Македонија
(Видео) Томовски: Кире Наумов од СДС за еден мандат зема 120.000 евра плата, а никој не знае што сработил
Додека народот гладува и семејство во кое двајца сопружници земаат минимална плата и со неа не може да ги обезбедат сите потребни продукти и да ги задоволат животните потреби за еден месец, функционери именувани од Владата земаат плати од неколку илјади евра месечно, а за еден мандат цифрите се движат и во неколку стотици илјади евра, обвини Ивица Томовски, член на Централниот комитет на ВМРО-ДПМНЕ.
„И, не е единствен проблем немаштијата во која живеат повеќето граѓани, туку и тоа што овие функционери со ништо не ги оправдале парите што ги земаат. Народот не гледа бенефит од нивната работа. Кире Наумов од СДС, директор на Македонската банка за обнова и развој, е уште еден во низата функционери дел од аферата ‘Паразити’. Наумов, кој беше дополнителен заменик-министер за финансии на СДС, денес месечно зема над 2.500 евра плата, за една година тој наплаќа над 30.000 евра, а за еден мандат дури 120.000 евра. Значи, додека Владата им зема оброк на студентите, Наумов заработува на грбот на државата 2.500 евра секој месец.
Директорот на АЕК, Јетон Акику, зема плата од 132.000 денари, поточно над 2.000 евра месечно или за една година околу 30.000 евра.
Уште еден во низата функционери со високи плати е и Славко Пројковски, финансиски директор во „Телеком“, каде што сопственост има и државата, е со плата од над 6.000 евра месечно. Тој за една година зема 72.000 евра, а за еден мандат од 4 години, дури 288.000 евра. Тоа е исто како директорот на „Телеком“, Љушев, кој за само еден месец зема 11.500 евра, тоа за една година се над 138.000 евра, а за еден четиригодишен мандат над 552.000 евра.
Овие тројца функционери, што ги презентиравме денес, за еден мандат земаат речиси 1 милион евра. Што сработиле овие тројца функционери и кој е бенефитот што го има државата од нивното работење за тие за еден мандат да наплатат 1 милион евра?“, праша Томовски.
Тој за утре најави продолжение на аферата „Паразити“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Минчев-Сулстром: Целта е да изградиме јавна администрација која е сервис на граѓаните, професионална, транспарентна и насочена кон резултати
Министерот за јавна администрација, Горан Минчев, денеска оствари протоколарна средба со амбасадорот на Кралството Шведска во Република Македонија, Ола Сулстром. На средбата, Минчев и Сулстром разговараа за можностите за продлабочување на соработката меѓу двете земји во областа на јавната администрација и зајакнувањето на институционалните капацитети.
Министерот изрази благодарност за континуираната поддршка на Кралството Шведска во реформските процеси и потенцира дека овие партнерства се од суштинско значење за унапредување на квалитетот на јавните услуги и институционалната ефикасност.
„Нашата цел е да изградиме јавна администрација која е сервис на граѓаните, професионална, транспарентна и насочена кон резултати. Поддршката од нашите меѓународни партнери, како што е Шведска, е од големо значење во овој процес на модернизација и институционална зрелост“ изјави Минчев.
На средбата беше изразена заедничка подготвеност за понатамошна соработка, размена на искуства и спроведување на заеднички проекти во областите на модернизација на јавниот сектор, управувањето со човечките ресурси, транспарентноста, отчетноста и примена на добри европски практики.
Министерството за јавна администрација, велат од таму, ќе продолжи активно да работи на воспоставување и јакнење на партнерства со земјите членки на Европската Унија, со цел приближување на стандардите и вредностите на европското управување.
Македонија
Општина Центар: Нови услуги за полесно паркирање
Во насока на подобро информирање на граѓаните и зголемување на достапноста на услугите, денес беше реализирана информативна акција во населбата Капиштец – пред Т.Ц. Беверли Хилс, на која на граѓаните им беа поделени информативни материјали и производи со цел подобро запознавање со новитетите во системот на ЈП Паркинзи на Општина Центар.
Граѓаните, како што посочуваат од општината, имаат можност да користат нови типови на паркинг-карти кои се достапни на веб-страницата www.poc.mk, како што се мулти-неделната карта и гостинските паркинг-карти, кои нудат поголема флексибилност и ефикасност при користење на паркинзите во општина Центар.
