Само позитивни критики имаше од членовите на Советот за јавните обвинители за новиот шеф на Обвинителството за гонење организиран криминал и корупција, Ислам Абази.

На седницата, на која тој е назначен и официјално на функцијата, сите кажаа по некој збор, освен Јасна Жежова. Главно, членовите се осврнаа како се подобрила состојбата во гостиварското Обвинителство откако тој станал шеф на Вишото обвинителство – Гостивар.

Иџет Мемети е единствениот што даде коментар и за тоа дека избраниот е Албанец.

„Надминати се етничките бариери. Двајцата кандидати од разни етнички заедници добиле најмногу гласови…“, рече Меџити.

Коле Штерјев посочи дека во време на Абази куп предмети биле решени, а претходно седеле во фиоките. Тој смета дека тоа е благодарение на менаџирањето на сега новиот шеф на ОЈО ГОКК. Љубомир Јовески, по Штерјев, рече дека гостиварското Обвинителство имало солидни резултати.

Претседателот на Советот на јавните обвинители, Анотнио Јолевски, беше прашан дали секогаш имале вакви пофалби за Абази какви што јавноста слушна денеска. Новинарите се интересираа како денеска се зборува сè најдобро за новиот шеф на ОЈО ГОКК, а пред една недела ниту биографијата не му ја знаеја.

„Јас сум тука во овие две години. Извештајот беше позитивно оценет на гостиварското Обвинителство дека беше постигнат напредок да се решат нерешените предмети. И дека откако дошол овој обвинител, состојбата е подобра. Знам дека се позитивно оценувани. Позитивно се оценувани и на други обвинителства, ако веќе земеме дека сите обвинителства се позитивно оценети, нормално дека ќе се истакнуваат одредени негативности. Не можеме да речеме дека сè е розово и во гостиварското. Нема обвинителство каде што сè е розово. И да сакаат, не може да имаат ажурност поради бројот на обвинители и обемот на работа“, изјави Јолевски.

Ислам Абази беше избран со 66 гласа преку непосредно гласање на обвинителите.