Македонија
(Видео) Ејуп Алими не дојде на судење, бил на службен пат во Тирана

Судењето за предметот „Титаник 3“ денеска се одложи поради тоа што координаторот на пратеничката група на ДУИ, Ејуп Алими, кој е обвинет дека уништувал изборен материјал, не дојде на судењето. Во судницата беше присутен само обвинетиот Исмет Гури.
Адвокатот на Алими, Мефаиљ Арслани, рече дека тој бил на службено патување во Албанија и му достави на судот образложение за службено отсуство. Адвокатот рече дека неговиот клиент дознал дека треба да замине во Албанија еден-два дена пред патувањето. Обвинителката од СЈО, Фатиме Фетаи, побара адвокатот да објасни дали поканата од судот била лично до Алими или до група и која била целта на патувањето и дали тоа било неодложно или можело да почека. Адвокатот Арслани рече дека патувањето било потпишано од генералната секретарка на Собранието, Цветанка Иванова.
Фетаи бараше адвокатот да објасни дали не можел некој да го замени Алими денеска во судницата. Адвокатот рече дека не можел да потврди дали поканата е упатена кон него лично или кон пратеничките групи. Тој рече дека на средбата на групата „Жан Моне“ во Тирана биле поканети сите координатори на пратеничките групи и дека состанокот бил од техничка природа.
Следното рочиште е закажано за 27 април. Судот ќе побара на претседателот на Собранието, Талат Џафери, да му се испрати известување во кои термини има закажано рочишта за предметот „Титаник 3“ и доколку Алими не може да присуствува само поради неодложни активности, да го известат судот.
Алими и Гури се првите функционери на ДУИ обвинети во предмет на СЈО. За нив ова обвинителство бараше и притвор, но наместо таа мерка, судот им ги одзеде пасошите. Обвинителката Фатиме Фетаи на јавна седница во Апелациониот суд изјави дека сведоци на специјалното обвинителство стравувале од пратеникот на ДУИ, Ејуп Алими. Сведоците објаснувале дека Алими е многу моќен човек и е дел од ДУИ, која е на власт. Алими посочи дека и да го затворат во друга земја, ќе избега за да се врати во Македонија и да биде присутен за постапката што се води против него.
Исмет Гури беше помилуван од претседателот Иванов токму за овој случај. Тој е заменик-управник на регионалната дирекција на УЈП во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во МНР формиран кризен штаб достапен 24 часа за македонските државјани од Израел и Иран

Согласно влошената безбедносна состојба на Блискиот Исток, Министерството за надворешни работи и надворешна трговија апелира до сите државјани на Македонија кои се наоѓаат на територијата на Израел и Иран, доколку им е потребна конзуларна помош, веднаш да стапат во контакт со надлежните институции преку дежурните (СОС) телефонски броеви.
Воедно, како што стои во соопштението на Министерството, се апелира до сите државјани да се воздржат од патувања кон земјите од овој регион, сè до подобрување на безбедносната состојба.
За помош и асистенција, граѓаните можат да се обратат на следните контакти: Амбасада на Република Северна Македонија во Тел Авив – Тел: +972 54 500 8566 / +972 54 967 0546 Е-пошта: [email protected].
Понатаму, Министерство за надворешни работи и надворешна трговија Тел: +389 75 273 732 / +389 75 268 736, Е-пошта: [email protected].
Оттаму додаваат дека во рамки на Министерството е формиран кризен штаб кој континуирано ја следи состојбата и е достапен 24 часа дневно за сите потреби поврзани со помош, поддршка и асистенција.
-На крај, уште еднаш ги повикуваме нашите државјани кои се наоѓаат во погодените региони, доколку им е потребна конзуларна помош, без одложување да се обратат на наведените СОС контакти, стои во соопштението на МНРиНТ.
Македонија
ВМРО-ДПМНЕ вели дека економијата се стабилизира од пустошот и хаосот кој го остави СДСМ

Економијата се стабилизира од пустошот и хаосот кој го остави СДСМ после 7 години катастрофално менаџирање, лоши економски политики и отсуство на мерки и проекти, велат од ВМРО-ДПМНЕ.
„После 7 години откако СДС ја уништи економијата и го срози стандардот на граѓаните, од голем минус стопанството и трговијата во индустријата се стабилизираа. Индикаторите за првиот месец од вториот квартал се високи, што покажува дека состојбата е стабилизирана во рамките на нула. Имаме раст на трговијата во индустријата од 6%, раст на преработувачката индустрија од 6,6%. Раст на прометот со трговијата во индустријата на меѓународниот пазар, каде имаме многу повеќе раст од домашниот. Прометот во трговијата во индустријата надвор е околу 7,5 – 7,6 проценти. За краток период Владата предводена од ВМРО ДПМНЕ исто така успеа да ги стабилизира буџетските приходи, и енормно да ја зголеми довербата на инвеститорите. Владата работи посветено со домаќински скроен буџет, се зголемија платите во клучни сектори како здравство, образование, полиција, се работи на конкретни мерки и проекти за намалување на невработеноста со цел подобар и поквалитетен живот на граѓаните“, се вели во соопштението на ВМРО-ДПМНЕ.
Македонија
Денес протест пред МВР поради одложеното рочиште за убиството на кучето Феликс

Денеска пред Министерството за внатрешни работи во 12 часот ќе се одржи протест поради одложеното рочиште за убиството на кучето Феликс.
Протестот го организира граѓанската иницијатива „Зелен хуман град“ заедно со активистички здруженија и групи за заштита на животните од држава.
-На 15 јуни во 12 часот ве повикуваме на мирен, но гласен и масовен протестен марш што ќе започне пред Министерството за внатрешни работи! Кога едно убиство — најтежок облик на кривично дело — останува неказнето, тоа е тешка повреда на правниот и на моралниот поредок во целото општество. Кога убиец останува на слобода се губи доверба во институциите (полиција, обвинителство, судство), се праќа порака дека животот нема вредност, се поттикнува култура на страв и молчење, наместо правда и одговорност, а насилството се нормализира! Кога нема казна, има повторување! Правдата не е избор, туку обврска на секое демократско и хумано општество! Феликс — симбол на добрината, верноста и кроткоста — беше брутално убиен. Феликс не беше само уште едно бездомно куче, не беше само уште една несреќна жртва! Неговото убиство не смее да помине неказнето! Правдата не дискриминира по вид. Живот е живот! Судот мора да изрече затворска казна ако сакаме и најмал зрак на надеж дека слични дела нема да се повторуваат во иднина!, велат од здруженијата.
Здруженијата бараат итно расчистување на случајот и максимална затворска казна за сторителот Љубе Крстевски како и за неговиот соучесник Бранко Билбиловски, воведување минимум од една година задолжителна затворска казна за кривичното дело убиство и мачење животни од Кривичниот законик, формирање локални (општински служби за заштита на животните), донесување закон за Комунална полиција (со полиција за животни), превентивни мерки за редуцирање на насилството врз животните и системска едукација.