Македонија
(Видео) Стаменкоска-Трајкоска: Проблеми при уписите во средното образование, децата не знаат дали се примени во училиштата

Пратеничката Бети Стаменкоска-Трајкоска од ВМРО-ДПМНЕ ја обвини власта за проблеми во системот за електронско пријавување за упис во средно училиште.
„Деновиве актуелни се уписите во средните училишта. Владата и Министерството за образование и наука помпезно најавуваа значително олеснување на овој процес по електронски пат и, како што велеа, поголема транспарентност и елиминирање на влијанието на човечкиот фактор во рамките на уписите. За жал, се случи катастрофа. Системот за електронско пријавување падна пред да почне аплицирањето. Потоа беше во функција одвреме-навреме, па многумина успеаја да поднесат електронска апликација по многу часови поминати во обидување.
Уште пострашно е што сега цела генерација деветоодделенци и нивните семејства сè уште се во неизвесност. Резултатите што требаше да бидат објавени, како што најави и самиот министер за образование и наука, на 18 јуни, сè уште не се објавени. Децата не знаат дали се примени во училиштата во кои аплицирале, а веќе утре во согласност со информациите во конкурсот, треба да почне новото пријавување“, изјави Стаменкоска-Трајкоска.
Таа праша дали поради ова доцнење, многу ученици ќе бидат оштетени.
„Зошто резултатите доцнат и дали наместо да биде елиминиран човечкиот фактор, всушност резултатите се фингираат во нечии канцеларии, што со оваа Влада е многу веројатно? Кога јавноста ќе дознае во кои училишта се преостанати слободни места ако веќе од утре почнува второто пријавување? Ако оваа Влада не е способна да спроведе рутински процес, уписи во средно образование, кои никогаш во минатото не претставувале проблем, се поставува прашањето дали може да ја промени катастрофалната состојба во образованието, која неспособните кадри на коалицијата на власт сами ја создадоа и ни предизвикаа огромни срамови во меѓународната јавност?
Одговорот е јасен. Ниту размислуваат ниту имаат капацитет за поквалитетен образовен систем. За 5 години, се сменија 4 министри и секој си тераше своја политика и свои интереси. Ниту план, ниту долгорочна стратегија ниту континуитет. Затоа денес образованието е каша попара, а институциите не може да им гарантираат на граѓаните ниту остварување на основните уставно загарантирани права“, додаде таа.
Стаменкоска-Трајкоска истакна дека нема учебници, ниту свидетелства, дека училиштата должат за струја, за парно, за вода. Наставниците протестираат за повисоки права, плати и подостојни услови за работа, дека паѓа рејтингот на високообразовните установи. Научниците немаат поддршка за проекти и истражувања.
„Ова е премногу! Време е за промени и тоа граѓаните го побараа во саботата. Заедно ќе ставиме крај на оваа неспособност и по изборот на нова влада, предводена од ВМРО-ДПМНЕ, ќе следува вистинско реформирање на образовниот систем“, порача таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Со ВМРО-ДПМНЕ на власт храната станува луксуз

Што имаме ние од скандинавската среќа што премиерот Мицкоски и ВМРО ДПМНЕ сакаат да ни ја прикажат и да не разубедат дека во држава со 400 евра минимална плата и цените што дивеат, добро се живеело. Да, се живее, ама до 10-ти во месецот, потоа е период на преживување. Со ВМРО ДПМНЕ на власт, година и пол, храната стана луксуз, луксуз е минималната плата, луксуз е чистиот воздух и справувањето со отпадот, луксуз е правдата, луксуз е да се има достоинствен живот. Ама, не е луксуз рекордно задолжување, новиот долг од 1,8 милијарди евра за првите 13 месеци, без никаков реален и видлив ефект на развојот, истакна лидерот на СДСМ, Венко Филипче на вечерашната граѓанска трибина под слоганот „Се бориме се нашиот дом“ што се одржа во Радовиш.
Додаде дека откако на власта не им успеале така наречените „кошнички“, кои се покажале дека биле само лажен пи-ар и откако не презеле ништо, Владата на ВМРО ДПМНЕ користела само спинови и манипулации.
– Реалните податоци кажуваат инфлација од 4 отсто, а власта со спин се обидува да каже минус 0,2 отсто, ама споредувано месец со месец. Вистината е дека реалната инфлација е 4 отсто, дека храната е поскапа 6,3 отсто, цените во рестораните и хотелите над 8 отсто. Колку сакаат нека прават спинови, граѓаните гледат и чувствуваат. Не им требаат бројки, знаат колку можеле да купат со истите пари пред една година, а колку може сега. Ќесата од маркет е се попразна и се полесна, се бира што да се купи. Премиерот треба да знае дека граѓаните не може да живеат од неговите спинови, туку од она што им останува во паричникот, потенцираше Филипче.
Тој ги повика радовишани на 19 октомври да излезат масовно на гласање и да го дадат својот глас за кандиатот за градоначалник на Радовиш од СДСМ и коалицијата, Ристо Спасов и за советничката листа од оваа коалиција.
Македонија
Мицкоски: Тоа што Филипче ме презира е помало гајле, поголемо е што ја доведе СДСМ на едвај 120-130 илјади гласови

