Македонија
(Видео) Стојаноски: Шилегов, Министерството за транспорт и Државни патишта дале 20 милиони евра на тендери
Пратеникот од редовите на ВМРО-ДПМНЕ Бојан Стојаноски вели дека министерства, јавни претпријатија и општини потрошиле милиони евра преку крајно сомнителни тендерски постапки.
„Вчера објавивме дека институциите на власта на СДСМ во изминативе 4 години склучиле 200 милионски договори, за кои подоцна не го испочитувале законот и не го објавиле договорот и сумата на истиот на страницата на Бирото за јавни набавки, иако на тоа законот ги обврзува, тие ги кријат договорите. Според информациите кои дојдоа до нас, Петре Шилегов во изминатиов период склучил неколку договори во вкупна вредност од 800.000 евра, без притоа истите да ги објави на страната на Бирото за јавни набавки. Што крие Шилегов и зошто не се објавени овие договори?“, прашува Стојаноски.
Според сознанија на ВМРО-ДПМНЕ, како што напомена Стојаноски, министерството за транспорт и врски во изминативе 2 години склучило 4 договори во вкупна вредност од 297.000.000 денари, односно околу 5 милиони евра, за кои не е испочитуван законот и не ги објавило на увид на јавноста.
„Што криеле министрите за транспорт и врски поставени од Заев? Имено тие на 17.12.2019 склучиле договор за изградба на фекална канализација во Визбегово во износ 147.000.000 денари и не го објавиле. Што има спорно во овој договор и зошто не е објавен? Што сакале овие луѓе да сокријат? Истото министерство на 10.12.2019 склучило договор во износ од 105.000.000 денари за изградба на фекална канализација во Арачиново, и тој договор не е објавен“, потенцира пратеникот од ВМРО-ДПМНЕ.
Додаде дека по истите стапки одело и Јавното претпријатие за Државни патишта, кое како што рече во изминатите година и пол склучило 5 договори, за кои постои сомнеж за злоупотреби и прикривање во вредност од 863.570.000 денари, односно нешто над 14 милиони евра.
„Имено претпријатието на 17.02.2020 склучило договор во износ од 127.500.000 денари, за санација на свлечиште на регионален пат Р1308 Претор – Маркова Нога, и истиот не е објавен на страницата на Бирото за јавни набавки. Што и зошто се крие? Истото го направиле и десетина дена претходно, при што на 24.01.2020 склучиле договор во износ од 442.000.000 денари, за рехабилитација на автопат Куманово – Страцин, договор кој исто така е сокриен од јавноста. Што и зошто крие власта? И дали со необјавувањето на договорите кријат неправилности или местени постапки?“, праша Стојаноски.
Како што рече, неговата партија ги повикува ДКСК и ЈО веднаш да отворат случај и да се утврди зошто не е почитуван законот и дали станува збор за местење тендери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Секој кој ја добил довербата на граѓаните е денешниот современ патриот
Претседателот на ВМРО-ДПМНЕ, Христијан Мицкоски, се обрати од денешниот настан одржан во општина Дојран, во рамки на вториот круг од локалните избори кои ќе се одржат на 2 ноември годинава. Мицкоски зборуваше за случувањата за време на изборната кампања и за тоа што следува во наредниот период. Тој истакна дека ВМРО-ДПМНЕ е партија која легитимитетот го црпи од граѓаните, а како што вели, секој оној кој ја добил довербата од народот и работи чесно и трудољубиво е денешниот современ патриот, илинденец и асномец.
,,Нема да биде лесно, ќе биде тешко, не памтиме ние лесни времиња, во суштина, многу предизвици, затоа сме ние да ги решаваме тие предизвици, не да лелекаме, не да кукаме, затоа е ВМРО-ДПМНЕ, затоа е оваа коалиција која што ја предводи ВМРО-ДПМНЕ, да ги решава проблемите“, рече Мицкоски.
Мицкоски истакна дека довербата која граѓаните ја дадоа на ВМРО-ДПМНЕ и коалицијата за овие локални избори, во првиот круг од истите, е од историски размери.
,,На овие локални избори, граѓаните дадоа доверба, а коалицијата која што ја предводи ВМРО-ДПМНЕ во историски размери, како никогаш до сега. Јас сум убеден дека на овие 33 градоначалници, кои што се избрани во првиот круг, ако се додадат овие нови два, бидејќи противниците се откажаа, веќе се 35 убеден сум, дека на овие 35 ќе се додадат и преостанатите 24 и бројката ќе биде 59“, кажа Мицкоски.
ВМРО-ДПМНЕ е партија која легитимитетот го добива од граѓаните, и како што вели Мицкоски, таа доверба нема да се изневери и само ќе се надградува.
,,ВМРО-ДПМНЕ е партија која што својот легитимитет го добива, тој легитимитет извира од граѓаните. И ние со нашето работење нема никогаш да дозволиме таа доверба да ја прокоцкаме, таа ја доверба да ја изневериме, туку напротив ќе се трудиме со нашето работење да покажеме и докажеме дека сме ја заслужиле таа доверба и дека само ќе ја надградуваме“, истакна Мицкоски.
Мицкоски посочи оние, кои според него, работат искрено, чесно и трудољубиво да ја оправдаат довербата кој граѓаните им ја даваат се денешните современи патриоти, асномци и илинденци, а не тие кои се кријат зад црни кампањи и ад хоминем напади.
,,Секој оној, кој што добил можност, ја добил довербата на граѓаните, и кој што работи напорно, чесно, трудољубиво, којшто е вреден, којшто не се однесува надмено, туку напротив, се однесува понизно, кон граѓаните кон народот, кој што го избрал, е денешниот современ патриот, е денешниот гемиџија, е денешниот илинденец, асномец“, рече Мицкоски и додаде:
,,Не оној кој што седи зад статусите и се крие со лажни имиња, кој што навредува кој што лаже, кој што води црни кампањи, кој што напаѓа ад хоминем, со ниски страсти, тие не се патриоти тие се измамници“.
