Македонија
(Видео) Петковиќ: За извршителите и судиите што не ги бришат застарените долгови чаре се кривични пријави
Кривична пријава за злоупотреба на службената положба и овластувањето против извршителите и судиите што не носат одлуки за бришење на долговите постари од 10 години или, пак, не ги намалуваат каматите на долговите, кои не треба да го надминат износот на основниот долг, советува Зоран Петковиќ-Бакли, професор по кривично право, криминологија, корупција и организиран криминал на Факултетот за безбедност во Скопје при Универзитетот „Климент Охридски“.
Тој е дециден дека сите службени лица треба без одлагање да постапуваат по измените на Законот за облигационите односи и Законот за извршувањето од минатата година, кои се во корист на граѓаните. Нагласува дека за непримена на законот или кршење на законот треба да се одговара кривично.
„Уставот, член 51 став 2, кажува општо за сите – секој е должен да го применува законот. Нема исклучок за никого. За непримена на законот или кршење на законот треба да се одговара кривично. Друго чаре нема. Има разрешување, меѓутоа нивните комори и комисиите што ги имаат за дисциплински, за одземање лиценца, како и министерот – не функционираат. Единствено чаре е да ангажираат адвокат или да се здружат со здруженија што се борат за првата и против извршителите, да поднесат кривични пријави пред надлежниот обвинител“, вели професорот Петковиќ.
За да им помогне на граѓаните, тој подготвил урнек кривична пријава, која им ја дал на здруженијата што се борат против извршителите. Целиот случај со извршителите, судиите и непримената на законот, кој ги заштитува граѓаните, вели дека ќе го стокми во предавање за студентите како случај на организиран криминал.
„Овој проблем со извршителите, а и со правниот систем, со правосудството, датира од поодамна, почнувајќи од 1995 година, кога немаше извршители. Правниот систем почна да се растура и да не се применуваат и тие законски прописи што ги имаме. Конкретно за извршителите, односно непримената на Законот за измената и дополнувањето на Законот за облигационите односи, кој стапи во сила на 20.7.2023 година, и неодамна Уставниот суд ги одби 11-те иницијативи за поништување и укажа дека овој закон е уставен. Имаше сознанија дека вакви законски прописи има во судовите во Европа – Франција, Норвешка, Холандија, не е некоја новина, но тргнувајќи од тоа што со години знаеме кои се извршителите, како наплаќаа од еден денар до 1.000 евра, ова, за мене, е организиран криминал. Набргу на студентите, на кои им предавам пракса кривично право, организиран криминал и корупција, им го спремам како практичен предмет во една информација, едно предавање. Овој предмет е од можеби најголемите за организиран криминал и корупција, и тоа поширока корупција и криминал бидејќи, како што знаат граѓаните, и судот има два става. Има неколку примери во кои еден судија во едниот предмет го применува законот, во друг предмет со ист основ не го применува, носи обратна одлука“, вели професорот Петковиќ.
По усвојувањето на измените на законите во корист на граѓаните минатата година во јули, извршителите бараа толкување од Собранието, не ги применуваа оправдувајќи се дека чекаат упатства од Комората на извршителите и од министерот за правда, а продолжија да ги одлагаат одлуките и откако пред два месеца Уставниот суд ги отфрли 11-те иницијативи за поништување на измените.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЕСМ назначи тројца нови директори на подружниците за парно греење
АД ЕСМ објави дека назначи нови тројца директори на филијалите, односно фирмите-ќерки, што претставуваат системи за топловодно загревање.
Според одлуката на Управниот одбор, Марјан Милошевски, дипломиран машински инженер, е именуван за директор на подружница Енергетика.
Али Исмаиљ, дипломиран инженер по компјутерски науки, ќе раководи со ЕСМ Снабдување со топлина.
Александар Мирчевски, електроинженер, е поставен за директор на ЕСМ Топлификација Битола.
Македонија
Министерот Мисајловски на состанок на Северноатлатнскиот совет на НАТО, на ниво на министри за одбрана
Министерот за одбрана Владо Мисајловски од денеска учествува на дводневениот состанок на Северноатлантскиот совет на НАТО, на ниво на министри за одбрана, во Брисел.
