Македонија
(Видео) Спасовски: Mеѓународно етаблирање како домаќини на европската конференција на ИНТЕРПОЛ

Во 2017 бевме една од најнетранспарентните институции, со историски најмала доверба кај граѓаните, некаде околу 23%, со никаква соработка во делот на науката и праксата и условите за работа, инфраструктурно, во опрема и човечкиот потенцијал беа доведени во прашање и во една исклучителна состојба, со некаде околу 40 милиони евра задолженост, изјави министерот за внатрешни работи Оливер Спасовски на конфренцијата „Година на нови можности“ организирана од Владата.
„ Сега ја имаме состојбата после сите реформски процеси, со Агенција за национална безбедност, целосна реформа во системот за следење на комуникациите. Сегашната доверба во институцијата е над 50%, според транспарентноста сме една од трите најтранспарентни институции во државата. Сето ова се должи на добро поставените стратешки цели. 2023 година секако треба да биде година во која ќе бидеме добри партнери и на меѓународно ниво, да ги одржиме и продлабочиме сите врски коишто ги имаме. Тоа е исклучително значајно за Министерството, за кредибилитетот не само на Министерството, туку и на државата“, министерот Спасовски направи паралела на состојбите во Министерството.
Тој како редовни планови и можности го потенцираше остварувањето на дефинираните стратешки приоритети за тоа што треба да бидат клучни цели, како што се борбата против организираниот криминал и корупцијата, борбата против тероризмот, илегалната миграција и сајбер безбедноста
„2023 за нас ќе биде многу важна од аспект на меѓународно етаблирање, бидејќи минатата година го добивме одржувањето на 50. јубилејна регионална европска конференција на ИНТЕРПОЛ во Република Северна Македонија. Тоа е едно огромно признание за државата и за работата на МВР. Таа конференција ќе се одржи во рамките на прославата на 7 Мај – Денот на македонската полиција во Охрид. Тука неизоставно е да се спомене дека многукратно се зголеми довербата, меѓутоа и меѓународната поддршка и соработка којашто ја има МВР со учество на многу меѓународни конференции и организации“, презентираше дел од плановите и можностите што ги отвора 2023 година министерот Спасовски.
Тој во врвните приоритети, како втор важен сегмент го истакна вложувањето во човечките капацитети, бидејќи, како што потенцираше, „сѐ друго можете да купите, но не можете да го купите човечкиот потенцијал којашто е потребен“.
„Преку обуки, преку реорганизација ќе можеме да го зајакнеме капацитетот на македонската полиција, преку вложување во инфраструктурата. Знаете дека во изминатиот период интензивно работевме во тој дел, бидејќи знаевме дека е важно да има добри услови за вработените, да се зголеми мотивацијата и да има добри услови за остварување на правата на работниците“, потенцираше министерот Спасовски.
Тој како финални приоритети ги наброи планираните инвестиции во инфраструктурата со старт на три клучни проекти за оваа 2023 година.
„Целосна обнова на Центарот за обука на МВР, целосна реконструкција на Управните служби во Скопје како еден од најфреквентните делови на МВР и изградба на нова полициска станица во Аеродром. Тука е вложувањето во опрема и во многу други сегменти“, финализираше министерот Спасовски.
Спасовски за крај уште еднаш го потенцираше дека дел од стратешките приоритети на Министерството во континуитет остануваат зголемувањето на ефикасноста и довербата во полицијата и постојано намалување на стапката на криминалитет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВЛЕН: Отворен Балкан, казина и корупција: наследството на ДУИ

Партијата на Црната листа, Демократската Унија за Интеграција, со функционери обвинети за корупција и контрола над судството, која им служеше на антиалбанските интереси повеќе од две децении, денес има дрскост да обвини дека наводно Република Северна Македонија се внесува во „српскиот свет“, велат од ВЛЕН.
„Токму оваа политичка партија со години ги затвораше очите пред дестабилизирачките проекти на Србија во регионот, станувајќи нивна алатка на сметка на Албанците и граѓаните на оваа земја. Тоа е партијата чии главни функционери се обидоа по секоја цена да го вратат Никола Груевски на власт и да го ослободат Сашо Мијалков. Јавно прашуваме, дали заборавија дека токму поранешните функционери на ДУИ ентузијастички ја прифатија иницијативата „Отворен Балкан“, најважниот српски геополитички проект по распадот на Југославија, само за да ги зачуваат привилегиите на својот политички клан? Дали заборавија дека токму тие се наредија рамо до рамо со Вучиќ и Дачиќ, станувајќи промотори на идејата „Отворен Балкан“ во време кога Албанците гласно се спротивставуваа на овој проект што им служеше на српските интереси и беше целосно против Република Косово? Да не заборавиме, дали токму моќните на ДУИ, Артан Груби и Перпарим Бајрами, главни партнери во бизнисот со казината беа високи експоненти на српското подземје. Замислете ја иронијата, ДУИ, која сервилно ги пречекуваше и ги придружуваше српските функционери со црвени теписи во Македонија, денес продава патриотизам преку стерилни изјави. Отидоа дотаму што Бујар Османи го донесе шефот на руската дипломатија, Сергеј Лавров, во Македонија. Целата нивна „патриотска“ пропаганда е само фасада за да ги сокријат неуспесите и корупцијата што ја имаат на своите рамена“, велат од коалицијата.
ВЛЕН додава дека тие се истите оние што денес врескаат од страв да не изгубат на следните локални избори, од страв дека албанските граѓани повеќе нема да можат да ги измамат со лагите и лажниот патриотизам што ги користат само кога се во опозиција.
„ВЛЕН ќе продолжи да работи за граѓаните, за владеењето на правото, за европската интеграција и за заштитата на албанските интереси без да се замори од празните обвинувања на оние кои повеќе од две децении се збогатуваа и ја користеа власта само за нивниот тесен семеен круг. Со голема посветеност, го градиме Коридорот 8 и го зајакнуваме стратешкото партнерство со САД. Северна Македонија е во сигурни раце и ќе се движи кон ЕУ, без корупциските кланови кои станаа потпора на секој проект што доаѓа од Белград, само за да ја зачуваат својата моќ и богатство“, велат од ВЛЕН.
Македонија
ВМРО-ДПМНЕ: 38 возила ставени во употреба за гаснење пожари, Владата има конкретен план за справување со пожарите во претстојната сезона

