Македонија
(Видео) Спасовски и Лаанеметс од Талин: Заедно да ја направиме Европа побезбедна за нашите граѓани
Денеска, министерот за внатрешни работи Оливер Спасовски предводи делегација од МВР во работна посета на Талин, Естонија, каде што оствари билатерална средба со својот естонски колега, министерот за внатрешни работи на Естонија, Лаури Лаанеметс.
Истакнувајќи годинава Република Северна Македонија одбележа 28 години од започнувањето на дипломатски односи со Република Естонија, Спасовски на средбата ги оцени политичките односи меѓу двете земји како пријателски, со интерес за унапредување на соработката.
„Република Естонија, како поддржувач на политиките на отворени врати во НАТО и проширувањето на Европската Унија, во многу наврати ја потврди поддршката за Република Северна Македонија во евроинтегративните процеси, на 12 јуни 2019 година, естонското Собрание го ратификуваше Протоколот за пристапување на Република Северна Македонија во НАТО, додека истиот беше одобрен од Претседателот на Република Естонија на 17 јуни 2019 година за што искрено и во оваа прилика ви се заблагодаруваме за безрезервната поддршка. Соработката помеѓу двете министерствата за внатрешни работи е на високо професионално ниво но без посебни специфичност, за што ценам дека е неопходно формализирање на полициската соработка”, рече министерот Спасовски. Притоа, тој го предаде изготвениот предлог текст на Договорот меѓу Владата на Република Северна Македонија и Владата на Република Естонија за соработка во борбата против криминалот.
Спасовски појасни дека текстот на Договорот е во фаза на собирање на мислења од надворешни институции по што ќе следи владина постапка за усогласување и преговарање на меѓународен договор и негово формално доставување по дипломатски пат.
„Договорот има за цел понатамошно развивање и продлабочување на билатералните односи, справување со заедничките предизвици во борбата против меѓународниот тероризам и справување со опасноста од проширување на нелегалното пуштање во употреба на опојни дроги, психотропни супстанци и прекурсори, како и ширење на други форми на меѓународен криминал кои ги загрозуваат безбедноста и другите суштествени интереси на двете држави, а воедно и координирање на меѓусебните активности во борбата против организираниот меѓународен криминал и илегалната миграција.
Двајцата соговорници разговараа на повеќе теми меѓу кои справувањето со сајбер криминалот и сузбивањето на илегалната миграција, при што во поглед на справувањето со сајбер криминалот, Спасовски го информираше колегата Лаанеметс дека Министерството за внатрешни работи на Република Северна Македонија покажа исклучителна спремност во справувањето со овој вид на закани, при што се формираше меѓу секторска криминалистичка обработка помеѓу Одделот за сузбивање на организиран и сериозен криминал , Секторот за компјутерски криминал и Секторот за меѓународна полициска соработка, со цел успешно справување, размена на информации, обезбедување на електронски докази, размена на информации преку меѓународните канали (Интерпол, Европол), контакт со меѓународни Интернет Сервис провајдери, VPN сервиси и др. Во делот на илегалната миграција, Спасовски потенцираше дека Северна Македонија како дел од рутата која мигрантите ја користат изминатите години, успешно се справува со целокупната ситуација.
Естонскиот министер Лаанеметс истакна дека особено се радува што денеска е домаќин на делегацијата од МВР на Република Северна Македонија предводена од министерот Спасовски,изразувајќи благодарност за можноста двајцата министри да поразговараат на теми од значење за полициската работа особено искажувајќи интерес и споделување на искуството на Република Северна Македонија во делот со справувањето со миграциската криза и миграцијата воопшто и компјутерскиот криминал.
„Подготвени сме да го споделиме нашето искуство и знаење со вас и сметам дека предлогот за потпишување на Договорот помеѓу нашите две Влади во делот на полициската соработка што денеска ни го предложивте со внимание и детално ќе биде разгледан од наша страна и ќе бидете известени за следните чекори кои заеднички ќе ги реализираме“.
Спасовски изрази благодарност до колегата Лаанеметс за укажаната чест за средба за размена на искуства и мислења за продлабочување на меѓународната соработка, со уверување дека оваа заедничка средба, иако прва ќе биде почеток на плодна полициска и стратешка соработка помеѓу Министерствата за внатрешни работи на двете земји.
Двајцата министри на крајот од средбата се согласија дека формализирањето на еден ваков договор за полициска соработка ќе претставува чекор напред во оперативната соработка што ќе отвори нови можности и идеи за размена на искуства на нашите полициски служби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Костадиновска-Стојчевска од Пустец: Идеалите на Делчев за слобода и рамноправност се нашиот патоказ кон Европа
Министерката за култура Бисера Костадиновска-Стојчевска, денеска во своето обраќање на свеченоста по повод откривањето на спомен биста на македонскиот великан Гоце Делчев во Пустец, Република Албанија, изрази задоволство дека заедно со Македонците од другата страна на границата, оддава почит на еден од најсветлите ликови на нашата историја, идеолог и борец за слободна и независна македонска држава.
„Делото на Гоце Делчев ги поврзува сите Македонци, каде и да сме. Ние нема никогаш да се откажеме од големите дела и големите зборови на нашите револуционери кои биле на вистинската страна на историјата, како што сме ние денес. Ние кои сме во прогресивниот табор и кои на државата и посакуваме светла европска иднина со рамноправни граѓани и среќни млади генерации“, рече Костадиновска-Стојчевска по повод откривањето на бистата на Делчев, на годишнината од неговата смрт.
