Македонија
(Видео) По години трупање смет, се чисти депонијата на патот кон Езерани

По години трупање смет, утрово, ученици од Преспа и механизација од ЈКП „Пролетер“ почнаа да го чистат ѓубрето од депонијата на патот кон Езерани во близина на Преспанското Езеро во акција со мото „Преспа? Разбуди се за чиста средина“, организирана од Институтот за комуникациски студии.
Околу Преспа досега се мапирани над 30 диви депонии, кои веќе се ставени на листа за чистење.
Градоначалникот на Ресен, Јован Тозиевски, најави дека заедно со чистењето на депониите на домаќинствата бесплатно ќе им поделат канти за селектирање на отпадот, а ќе работат и на подигање на свеста кај населението за фрлањето ѓубре.
„Влегуваме во чистење 30 вакви локации, но и на подигање на јавната свест за селектирање на отпадот, компостирање и сл. Да ги замолам граѓаните да престанат да фрлаат ѓубре, депонијата бесплатно може да ја користат“, рече градоначалникот Тозиевски.
Со проектот организиран од Институтот за почеток ќе бидат исчистени осум диви депонии.
Од Институтот велат дека целта им е да иницираат промени.
„Истражувањата покажуваат дека главните извори на загадување се ниската еколошка свест, недоволната опременост и неефикасното собирање на отпадот. Со оваа кампања сакаме да иницираме промена во секојдневните навики на граѓаните и да ги мотивираме да станат дел од решението“, нагласи Дејан Андонов од ИКС.
Ист е и ставот на ЈКП „Пролетер“, од каде што неодамна со европски пари го засилиле возниот парк.
„Преку партнерство со граѓаните ќе настојуваме да дојдеме до трајно решение за отпадот. Досега ситуацијата ни беше лоша со опременоста со возила, но преку проектот ‘ЕУ за Преспа’ добивме камиони за собирање смет и ќе почнеме да го собираме онаму каде што до сега не се собираше“, рече директорот ЈКП „Пролетер“, Марчел Русу.
Акцијата за чистење е поддржана од „Екогерила Преспа“, од каде што сметаат дека главен проблем за трупањето отпад на недозволени места е ниската свест кај жителите.
Градоначалникот Тозивски рече дека ќе настојуваат со облагодарување на локациите, кои се претворени во депонии, ќе настојуваат да им укажат на жителите дека тоа не се места за фрлање ѓубре оти за казнување немаат капацитет со тројцата инспектори што ги имаат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.