Македонија
(Видео) Панова: Судскиот совет да ги почитува законите, Иван Џолев не смее да биде избран за в.д. на Основниот кривичен суд

ВМРО-ДПМНЕ повикува членовите на Судскиот совет да ги почитуваат Уставот и интересот на граѓаните на Република Македонија, а не како што велат од таму, политичките притисоци, кога денес ќе одлучуваат за именување вршител на должноста претседател на Основниот кривичен суд Скопје 1.
Постојат сознанија, истакна на денешната прес-конференција пратеничката Ели Панова, дека власта во заминување врши притисок за денеска, како што рече, Советот да донесе политичка, а не одлука во согласност со законот, и со кршење на законот и Уставот досегашниот претседател Иван Џолев да биде назначен за вршител на должноста претседател на судот, само заради исполнување политички агенди на власта во заминување.
„ВМРО-ДПМНЕ во име на граѓаните на Република Македонија бара членовите на Судскиот совет денеска да не подлегнат под притисоците и да не донесат политичка одлука со која за в.д. на Основниот кривичен суд би го избрале судијата Иван Џолев. Напротив, очекуваме членовите на Судскиот совет, телото за контрола на судската власт, да ги почитува Уставот и законите и според нив да го изберат најдобро оценуваниот судија“, истакна Панова.
Според Панова, во Законот за судовите е предвидено дека „во случај на разрешување или престанок на мандатот на претседателот на судот (како во овој случај), до избор на нов претседател на судот, Судскиот совет од редот на судиите во судот определува вршител на должноста претседател на судот, кој во последната година е оценет со највисока позитивна оцена и во однос на другите судии има добиено најголем број бодови“.
„Изборот на Иван Џолев за в.д. претседател ќе биде директно кршење на законите и Уставот, што би го нарушило угледот на Судскиот совет и дополнително ќе ја поткопа довербата во независноста при носење на одлуките, што впрочем е и во фокусот на интересирањето на ЕУ. Веруваме дека членовите на Судскиот совет добро се запознаени за интересот и фокусот на Европската Унија и на другите стратешки партнери на Македонија кон имплементацијата на стратегиите и методологиите донесени од Судскиот совет, пред сѐ, за методологијата за квалитативно оценување на судиите, методологијата за утврдување сложеност на предмети, стратегијата за човечки ресурси, како и за акцискиот план за борба против корупцијата“, нагласи Панова.
Од тука, како што напомена, работењето на Судскиот совет и носењето одлуки во согласност со законот и Уставот имаат подалекосежни влијанија од оние на, како што ги нарече, кусогледите политичари во заминување.
Панова апелира членовите на Судскиот совет да ги почитуваат законите и Уставот и за в.д. претседател на суд, да го назначат најдобриот оценуван судија, оценуван токму од страна на Судскиот совет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Посебен режим на сообраќај денеска и утре во Скопје

СВР Скопје ги известува граѓаните дека денеска и утре поради одржување на средба на лидерите од Западен Балкан, Единицата за безбедност на патниот сообраќај при СВР Скопје ќе преземе мерки за посебен режим на сообраќајот по сообраќајниците на поширокото централно подрачје на град Скопје.
СВР Скопје апелира до сите учесници во сообраќајот да ги почитуваат наредбите кои ќе ги даваат униформираните полициски службеници.
Македонија
Сончево со мала до умерена облачност, максималната температура до 37 степени

Времето денеска ќе биде сончево со мала до умерена локална облачност. Ќе дува слаб до умерен, а наместа повремено засилен ветер од северен правец. Минималната температура ќе биде во интервал од 12 до 21, а максималната ќе достигне од 29 до 37 степени.
Во Скопје, сончево со мала до умерена облачност. Ќе дува умерен, повремено засилен северен ветер. Минималната температура ќе се спушти до 20, а максималната ќе достигне до 37 степени.
Времето во наредните денови
Во текот на оваа седмица времето ќе биде сончево и топло со мала до умерена облачност. Дневната температура ќе биде во постепен пораст.
Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.