Македонија
(Видео) Стамов: Членови блиски до Мицкоски се разочарани како ја води партијата, очекуваме нивна поддршка на Kонгресoт
Обезбедено е присуство на 2/3 од делегатите, од вкупно 511 за вонредниот конгрес кој ќе се одржи на 28 март и оваа одлука е конечна и усвоена, изјави Борче Стамов, еден од членовите на Иницијативниот одбор за свикување на вонредниот конгрес на ВМРО-ДПМНЕ. Тој вели дека со самиот факт што на иницијативата поддршка дале толкав број членови, конгресот е легитимен, во согласност со партискиот статут и ако делегатите изгласаат недоверба на Мицкоски, тој ќе треба да си замине.
„Не знам зошто Мицкоски се плаши од најавата за вонреден конгрес, сосема легитимно е по бројните изборни порази да поднесе отчет пред членството, пред тие исти делегати коишто го избраа во 2017 година. Во статутот нема никаква пречка за негово одржување, а впрочем и самиот Мицкоски беше избран на вонреден конгрес. Очигледно се исплашија од нашата иницијатива и веднаш најавија дека конгрес ќе има во ноември, редовниот што треба да се одржи. Ние сме на ставот дека е доцна за конгрес во ноември и дека внатре партиските работи треба да си ги средиме пред локалните избори, зашто ако не го обединиме членство и не кренеме во реформи, немаме шанси за добар изборен резулта“, рече Стамов.
Стамов не беше прецизен дали меѓу делегатите има од раководството блиско до Мицкоски, но рече дека постои сериозно незадоволство во партијата и од нив, па ги повика сите кои сметаат дека треба да се гласа довереба на лидерот, да дојдат на конгресот.
„Не е тајна дека внатре во партијата има незадоволство и фрустрации. Мицкоски вели дека победил на последните избори, но сепак реалноста е друга. Не може да го држите членството во неизвесност со изборни порази и да очекувате поддршка. Демократски и фер е тој самиот да биде самокритичен, да ја погледне вистината какава што е. Ќе му се заблагодариме што ја водел партијата во исклучително тежок период и ќе избереме нов лидер“, вели Стамов.
Како што објасни тој, главната задача на овој партиски настан ќе биде да се дебатира за сработеното на Мицкоски и гласање дали да остане или не на функцијата. Паралелно ќе има оглас и за избор на нов лидер на кој може да се пријават членовите кои имаат програма, визија и капацитет да го обединат членството на ВМРО-ДПМНЕ кое со години е раздвоено на „за“ и „против“ оваа раководство. Очекува Мицкоски да ги прифати одлуките од конгресот бидејќи, како што рече, не е добар чекор, една партија по судски пат да се докажува дали треба да си го смени лидерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ѓорѓиевски: Градоначалниците или ќе го реализираат ветеното или предвреме да бидат отповикани
Претседателот на ЗЕЛС и градоначалник на Општина Кисела Вода, Орце Ѓорѓиевски учествуваше на панел-дискусијата ,,Гласот на граѓаните: Отповикување на градоначалникот како алатка за локална демократија”, во организација на Либералниот институт Скопје, на која говореа и Ристо Пенов, Никола Пановски и Висар Ганиу.
Ѓорѓиевски истакна дека имајќи го во предвид фактот дека сеуште зборуваме за населени места каде треба да се градат фекални и атмосферски канализации, како и целокупниот хаос во градот Скопје, можеме да заклучиме дека во изминативе 30-тина години имало и сеуште има градоначалници кои својот мандат го поминуваат во хибернација, и токму затоа ова мора да биде променето со законски измени за предвремено отповикување на одреден градоначалник.
