Арбен Таравари, лидер на Алијансата за Албанците (АА), тврди дека со неговата партија како дел од власта, Македонија се движи напред и има подобра положба за само сто дена по влегувањето на неговите кадри во институциите. Фалејќи се, зборуваше за надминувањето на кризата, како и дека ја стабилизирале државата. Посочи дека влезот во Владата било во координација со меѓународниот фактор.

„Денес, стојам пред вас како претседател на АА за да рефлектирам за достигнувањата и предизвиците во овие први 100 дена. Пред 100 дена земјата беше парализирана, имавме глобална економска и енергетска криза, имавме домашна криза на корупција и на уставни измени. Соочени со оваа парализа, беше неопходно да дејствуваме. Во координација со меѓународните пријатели решивме да станеме дел од Владата. Беше тешка одлука, но тоа го направивме за да ја стабилизираме државата и да обезбедиме перспектива за граѓаните, кои масовно ја напуштаат државата. Ете, времето докажува дека сме биле во право. Нашето учество во власта има многу ограничувања, пред сè, временски. Неоспорно, денес Македонија е во многу подобра положба отколку пред 100 дена“, вели Таравари.

Таравари посочи дека неговите кадри изготвиле иницијатива за уставните измени, кои ќе одат во Собранието, па додаде: „Денес гордо можам да кажам дека Македонија се движи напред“.

„Верувам само во резултати, добиени преку примерно работење и владеење. Постојано барам од секој функционер од АА конкретни резултати и нулта толеранција за корупција затоа што ние сме различни и мора да ја зачуваме чистотата што не одликува. Наследивме ситуација во која само 2.7% од граѓаните веруваат во судството и обвинителството. Од почетокот на нашето владеење во министерството за правда преземавме силни мерки за враќање на довербата на граѓаните, во независноста и ефективното владеење на правото. Би ја издвоил подготовката на меѓународната конференција за изнаоѓање на најдобар модел за ветинг за правото. Го започнавме процесот за дигитализација на судството и обвинителството за да го замениме механизмот АКМИС кој овозможува манипулации во распределба на судските предмети. Наскоро ќе предадеме во владина процедура предлог закон за управување со одземен имот и ќе отвориме канцеларија за бесплатна правна помош низ целата држава. Посветени сме на враќање на универзитетот во Тетово во законски рамки со цел зголемување на квалитетот на високото образование“, додаде тој.

Тој зборуваше и за тоа што работи Министерството за правда.

„Втор столб на нашето делување е држава за сите. Во овие 100 дена работевме за правична и соодветна застапеност во сите области од јавниот живот и за елиминирање на сите форми на дискриминација. Преку Министерството за правда обезбедивме националност да фигурира како нова графа во матичните документи. Во Министерството за одбрана и Армијата значително ја подобривме положбата на Албанците со примањето на 45 албански кандидати за војници, унапредување на 25 албанци во подофицери и 3 други во командни позиции како и делегирање на 43 албанци во мировните мисии. Албанскиот јазик за прв пат е во официјална употреба во сите инстанци во ова министерство. Во МЗШВ имавме најголем буџет. За само 2 месеци над 60 милиони евра им се исплатени на 78 илјади земјодселци, овчари, градинари, продавачи на тутун.
Во наредните месеци ќе донесеме закон за правична застапеност со која ќе се дефинираат механизмите за остварување на пропорционални вработувања во јавниот сектор. Ова ќе важи за етничките заедници но и родовата застапеност и на лицата со посебни потреби. Испитот за административци нема да биде само на македонски јазик туку конечно 22 години по рамковниот договор ќе се оджи на мекдонскиот јазик“, додаде Тарвари.