Ова за СДСМ не се избори за спас на Македонија, туку избори за спас на нивните лични кариери. Тие се уплашени од одговорност и затоа ова тесна мала група која што ја има киднапирано СДСМ, ја држи цела држава Македонија во грч. И како такво, јас ова го разбирам како потценување на гласачите и директна уцена врз цела држава, рече вечерва лидерот на ВМРО-ДПМНЕ и премиер Христијан Мицкоски од митингот во Свети Николе.
Мицкоски се осврна и на трката за градоначалник на Град Скопје, посочувајќи дека кандидатот од СДСМ не е во трка со кандидатот за градоначалник од редовите на ВМРО-ДПМНЕ, туку со независните кандидати.
– Јас ја кажувам вистината во очи, без оглед на тоа дали Филипче ме мразел или презирал, како што тоа го кажа на еден од последните митинзи. И тоа што ме презира е помало гајле, поголемо е што таа негова политика на навреди, на ниски зборови, кои што не би требало човек интелектуалец да ги кажува, па колку и да чувствува гнев кон мене и кон ВМРО-ДПМНЕ, ја доведе СДСМ на едвај 120-130 илјади гласови, а во некои општини, оваа политичка партија е трета, во некои е и четврта опција. Во главниот град, на пример, очекувањата се дека нивниот кандидат за градоначалник на Скопје нема да ја надмине бројката од 30 илјади гласови. Што во суштина, е далеку под нивниот биолошкиот минимум, и е доволна основа да биде трка не со ВМРО-ДПМНЕ и со Орце Ѓорѓиевски во Скопје, туку со некои од независните кандидати, истакна Мицкоски.
Осврнувајќи се на довербата во судството, Мицкоски рече дека два проценти доверба во судството се последица на неказнетиот криминал и сознанието дека повеќе од 100 пријави стојат во фиоките на судиите и обвинителите кои им служат на СДСМ и ДУИ.
– Она што сега ги мачи е чувството и сознанието дека се ближи времето на одговорност и се стега обрачот и околу нив и околу оние кои упорно ги штитат. За тие што ги штитат, пак, претседателот на СДСМ, Венко Филипче, ќе каже дека биле големи професионалци, а тие кои што ги штитат и се нивниот последен бастион, се малкумина обвинители и судии, и поради нив денеска довербата на народот во обвинителите и судиите е скромни 2 проценти. Тие два проценти доверба се последица на секој неказнет криминал, на сознанието дека повеќе од 100-тина пријави држат во фиоки и ја штитат својата политичка олигархија по секоја цена. Тие малкумина се нивните лакеи и измеќари, кои што се уште и служат на претходната влада на СДСМ и ДУИ, рече Мицкоски.
Македонија
Спасовски вели дека ВМРО-ДПМНЕ ја злоупотребува трагедијата во Кочани, тврди дека не се јавил да спречи контрола

Пратеникот на СДСМ и поранешен министер за внатрешни работи, Оливер Спасовски денеска ги демантираше, како што вели, лагите изнесени на прес-конференција од страна на ВМРО-ДПМНЕ.
„Најостро ги демантирам лагите и манипулациите коишто ВМРО-ДПМНЕ ги пласира. Ги отфрлам како целосни невистини. Ова е класичен пример за очајна манипулација. Никогаш, ниту во еден момент, не сум се јавил за да спречам контрола, напротив, фактот што контроли имало насекаде е најсилна потврда дека ниту сум влијаел, ниту постои било каков обид за тоа.
Овие лаги кои ги шири власта се очаен обид на ВМРО-ДПМНЕ за последна злоупотреба на трагедијата во Кочани за политички цели, во момент кога јавноста веќе знае дека токму нивни функционери, од сите ешалони на власта, биле директно инволвирани во случајот ‘Пулс’ а сега се заштитени.
Сакам да им порачам дека со спинови и лаги не може да се побегне од фактот дека власта ја попречува правдата за трагедијата во Кочани”, стои во објавата на Спасовски.
Претходно, Викторија Андоновска од ВМРО-ДПМНЕ, на прес-конференција праша, дали Оливер Спасовски се јавувал во СВР Штип и барал да се р’же на полицијата во Кочани за спас на газдата на дискотеката Пулс? Што кријат ЈО и Коцевски?