Образованието во Македонија изминатиов период беше предмет на нецелосни, недосмислени, избрзани одлуки. Ваквото неодговорно работење од страна на поранешната министерка Царовска сега е веќе видливо и можеме да го потврдиме со големиот пад што Универзитетот „Св. Кирил и Методиј“ го има на Шангајската листа, изјави денеска Марија Пејоска, член на УМС на ВМРО-ДПМНЕ.

Најголемиот универзитет во Македонија во моментот, како што појасни Пејоска, се наоѓа на 1.944. место. А според критериумите за истражувачка работа, УКИМ се наоѓа на 1.869. место. Рангот што е определен со соодветен систем е поразувачки податок за македонското општество, додаде таа.

„Македонското образование и наука се во континуирана стагнација, а причините за овој пад се од системски карактер. Но, и резултат на недоволната ангажираност на институциите. Унијата на младите сили на ВМРО-ДПМНЕ преку секојдневна комуникација со студентите, младите научни соработници и истражувачи јасно ги има детектирано причините за овој пад“, истакна Пејоска.

„Ги повикуваме надлежните институции секогаш кога ќе треба да одлучат за нов чекор во образованието и науката, проблемите да ги согледуваат низ стручна призма. И со тоа да се напушти принципот на носење одлуки со цел да се заработат ситни политички поени. Во македонското општество функционираат голем број стручни и компетентни луѓе, кои со својот капацитет и преку соодветни настани може и сакаат да помогнат образованието и науката да се подобрат“, нагласи Пејоска.