-Многу пати нашите граѓани биле изманипулирани, ветувајќи им одредена реализација на програма од страна на некој функционер, и кај градоначалниците по нивниот избор согласно актуелната законска регулатива не може да понесат одговорност за работата за која се избрани. Се произлегува од волјата на граѓаните, и се може да заврши со волјата на граѓаните. Затоа секој градоначалник откако ќе биде избран, уште од првиот ден треба да биде свесен дека многу порано од истекот на мандатот може да биде отповикан. Затоа ние како ЗЕЛС заедно со невладините организации, експертите и сите останати чинители треба да поддржиме законски измени кои би придонеле по ажурна локална самоуправа, изјави Ѓорѓиевски.
Тој додаде дека активно се работи и на законските измени со кои би овозможиле одземање на ингеренции во дадена сфера на одредена локална самоуправа, со цел да не постои простор за злоупотреби или неажурност на било кој градоначалник.
Македонија
Северна Македонија избрана за членка на Советот за човекови права на Обединетите Нации за периодот 2025 – 2027
Со 168 гласа „за“, Република Северна Македонија денес стана нова членка на Советот за човекови права на Обединетите Нации за периодот 2025-2027, на изборот што се одржаа во Генералното собрание на ОН во Њујорк, информира МИнистерството за надворешни работи.
Поддршката од земјите членки на ОН е потврда за придонесот на нашата држава како посветен промотор и заштитник на човековите права и слободи.
Во својата објава на социјалните мрежи, министерот Муцунски нагласи дека една од главните цели по овој дипломатски успех ќе биде активното учество во Советот, придонесувајќи за глобална промоција на човековите права и подобрување на ситуацијата ширум светот, што е основа и на нашата кандидатура за членство
Во најновиот Национален извештај за Универзалниот периодичен преглед презентиран пред Советот за човекови права во Женева, нашата земја е високо на листата на земји кои ги почитуваат и гарантираат човековите права и оценета како квалификуван кандидат кој ги исполни неопходните услови за да биде дел од работата на ова меѓународно тело.
Инаку, според информацијата од МНР, Република Северна Македонија по вторпат е избрана за членка на Советот за човекови права, откако претходно членуваше во периодот 2014-2016.
Македонија
Стоилковиќ- Рокас: изразена поддршка кон реформските процеси во делот на заштитата на правата на етничките заедници
Потпретседателот на Владата и министер за односи меѓу заедниците,Иван Стоилковиќ денес оствари работна средба со новоименуваниот амбасадор на ЕУ во РС Македонија, Михалис Рокас.
На средбата стана збор за клучните прашања, приоритети, но и идните планови на Министерството за односи меѓу заедниците, како и соработката со ЕУ, со акцент на помалите етнички заедници во земјава.
„Како Министерство ни значи соработката со ЕУ од причина што помалите етнички заедници немаат друга адреса освен ЕУ, со оглед на тоа какво искуство имавме се надевам дека работите со ваша помош ќе ги исправиме“, рече на средбата Стоилковиќ и истакна дека е задоволен од тоа како се одвиваат работите во првите 100 дена.
Заклучокот на двајцата соговорници беше дека заштитата на етничките заедници е приоритет на Министерството за односи меѓу заедниците, како и дека постојат многу точки за кои може да се зборува, а, како што нагласи, амбасадорот на ЕУ Рокас нашата земја секогаш може да смета на помош и поддршка од Унијата.
Амбасадорот Михалис Рокас го изрази своето задоволство од, како што рече, храброста и решителноста на вицепремиерот и министер Стоилковиќ за изнесените податоци за затекнатата состојба во Министерството, и воедно ја изрази својата поддршка кон реформските процеси и приоритетите во делот на заштитата на правата на етничките заедници и нагласи дека не смее да има никакво оправдување и сето она што е злоупотребено треба да биде процесуирано.
Тема на разговор беа и економските прилики во земјата и фактот дека соработката меѓу балканските земји ќе придонесе за стабилноста во регионот, а придобивките ќе ги чувствуваат сите.
На крајот од средбата Стоилковиќ уште еднаш упати честитки до амбасадорот за назначувањето на новата функција и изрази уверување дека соработката, но и пријателските односи не само што ќе го задржат досегашното ниво, туку и ќе се продлабочат во наредниот период.