Македонија
(Видео) Пензионерите се прогласија за столб на Македонија и побараа минималната пензија да е 18.000 денари, зголемувањето да е за 3.500 денари

Барање за минималната пензија да биде 18.000 денари, линеарно зголемување на пензиите за 3.500 денари, зголемување на надоместоците. Ова се барањата на пензионерите кои протестираа пред Министерството за труд и социјална политика.
Тие бараа да излезе министерката Јована Тренчевска за да ги чуе што сакаат да добијат. Ѝ порачаа и да не се плаши. Потоа, доставија документ до архивата, а на бина, јавно, прочитаа што целат за да добијат.
„Врз основа на укажаната потреба за помош на пензионерите бараме: Владата да го почитува Законот за усогласување објавен од ДЗС, плус да даде линеарно зголемување од 3.500 денари на основицата на пензијата и одредување на минимална пензија од 18.000 денари. Сојузот на здруженија на пензионери веднаш да се укине бидејќи не ги застапува интересите на пензионерите. Да се укине членарината, нашата членарина, која ја плаќаме по 30 денари и за солидарен погреб 150 денари, значи ни земаат 180 денари. Ако нѐ поддржува Фондот за пензионери, ќе го префрлиме кај нив. Затоа нека бидат солидарни со нас и нека ги задоволат нашите барања“, рече пензионерка од Прилеп.
Себеси, се преставија како столб на Македонија.
„Нека бидат солидарни со нас, нека ги задоволат нашите барања. Ние со нашата голема бројка сме столбот на Македонија. Сојузот на здруженија на пензионери треба да го испочитува и да одвои од здруженијата и да се врати во Фондот за пензиско и инвалидско осигурување. Зголемување на надоместокот за туѓа нега и мобилност, мора да се удвои. Луѓето се неподвижни и зависни од други. Зголемување на надоместокот за социјална помош, за лица кои останаа без работа се до остварување на правото на пензија. Поведување на иницијатива за промена на Законот за пензиско и инвалидско осигурување“, додаде пензионерката посочувајќи дека барањата се од иницијативниот одбор.
Драган Угриновски oд иницијативниот одбор, до министерката Тренчевска порача дека е избрана да работи во интерес на граѓаните.
„Пензионерите не се дојдени од што им е добро, туку бидејќи им е лошо. Министерке вие сте избрани да работите во интерес на граѓаните, а не само за лични интереси. На вас не ви е лошо со зголемувањето на платата од 78 проценти. Овие пензионери кои се дојдени гладуваат. Пензионерот треба да има достоен живот. Работел и придонесувал за државата, а сега кога сме во пензија уште малку ни преостанува во овој свет заслужуваме достоинствен живот“, рече тој.
Пензионерите денешниот протест го почнаа пред Сојузот на здружението на пензионери од каде што побараа оставка од раководство.
Пред камерите се пожалија дека со ниските пензии тешко е да се живее, примањата не стигнуваат ни за сметки, но нема да отстапат од нивните барања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.