Ова е прв состанок на НАТО на високо ниво по Самитот во Вашингтон и воедно прв состанок што го води новиот генерален секретар Марк Руте.
На одделните сесии, главни теми за дискусија се: одвраќањето и одбраната на Алијансата, поддршката за Украина, и зајакнувањето на соработката со земјите од Индо-пацификот.
Целта на состанокот е преглед на имплементацијата на одлуките од Самитот во Вашингтон во насока на зајакнување на капацитетите на Алијансата за одговор на растечките закани и предизвици.
Денеска беше оддржан и Состанок на земјите членки на Глобалната коалиција за борба против ИСИС, во организација на САД, со која претседаваше секретарот за одбрана Лојд Остин. Од страна на Министерот Мисајловски беше потенцирано дека справувањето со тероризмот останува од суштинско значење за колективната одбрана, во рамките на која македонската Влада ќе продолжи да соработува со своите сојузници.
На сесијата со глобалните партнери, покрај висок претставник на Европската Унија, за прв пат се поканети и министрите за одбрана на Австралија, Јапонија, Нов Зеланд и Република Кореја, на која се разговараше за тековните предизвици и неделивоста на глобалната безбедност.
Посебна сесија е посветена на јакнењето на соработката со Украина и јакнењето на глобалните партнерства. Во присуство на претседателот Володимир Зеленски и министерот за одбрана Рустем Умеров, ќе се разговара за новата НАТО Команда за координација на помош и обука за Украина, финансиската поддршка и за другите иницијативи што ќе овомзможат долгорочна помош.
На маргините на состаноците, министерот Мисајловски оствари одделни билатерални состаноци со своите колеги од Албанија, Норвешка и Словенија, и се заложи за понатамошно зајакнување на билатералната соработка во областа на одбраната.
Македонија
МАНУ: Во Македонија постои само една национална академија
Претседателството на МАНУ укажува дека Академијата никогаш не се занимавала и нема да се занимава со дневнополитички расправи и партиски дискусии, кои ја оптоваруваат редовната дејност на Академијата, односно со работи кои спаѓаат во доменот на Законодавниот дом и на државните институции, се наведува во соопштението од МАНУ во однос на најавите од некои политички партии за основање на академија на етничките Албанци во Македонија.
– Напоменуваме дека во Македонија, како и во земјите во регионот и во светот, постои само една национална академија која ја претставува државата во европската и во други меѓународни асоцијации на академии. Постојат примери во државите во регионот и пошироко за формирање на т.н. струкови академии во рамките на соодветни стручни здруженија (Академија за архитектура, Академија за медицински науки и др.), како и други научно-уметнички друштва во поголемите градови и во регионалните центри, но нема примери за формирање на паралелни национални академии, се подвлекува во соопштението од Претседателство на МАНУ.
„МАНУ секогаш била отворена за сите граѓани кои ги исполнуваат високите научни и уметнички критериуми за членство во неа, независно од етничката, верската и од каква било друга припадност. За политичките партии и нивните влијанија никогаш немало место во неа. Од нејзиното основање до денес, членови во Академијата биле припадници на македонскиот народ, но исто така и на сите етнички заедници. Меѓу другото, во последните петнаесетина години, во составот на МАНУ членуваа четири члена со албанска етничка припадност (од коишто, во трите последователни раководства, еден од нив ја извршуваше функцијата научен секретар, а двајца беа потпретседатели на Академијата, од кои еден и со мандат во актуелното раководство на Академијата), како и четири члена надвор од работниот состав“, посочуваат оттаму.
МАНУ, се наведува во соопштението, претставува најзначајна национална научна и уметничка институција од посебен општествен интерес во нашата држава, формирана во 1967 година, во согласност со највисоките универзални научни и уметнички стандарди и критериуми. Таа, повеќе децении наназад, со својата научно-истражувачка дејност, преку своето творештво и со советодавната улога, претставува столб во градењето и во зачувувањето на идентитетот и на државноста на македонскиот народ и на деловите од другите народи кои живеат во земјата.