Македонија
(Видео) Стоилковски: Како фирма блиска на Рашковски зела тендери вредни 850.000 евра од „Дрисла“?
„Како фирма блиска до Рашковски зела тендери вредни 850.000 евра од ‘Дрисла’? Како во време на СДСМ, додека со ‘Дрисла’ управува Коста Начевски, роднина на Рашковски и функционер на СДСМ, фирмата ‘Алпима градба’ на Александар Пиперевалиев од Струмица, бизнис-партнер на Заеви и роднина на Рашковски, склучува договори за изнајмување машини со јавното претпријатие за што му се исплаќаат приближно еден милион евра?“, беа прашањата што на денешната прес-конференција ги постави портпаролот на ВМРО-ДПМНЕ, Наум Стоилковски.
Фирмата „Алпима градба“, сопственост на Пиперевалиев од Струмица, близок до Рашковски, рече Стоилковски, со само два договора од 2019 и 2020 година успева со изнајмување машини да оствари приход од „Дрисла“ приближно еден милион евра?
„Како токму фирмата од Струмица, блиска до Заеви и до Рашковски, го добива тендерот за изнајмување машини во ‘Дрисла’? Дали за ‘Алпима градба’ е менувана тендерска документација во отворена постапка? Како тече постапката и како се мести тендерот за струмичката фирма? Одговор ќе ви дадам сега“, истакна тој.
„Според договорот од 2020 година, вреден над 12 милиони денари, и тоа е првата работа откако ‘Дрисла’ станува ЈП и со претпријатието почнува да управува Коста Начевски. Се распишува оглас за изнајмување механизација, кој првично содржи услови за заинтересираните да имаат минимален годишен приход од 20 милиони денари годишно три последователни години, последните години да имаат најмалку 12 вработени и други критериуми, кои, замислете, додека е отворена постапката, се менуваат и се бришат! Односно, огласот почнува да ги добива контурите токму како на фирмата на Пиперевалиев од Струмица, бизнис-партнер на Заев и роднина на Драги Рашковски, во тој момент генерален секретар на Владата. Вториот спорен момент е што за договорот меѓу ‘Дрисла’ и фирмата на Пиперевалиев е прекршен Законот за јавните набавки и договорот е склучен во четири очи“, наведе Стоилковски.
Оценува дека додека државата тонеше економски, здравствено, образовно и на секое друго поле, СДСМ тера бизниси во чија основа лежат криминал и корупција. Се менуваат услови на тендери во отворена постапка, вели Стоилковски, а бизнисите, според него, си ги делат братучеди и роднини на функционери од Владата.
„Тоа беа тенденцијата и сликата за владеењето на СДСМ изминативе пет години, тоа е сликата што сѐ уште не е сменета. Единствена промена ќе дојде со предвремени, брзи парламентарни избори“, истакна портпаролот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пратеникот Јанчев кој имаше сообраќајка во која загина тинејџер доби обвинение, свртел на место каде не смеел
Основното јавно обвинителство Скопје поднесе обвинение против Сашко Јанчев, пратеник од партијата Левица, за кривично дело „Тешки дела против безбедноста на луѓето и имотот во сообраќајот“, согласно член 300 став 4, во врска со член 297 став 3 и став 1 од Кривичниот законик.
Обвинението се однесува на тешката сообраќајна несреќа што се случи на 14 септември, по полноќ, во скопското село Марино, во која животот го загуби 16-годишниот Матеј Димовски, а неговата 13-годишна сопатничка беше тешко повредена.
Според Обвинителството, по спроведена истражна постапка, обезбедени се сите релевантни докази и извршени се соодветни вештачења со кои се утврдени причините за несреќата.
Обвинетиот управувал патничко возило „Хјундаи Тусон“, при што не се придржувал до сообраќајните прописи и со своето однесување го загрозил јавниот сообраќај и безбедноста на учесниците.
„Осомничениот непрописно свртел со возилото, без претходно да се увери дека маневарот може да го изврши без да ги загрози другите учесници во сообраќајот“, наведува Обвинителството.
Во тој момент, во возилото удрил мотоцикл марка „Јијинг“, без регистарски ознаки и без вградени светлосни уреди, со кој управувал починатиот 16-годишник. Според официјалните наводи, мотоциклистот немал возачка дозвола, а ниту тој ниту неговата сопатничка не носеле заштитни кациги.
Како последица на тешките повреди здобиени во сообраќајната несреќа, малолетниот возач на мотоциклот починал, додека девојчето кое било сопатник се здобило со тешки телесни повреди.
Македонија
Скопје руши рекорди по загаденост, утрово е втор град во Европа
Според светскиот сервис IqAir Скопје утрово е на 20 место во светот, а второ во Европа по загаден воздух.
Доколку се следат податоците од апликациите кои ја мерат загаденоста на воздухот, Скопје и утрово е град со многу висока загаденост. Според светскиот сервис IqAir Скопје утрово е на 20 место во светот, а второ во Европа по загаден воздух.
Најзагаден воздух утрово дишат жителите на населбата Илинден.
Министерството за животна средина алармираше дека е надминат прагот на алармирање. Загадувањето во Скопје е децениски проблем особено во зимскиот период и времетраењето на грејната сезона.
Македонија
Студено утро со измерени -5 степени во Берово
Најстудено изутринава е во Берово, каде се измерени – 5 степени, по што следуваат Битола и Струмица, -4, Скопје-Петровец и Штип, – 3, Демир Капија, Велес и Куманово, – 2. Во Тетово, Скопје-Зајчев Рид, Кавадарци, Гевгелија, Прилеп, Mаврови Анови и Претор температура од – 1, Крива Паланка, Попова Шапка, 0, Охрид, 1, Виница и Kрушево 2, информира Управата за хидрометоролошки работи (УХМР).
Времето денеска ќе биде променливо облачно со сончеви периоди. Претпладне по одделни котлини ќе има појава на магла. Ќе дува слаб ветер од југоисточен правец. Максималната температура ќе биде во интервал од 6 до 13 степени.
Во Скопје, променливо облачно и тивко со појава на магла. Максималната температура ќе достигне до 7 степени.
УХМР најави дека до вторник ќе се задржи стабилно и претежно тивко време. По одделни котлини ќе има појава на магла и зголемена облачност. Од вторник кон крајот на денот и во следните денови ќе има повремени локални врнежи од дожд. На планините и на повисоките места врнежите ќе бидат од снег.