Минситерката за култура посочи дека народните херои, како Гоце Делчев, и нивните идеали за слобода и рамноправност се нашиот патоказ кон Европа. Таа нагласи дека неговата визија за светот како поле за културен натпревар помеѓу народите нема никогаш да го изгубат значењето во нашето колективно постоење и во нашето настојување да создадеме сигурна, просперитетна и заедничка иднина.
„Останавме доследни на нашето ветување дека нема да престанеме да градиме мостови на поврзување и дијалог“, додаде Костадиносвка-Стојчевска која на свеченоста присуствуваше со директорката на Завод и Музеј-Битола, Мери Сојанова која во континуитет ги продолжува проектите на „Смарт фор ју ту“, за прекугранична соработка со Албанија, со што активно придонесува за поврзаноста на населението во граничниот појас.
Бистата на Делчев е поставена на иницијатива на Македонска алијанса за европска интеграција, МАЕИ, чиј претседател Васил Стеровски дека оваа биста е симбол на нашата непоколебливост и верба во принципите на правда и слобода.
„Во овие тешки времиња, повеќе од кога било ни е потребно единство и решителност. Нека примерот на Гоце Делчев биде наш водич и инспирација“, рече Стеровски кој додаде дека како Македонска алијанса за европска интеграција продолжуваат да се борат за правата и идентитетот на македонскиот народ во Албанија.
На свеченоста по повод 121 годишнината од смртта на големиот револуционер присуствуваа претставници на Движеньето “За наша Македонија”, на Македонска ализанса за европска интеграциа од Голо Брдо, од Светскиот Македонски Конгрес, од Заедницата на Македонците од Егескиот дел на Македонија протерани ог Грција, од Соузот на здружениата на Македонците и децата бегалци од Егерскиот дел на Македониа МАКЕДОН како и од Македонскиот национален совет на Србија.
Бистата на Гоце Делчев е изработена од уменикот Зоран Тошевски, а е поставена пред цркавата „Св. Архангел Михаил“ во Пустец, на плоштадот именуван по Делчев. Како што велат од Македонската алијанса за европска интеграција, МАЕИ, со поставувањето на бистата на големиот херој, Македонците од Пустец ја потврдуваат својата верба дека вредностите за кои тој се борел остануваат живи и водилка и за денешните генерации. Поставувањето на оваа биста ќе придонесе за зачувување на македонското културно наследство и идентитет во областа Преспа.
Македонија
Османи: На идните генерации не им треба мрачното минато, туку светлата европска иднина
Бујар Османи, во својство на претставник на Европскиот Фронт, денес одржа отворена дебата на тема: “Исклучувачки национализам во мултиетничките држави”
Османи на дебатата потенцира дека баналната реторика на македонскиот опозициски блок за наводното отфрлање на настаните од 2001 година, не е ништо друго освен залуден обид да се намали вистинската сила на Албанците наредени во неспорниот победнички блок – Европскиот фронт.
“На идните генерации не им треба мрачното минато, туку светлата европска иднина, во постојан сојуз со НАТО и САД” рече Османи и повика еднаш засекогаш да се осуди мрачната и безнадежна путинистичка политика.
Воедно, Османо истакна дека: “Кампањата за претседателски и парламентарни избори на Европскиот фронт е најпозитивната и најпрогресивната кампања од сите политички опции во земјава досега”, при што додаде дека јасната програма со конкретни развојни проекти, како и конкретниот преглед на европскиот пат на Северна Македонија за полноправно членство во ЕУ до 2030 година, се главните столбови на опцијата на коалицијата предводена од ДУИ која на 24 април доби плебисцитна поддршка кај Албанците и другите заедници и која ќе се заокружи на 8 мај.
Дебатата беше поткрепена со излагањата и на проф. д-р. Арта Билали, проф. д-р. Башким Селмани и Даут Даути, писател и публицист.
Панелистите во своите излагања ги истакнаа негативните ефекти од подгревањето на национализмот и владеењето на нееднаквоста во општеството, односно ја истакнаа потрбата за вистинска еднаквост меѓу Албанците, Македонците, Турците, Ромите, Србите, Бошњаците, Власите и сите други граѓани без разлика на нивната етничка или верска припадност.
Македонија
Делегација на Левица положи цвеќе на гробот на Гоце Делчев
Денес, делегација на Левица, предводена од потпретседателот на партијата, Реџеп Исмаил-Хактан, заедно со уште двајцата соборци како членови на Централниот комитет на Левица, Александар Димитриевиќ и Мери Георгиевска, положи цвеќе на вечното почивалиште на апостолот на македонската националноослободителна борба – Гоце Делчев.
Во овој историски момент, како никогаш досега во историјата од независноста на Македонската држава, од страна на домашните квислинзи и вазали, а во спрега со странски емисари и останати империјалистички намесници, загрозени се фундаментите на националната свест на Македонскиот народ. Еден таков пример е токму т.н. Француски предлог со кој квислиншката власт, во име на некаквиси „европски вредности“, задоволувајќи ги великобугарските апетити, наметнуваат политики кои директно го сквернават ликот и делото на бастионот на македонската национална свест, Гоце Делчев.
Оттука, уште еднаш ги повикуваме сите политички чинители во Македонија да ги поддржат црвените линии утврдени во петте точки од нашата Македонска платформа, со што ќе ставиме до знаење на сите, како странски, така и на домашни поткопувачи на македонската државност, дека повеќе не се прифатливи никакви уцени и компромиси на штета на македонските национални интереси, сè со цел да се запре понатамошното разградување на Републиката, се вели во партиското соопштение.