Мулти-неделната паркинг-карта се купува онлајн, без потреба од физичко присуство на шалтер. Оваа карта важи седум дена и овозможува паркирање на сите комерцијални паркиралишта од отворен тип во зона 1 и зона 2. Воведени се и гостински паркинг-карти, наменети исклучиво за жителите на општина Центар со активен кориснички договор. Тие им овозможуваат на жителите полесно да им обезбедат паркинг-место на своите гости. Овие карти важат и за комерцијалните и за резидентните отворени паркиралишта во секторот каде што живее корисникот.
Најновата услуга што ЈП ПОЦ ја воведе е онлајн плаќање со платежна картичка без потреба од најава, апликација или регистрација. На информативните табли на паркинзите е поставен QR-код и директен линк што води до страницата за плаќање, со што процесот е едноставен, брз и достапен за сите корисници.
На настанот присуствуваа градоначалникот на Општина Центар, Горан Герасимовски, и директорот на ЈП ПОЦ, Душко Коцевски, кои остварија средби со жителите и ги запознаа со новите услуги.
„Со воведувањето на новите типови паркинг-карти, како мулти-неделната и гостинската, овозможуваме граѓаните да имаат поголема контрола и удобност при користење на нашите паркинг-услуги. Целта ни е системот да биде практичен, дигитален и прилагоден на реалните потреби на жителите на Центар,“ изјави Душко Коцевски, директор на ЈП „Паркинзи на Општина Центар“.
„Како локална самоуправа, континуирано инвестираме во дигитални решенија кои им го олеснуваат секојдневието на граѓаните. Со новиот начин на онлајн плаќање и модернизацијата на паркинг-системот, правиме значаен чекор кон поквалитетни, побрзи и потранспарентни јавни услуги. Центар ќе продолжи да биде пример за општина што ги користи технологијата и иновациите во служба на граѓаните,“ изјави Горан Герасимовски, градоначалник на Општина Центар.
Македонија
(Видео) Митева: Стевчо Јакимовски и неговите пајташи од градежната мафија сакаат бетонизација на Влае, присвоиле и улица за висококатница
Стевчо Јакимовски и неговата градежна дружина сакаат бетонизација на Влае, присвоиле и улица за висококатница. Да ја потсетиме јавноста што се обидуваше Стевче да протурка овде во Влае, кажа денеска Maрија Митева, член на ИК на ВМРО-ДПМНЕ.
„Фирмата „Аполо Инженеринг“ преку процес на приватизација дооформиле парцела во Влае, во склоп на тоа и улица, каде претходно Стевчо Јакимовски уцртал маркица за зграда.
Во решението за приватизација пишува дека „Аполо Инженеринг“ доставиле два геодетски елаборати во пропратната документација за приватизација. Точниот датум кога се доставени елаборатите не е наведeн, но може да се види дека се изработени по донесување на Деталниот урбанистички план (ДУП). Едниот е изработен кон крајот на 2016 година, а другиот во 2017. Во оној од 2016 е наведено дека парцелите за кои се бара приватизација се дел од градежна парцела предвидена во планот, додека пак во оној од 2017 година се другите катастарски парцели кои ја сочинуваат градежната парцела.
Една од парцелите за кои „Аполо Инженеринг“ побарале приватизација е дел од улицата Есперанто овде пред Кино Влае“.
За приватизацијата „Аполо Инженеринг“ како што посочи Митева, платила само 285 денари за метар квадратен или, како што рече, нешто повеќе од 3.500 евра затоа што добила намалување на цената за 35%.
„Неколку месеци по приватизацијата компанијата го продала целото земјиште на Јонче Спирковски кој е сопственик на „Аполо Инженеринг“. Во купопродажниот договор наведено е дека имотот е продаден за цена од 2.950.000 денари со вклучен ДДВ.
ДУП-от за Влае иако беше укинат од Уставниот суд откако Стевче Јакимовски повторно дојде на местото градоначалник во 2021 година, тој го стави ДУП за Влае со две планирани висококатници повторно во процедура“.
Митева оценува дека Стевчо Јакимовски продолжува да ја турка бетонизацијата во Влае со сите сили. Затоа, како што нагласува, треба да се стави крај на ваквото делување, во недела на 2 ноември, со заокружување на бројот 9, за Сотир Лукровски.

