Македонија
(Видео) Спасовски на седница на локалниот совет на Општина Гази Баба

Министерот за внатрешни работи, Оливер Спасовски, на покана на градоначалникот на општина Гази Баба, Борис Георгиевски, денеска учествуваше на седницата на Локалниот совет за превенција на општината, која во изминатиот период реализираше бројни активности со цел подготвено започнување на новата учебна година, спречување на ширење на вирусот Ковид-19 меѓу најмладите и обезбедување средства за нормално функционирање на онлајн наставата.
„За мене и за Министерството за внатрешни работи овој локален институт претставува еден од суштинските инструменти не само во реализирањето на превентивните активности во доменот на полициското работење, туку и во реализацијата или целосното заживување на концептот за ‘community policing’, односно полицијата – сервис на граѓаните, што веќе со години наназад го градиме заедно со нашите партнери, мисијата на ОБСЕ во Република Северна Македонија“, потенцираше министерот Спасовски.
Министерот посочи дека превентивните активности на Локалниот совет во контекст на кризата што ја предизвика пандемијата од Ковид-19, како низ призма на ефикасна безбедносно здравствена заштита, пред сè на децата, во пресрет на отпочнатата нова учебна година, така и на сите граѓани на територијата на општината, заслужуваат посебно внимание и од страна на полицијата и сите други надлежни институции и служби.
„Врз основа на искуството од изминативе неколку месеци, ваквите кризни ситуации можат да се превенираат единствено преку целосен заеднички ангажман и посветеност буквално на сите чинители во општеството, поточно на институциите и граѓаните заедно“, истакна министерот Спасовски, изразувајќи уверување дека Локалниот совет за превенција и понатаму ќе носи адекватни и квалитетни мерки, што по својот опфат и карактер ќе гарантираат здравствена безбедност на секој поединец во секакви околности, на училиште, на работното место, во јавниот простор.
Градоначалникот на општина Гази Баба, Борис Димитриевски, потенцираше дека општината, преку кризниот штаб, уште од почеток на пандемијата ги презема сите можни мерки за спречување на ширењето на вирусот, како дезинфекција на сите јавни објекти, на сите 11 училишта и градинките, подготвување и имплементација на протоколи за сите основни училишта, со што наставата почна безбедно, како и обезбедени компјутери и пристап до интернет за учениците и наставниците. Димитриевски изрази увереност дека преку Локалниот совет за превенција ќе се артикулираат теми и ефикасни решенија за спречување на ширењето на вирусот, но и за превенирање на многу други прашања, како спречување на меѓуврсничкото насилство и говорот на омраза помеѓу учениците на социјалните мрежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Полицијата казнуваше и денес, откри 96 сообраќајни прекршоци

Одделението за безбедност на патниот сообраќај при СВР Скопје денеска во периодот од 08:30 до 16:00 часот спроведе зајакната акциска контрола во делот на сообраќајот на територијата на град Скопје.
При контролата санкционирани се вкупно 96 учесници во сообраќајот, од кои изречена е 41 мерка за возење со брзина поголема од дозволената, 15 санкции за возачи на мотоцикл кои управувале без заштитна кацига, четири мерки за возење без возачка дозвола, две санкции за возење мотоцикл без поседување на дозвола со соодветна категорија, две мерки за малолетни лица за управување мотоцикл кои при тоа немале положено возачки испит за познавање на сообраќајните знаци и правила на сообраќајот, а едно лице било приведено во полициска станица за утврдување на идентитет за сторен сообраќаен прекршок по член 211 поради непочитување на знаци и наредби од полициски службеници и 31 мерка по други сообраќајни прекршоци, соопшти МВР.
Сообраќајните контроли продолжуваат и во наредните денови. Полицијата апелира до сите учесници во сообраќајот да ги почитуваат сообраќајните правила и прописи и сите заеднички да придонесат за подобри, посигурни и побезбедни патишта.
Македонија
ДУИ: Власта целосно го отстрани Европското досие на земјата

Демократската Унија за Интеграција изразува сериозна загриженост за погрешниот правец во кои Власта ја води државата, за што граѓаните сѐ погласно бараат ново политичко преиспитување.
„По клучните прашања од стратешки интерес, Власта се соочува со целосен пораз на приоритетите кои самата ги престави како државен интерес, што несомнено треба да резултира со предвремени парламентарни избори
Водени од популистичките мотиви во пресрет на претстојните локални избори, Власта целосно го отстрани Европското досие на земјата и можноста за продолжување на преговорите со ЕУ.
Во популистичките емотивни настапи, Премиерот не само што ја отфрла можноста за дополнување на Уставот со внесување на неколку малцинства, туку јавно се фали и го посочува како највисок политички успех на земјата изигрувањето серија од Ерга омнес обврскитете кои произлегуваат од Стратешките договор со Грција или Преспанскиот договор. Тоа само укажува дека јавниот притисок што го создаваат изборите целосно ја оттргнаа оваа Влада од Европското досие, или како што самите го нарекоа Приоритето број еден“, велат од ДУИ.
Власта со своите постапки ги прави сите напори за дерогирање на механизмите кои прозлегуваат од Охридскиот рамковен договор, што, пак, претставува сериозно наручување на мултиетничкиот карактер на државата – најсилниот и најважен темел на долгорочната стабилност и просперитет.
„Недостатокот од преговори, во исто време ѝ овозможи на Власта целосно да го зароби правосудниот систем, да го стави во лична и партиска фунција, и на јавна сцена да ја демонстрира дисциплина и надвластување и врз Јавното обвинителство, и врз Судската власт.
Оваа неприродна состојба создава јасна и недвосмислена потреба кај граѓаните за политичко преиспитување на Власта.
На државата ѝ е потребна долгорочна политичка стабилност што единствено може да се обезбеди преку одржување на предвремени парламентарни избори заедно со локалните.
Тоа ќе создаде и простори без изборно соочување од неколку години, што ќе им овозможи на политичките елити да влезат во суштински политички процес за спас не европското досие на земјата и фаќање на последната можност за приклучок назад на европскиот пат заедно со Албанија и Црна Гора“, додаваат од ДУИ.
Македонија
Таравари отиде во Турција каде ги посети пациентите од трагедијата во Кочани

Министерот за здравство Арбен Таравари денеска ја посетил болницата „Чам ве Сакура“ во Истанбул, каде што се лекуваат двајца од младите повредени во пожарот во Кочани.
-Во оваа болница првично биле примени шест пациенти, од кои четворица сега се пуштени на домашно лекување откако им се подобрила здравствената состојба. Двајцата преостанати пациенти, Мартин и Борис, се во стабилна состојба и продолжуваат со закрепнувањето, се наведува во соопштението.
За време на посетата Таравари, придружуван од претставници на Конзулатот на Македонија во Истанбул, се сретнал и со родителите на пациентите и изразил „поддршка и солидарност во овие тешки моменти“.
-Тој изрази посебна благодарност до д-р Мустафа Туран и конзулот на Северна Македонија во Истанбул, Идриз Фазлиоски, за покажаната грижа и посветеност. „Свежата болка на Кочани е донекаде ублажена од Мартин и Борис, кои се подобри и наскоро ќе ги пречекаме дома. Ви благодариме, драга Турција, за целата грижа и гостопримство, нагласил Таравари.
Министерот за здравство вчера во Едрене, Турција, учествувал и се обратил на Балканскиот здравствен бизнис-форум при што соопштил дека 165 пациенти од Македонија во 2024 година биле лекувани во здравствени установи во Турција.