Македонија
Тентов: Време е во Дојран да ја заокружиме промената што ја започнавме на 19 октомври
„Дојран е скапоценост на Македонија, но таа скапоценост мора повторно да биде препознаена. Ни треба развој, ни треба визија, обединување, а тоа може да го направиме заедно“, вели Илија Тентов, кандидат за градоначалник на општина Дојран од редовите на ВМРО-ДПМНЕ, кој се обрати од денешниот настан одржан во Дојран.
Тентов истакна дека со поддршката од Владата, во Дојран ќе се реализираат проекти кои ќе го подобрат животот на граѓаните.
„На 2 ноември гласате за иднината на вашите деца, за нашето вековно езеро, за урбанизиран Дојран, почисти улици, подобар туризам, за поголеми инвестиции, за вистинска шанса младите да останат овде, во својот дом“ рече Тентов.
Тентов ги повика граѓаните обединето да излезат на гласање и да го заокружат бројот 9, да го направат вистинскиот избор за сигурна иднина и развој на Дојран.
„Време е да ја потврдиме победата, време е да покажеме дека Дојран стои цврсто, обединет и достоинствен. Време е да ја заокружиме промената што ја започнавме. На 2 ноември да излеземе масовно, да ја подигнеме главата гордо и да гласаме за бројот 9. За работа, за сигурност, чесност и достоинство, за иднина. Да гласаме за Дојран што ќе блесне како никогаш досега“, истакна Тентов.
Македонија
Мицкоски: Очекуваме во вториот круг бројката на гласови за Орце Ѓорѓиевски да биде околу 125-130 илјади
Христијан Мицкоски, претседателот на ВМРО-ДПМНЕ, се обрати од денешниот настан одржан во Валандово, во рамки на вториот круг од локалните избори кои ќе се одржат на 2 ноември 2025 година. Мицкоски се осврна на темата за локалните избори, од кои првиот круг беше одржан на 19 октомври годинава, а ВМРО-ДПМНЕ имаше победа во 33 општини. Според него, ова е историски резултат во независна Македонија, а дополни и дека кандидатот од редовите на ВМРО-ДПМНЕ за градоначалник на Град Скопје е во водство 3:1 во однос на неговиот противкандидат.
,,Ние цела кампања, од првиот ден до последниот, па и до ден денешен, ниту во еден момент не објавивме негативен спот за нашите политички противници, ниту во еден момент не водевме црна кампања, ниту во еден момент не ги нападнавме ад хоминем, ниту со ниски страсти“, вели Мицкоски.
Мицкоски зборуваше за опозицијата, која според него, од првиот ден на изборната кампања водат црна кампања, а тоа се пресликува и за време на вториот круг од изборите.
,,Тие од првиот ден, до последниот ден, па и денеска, водат црна кампања. Мене ме спакуваа во парчиња во куфер, па потоа ми велеа дека ме презираат и што ли не им се случи. И резултатот од сето тоа го видоа граѓаните на 19 октомври, само 3 општини. Ние сме демохристијанска партија, ние со добро треба да ги совладаме нашите политички противници, само така ќе покажеме дека можеме поинаку, и дека сме поразлични од другите“, рече Мицкоски.
Како што кажа Мицкоски, ВМРО-ДПМНЕ на 19 октомври освои 33 општини, а изминативе два дена, двајца од противкандидатите на кандидатите од редовите на ВМРО-ДПМНЕ се откажале, и според него веќе може да се зборува за 35 градоначалници, што е историски резултат.
,,Тоа што е зад нас, еден факт кој што е немилосрден. Тоа се бројки. После првиот круг, ВМРО-ДПМНЕ и коалицијата која што ја предводи ВМРО-ДПМНЕ освоија 33 градоначалници. Изминативе 2 дена, два противкандидати на нашите кандидати за градоначалници е откажаа, така што веќе можеме да зборуваме за 35 градоначалници“, истакна Мицкоски и додаде:
,,ВМРО-ДПМНЕ и коалицијата водат, имаат веќе освоено градоначалник или се во круг како второпласирани, но тоа се во 6 општини каде што е многу мала, но и значителна разлика во вкупно 59 општини. До сега ваков историски резултат во независна Македонија не се случил“.
Мицкоски се осврна и на трката за градоначалник на Град Скопје, каде, како што рече, кандидатот од редовите на ВМРО-ДПМНЕ, има предност 3:1 во однос на неговиот противкандидат, а истакна и дека очекува бројката на гласови за кандидатот на ВМРО-ДПМНЕ да биде околу 125-130 илјади во вториот круг од изборите.
,,Како коалиција предводена од ВМРО-ДПМНЕ, имаме победа или мнозинство во 58 општини во Македонија, и конечно на крај да споменам дека идниот градоначалник нашиот главен град, Скопје, има предност од 3:1 во однос на неговиот противкандидат, 92-3 илјади наспроти 30 илјади. И убедлива победа за Советот на Град Скопје, но истовремено очекуваме после вториот круг бројката на гласови за Орце Ѓорѓиевски да биде околу 125-130 илјади“, нагласи Мицкоски.
Мицкоски додаде и дека ова е една од најточните и најпрецизни кампањи, со јасна порака, јасна визија и јасна дефиниција, што според него, ќе се постигне во годините кои следат.
,,Вие сте нашата инспирација, вие сте нашиот мотив, да продолжиме да се бориме, бидејќи вреди да се бори човек за секој еден кој што остана тука дома, да се бориме заедно за нашата татковина заедничка Македонија“, заклучи Мицкоски.