„За разлика од годините наназад оваа година Владата одвои повеќе ресурси и средства со коишто борбата против пожарите ќе се поедностави, а капацитетите се зголемуваат. СДС ја оставија државата без опрема за гаснење пожари и без луѓе. СДС 7 години не набави ниту едно возило за гаснење на пожари. За разлика од тогаш денес Владата има конкретен план за справување со пожари во претстојната сезона“, велат од ВМРО-ДПМНЕ.
„38 возила се ставени во употреба за гаснење на пожарите, Македонија за прв пат со оваа Влада добива интервентна пожарна со 50 специјализирани возила за гаснење на шумски пожари, кои имаат одлични карактеристики и капацитети за справување со тешко достапни терени.
Досега имаше само територјални противпожарни единици но немаше ниту едно шумско возило или возило за отворен пожар.
Армиските и полициските возила се пренаменети и ставени на располагање на Владата и на Дирекцијата за заштита и спасување со цел зголемување на капацитетите за справување со пожарите во земјава.
Со пренамена на полициски и армиски возила државата заштедува неколку десетици милиони евра а се зголемуваат капацитетите за гаснење на пожари.
Исто така се очекува во текот на неделата да стигне од сервис и вториот авион којшто беше на сервис, а третиот се очекува да дојде до крајот на месецот или почетокот на август.
На располагање се и по два полициски и армиски хеликоптери кои се подготвени доколку има поголеми пожари и огнени стихии.
Со цел подобрување на состојбите во противпожарните единици ширум Македонија, кои од минатата власт беа оставени во катастрофална состојба без соодветни технички услови и човечки ресурси, се работи и на засилување кадровскиот потенцијал.
Владата предводена од ВМРО-ДПМНЕ работи на сериозна и целосна трансформација на целиот систем за управување со кризи.
Владата предводена од ВМРО-ДПМНЕ работи посветено и има план за полесно справување во претстојната сезона на пожари“, се наведува во соопштението на ВМРО-ДПМНЕ.
Македонија
ДУИ: Мицкоски призна дека предлогот за оданочување на невенчаните била ‘фрлена’ тема за намерно одвлекување внимание од итните прашања со кои се соочува државата

„Демократската унија за интеграција изразува длабока загриженост за правецот што го зазеде новата влада и за нејзините намерни обиди да го дефокусира јавниот дискурс од стратешките прашања од клучно значење за државата, а особено од европската интеграција. Сме сведоци дека вчера самиот премиер Христијан Мицкоски јавно призна дека предлогот за оданочување на невенчаните лица била ‘фрлена’ тема со цел да се предизвика дебата, односно намерно средство за одвлекување на вниманието од реалните и итни прашања со кои се соочува државата“, велат од ДУИ.
„Ова признание од страна на премиерот е алармантно, бидејќи потврдува дека оваа влада не се води од долгорочна визија за државата, туку од дневно политички калкулации, со цел да се прикријат неуспесите и вистината да се држи далеку од јавноста.
Вистината е дека Северна Македонија сè повеќе тоне во изолација. Тоа го потврдува и последниот извештај на Европскиот парламент, во кој се истакнува стагнацијата на државата во процесот на интеграција, зголемениот руско влијание и концептот на „српскиот свет“ во внатрешната политика, како и недостатокот на демократски напредок.
Јасно е дека руското влијание и концептот на „српскиот свет“ имаат за цел да ја држат Северна Македонија изолирана, далеку од Европската унија и западните вредности. Дел од ова сценарио е и систематското исклучување на Албанците од институциите, од носењето одлуки и од јавниот живот.
Оваа влада, наместо да биде фактор на обединување, се движи по опасен пат кој има за цел меѓуетничка поделба, маргинализација на Албанците и ослабување на евроатлантската ориентација на државата.
ДУИ ќе продолжи цврсто да стои во одбрана на евроатлантските интереси на граѓаните и на државата, спротивставувајќи се на секој обид за изолација, дефокусирање или исклучување“, се наведува во соопштението на ДУИ.