD-14) се одржа во организација на Министерството за енергетика, рударство и минерални суровини на Република Северна Македонија, Програмата за развој на Обединетите нации – УНДП и петте Регионални економски комисии на Обединетите нации ((ECA, UNECE, ECLAC, ESCAP и ESCWA).
Македонија
Mицкоски: Скопје добива градоначалник кој ќе работи неуморно, вреден борец, човечен, личност со која ќе се гордееме сите
 
														Скопје добива градоначалник кој ќе работи неуморно, вреден борец, посветен, човечен, личност која ќе направи да се гордееме сите, но и кој е свесен дека резултатите и испорачаните проекти се обврска, исто како и довербата, и дека погледите во него по изборите се вперени со двоен диоптер и многу цилиндри и ќе му се прати секој чекор и ќе се очекуваат брзи дејствија и резултати од него. Драги скопјани, токму овој човек, вашиот човек за главниот град, Орце Ѓорѓиевски, е доказ дека можат да се направат промени кога некој работи со срце, рече претседателот на ВМРО-ДПМНЕ, Христијан Мицкоски на денешниот народен митинг во Скопје во рамки на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски посочи дека Ѓорѓиевски е човек што не ветува без да е сигурен дека може да исполни, и кој испорачува за граѓаните.
„И кога гледам што Орце направил за Кисела Вода, знам дека истиот дух, истата енергија и иста совесност ќе ја донесе во Скопје. И Скопје ќе влезе во една нова фаза на предвидливост и извршување на обврските. Орце е сериозен, приземен, прилично методичен карактер. Тој ќе го направи Скопје повторно да живее слободно и да дише слободно. Град каде што јавниот превоз нема да е изговор и да се прекршува врз суети и изговори, туку систем каде што пешачките премини значат безбедност, а не се руски рулет, каде што отпадот е ресурс, а не срам и загаденост“, рече Мицкоски.
Додаде дека Скопје бара управување, не експеримент и за Орце, Скопје е мрежа на животи и сега му треба вашиот јасен мандат за Скопје да стане град на ред, чистота, култура, лесно движење, рамно развиени општини и чесна локална економија.
Мицкоски исто така ги повика граѓаните да гласаат и за Сотир Лукровски во Карпош, за Дејан Митевски во Аеродром, за Ерџан Демири во Шуто Оризари, како и за Зоран Бајовски кој е во натпревар за прв човек за блиската општина до Скопје, Чучер Сандево.
„Ова е вистински избор. Затоа што е избор за секој ден, не само за изборен ден. Ова е избор за твој човек, човек што работи и кога нема камери. Ова е твоето место, град во кој не си гостин. Ова е за твојата иднина, да останат и децата, и соништата“, истакна Мицкоски.
Македонија
Мицкоски: Имаме историска шанса Кичево да биде симбол на соживот, а не на поделби
 
														Христијан Мицкоски, претседател на ВМРО-ДПМНЕ, на денешниот митинг од пред платото на Филхармонија, се осврна и на Кичево, и кандидатот за градоначалник од редовите на ВМРО-ДПМНЕ. Според него, Кичево се наоѓа пред историска можност да избере градоначалник кој ќе ја промовира инклузивноста и соживотот меѓу сите. Мицкоски рече дека овој избор не е прашање на етничка припадност, туку на вредности и посветеност на сите жители на Кичево со цел градот да стане симбол на единство, прогрес и историска победа за сите.
,,Дваесет години таму немало градоначалник што ја носи нашата програма, нашите вредности, немало човек кој гледа за сите, туку гледал само самиот за себе си. Дваесет години градот беше под управување, кое често ги делеше луѓето по вера, народност или партија“, вели Мицкоски.
Мицкоски повика на единство меѓу сите заедници во Кичево, апелирајќи до Македонците, Албанците, Турците, Власите, Ромите, Србите и Бошњаците.
,,Вечерва испраќам од овде од Скопје порака до сите кичевчани и Македонци, и Албанци, и Турци, и Власи, и Роми, Срби, Бошњаци. Излезете во недела и гласајте за човекот што ќе биде градоначалник на сите! Да се обединиме околу идејата дека Кичево може да биде симбол на соживот, а не на поделби. Да ја направиме историјата вистина, првпат по две децении, Кичево да има градоначалник кој не прашува „чиј си“, туку „што можеме да направиме заедно“, додаде Мицкоски.
Тој истакна дека оваа победа ќе биде заедничка за сите граѓани на Кичево и дека Владата ќе го поддржува Кичево во напорите да го подобри животот на сите жители, и додаде дека оваа промена не е прашање на етничка припадност, туку на човечка посветеност.
,,Тоа ќе е заедничка историска победа на сите граѓани на Кичево, а ние како Влада ќе го помагаме Кичево максимално, во свои напори да го подобри животот на сите негови граѓани. И тука нема етничка приказна, туку сосема човечка димензија. Ова не е повик за етничко гласање туку за гласање за човек, за човек Македонец со сопруга Албанка, кои се пример за вредности и сила, човек кој ќе работи за сите, за своите кичевчани, ќе биде градоначалник буквално за сите и за Македонците, и за Албанците, ќе ги помага и ќе биде коректен, и за Турците, Ромите, Власите, Бошњаците. Со сите кои таму живеат без разлика на партија, етникум и верска определба. Тој е човек и ќе работи за Кичево“, посочи Мицкоски.


 
									 
																	 
									 
																	 
									 
																	 
									 
																	 
									 
																	 
									 
																	 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											