Македонија
(Видео) Трајчева го гони Рашковски и за ново кривично дело: Свесно употребил лажен доказ за кој знаел дека не е точен
Обвинителката Ивана Трајчева го гони ексгенералниот секретар Драги Рашковски и за ново дело – фалсификување исправа. Таа тврди дека тој свесно употребил лажен документ од банка за да докаже невиност во случајот „Софтвери“. Според обвинителката, Рашковски доставил картичка од банковна партија за лицето Љубен Милошоски за да прикаже одлив на средства од 620.033 денари и минусно салдо од 554.519 денари. Според Обвинителството, ова е невозможно бидејќи на сметката од Милошоски (роднина на семејството Рашковски) имало банкарски лимит на приближно 50.000 денари. Со документот од банка Рашковски правдаше потекло на парите на сметките од своите деца.
„Во делот меѓу другите докази предложени и изведени од страна на обвинетиот Драги Рашковски беше изведена и картичка од банковната партија за конкретното лице што го споменав (Љубен Милошоски) и на оваа банковна партија стоеше колкав е лимитот на лицето. И покрај лимитот, стоеше дека оди во многу поголем износ во минусно салдо, што едноставно не е возможно од причина што и сите знаете дека колку што е лимитот, толку може да се оди во минусно салдо. Со оглед што и самиот обвинет при изведувањето на доказите го потенцира овој дел, односно колку ова лице отишло во минусно салдо, за Обвинителството е неоспорно дека знаел што во суштина прави лажниот доказ. Кривичното дело што му се става на товар на обвинетиот е фалсификување исправа, но по самиот опис на дејствата произлегува дека обвинетиот Драги Рашковски свесно употребил лажен доказ за кој знаел дека не е точен, дека не е вистински, но свесно го употребил во текот на одбраната“, рече обвинителката Трајчева во изјава за „Макфакс“.
Адвокатот Владимир Доневски, бранител на Рашковски, бараше одлагање на расправата.
„Во однос на измените на обвинителниот акт, има повлекување дело. Ние ќе имаме потреба од одлагање на денешната главна расправа. Бидејќи има проширување, а одлагањето е потребно заради аргументирање и спротивставување на наводите на Обвинителството, да доставиме дополнителни докази, особено оригиналот на изводот од картичката. Предлагам судот ако има согласност на Обвинителството во овој дел да ја издвои постапката за обвинителниот предлог, а ако нема, и судот смета дека нема услови за тоа, да ни се даде рок за подготвување на одбраната“, рече адвокатот на Рашковски.
Се спротивстави обвинителката Трајчева на ваквиот предлог.
„Сметам дека не треба да се прифати предлогот за одвојување на постапката, а заради прибавување оригинален доказ, од причина што Обвинителството во доказната постапка достави оригинален доказ од НЛБ банка за лицето од кое беше употребена картичката за банковната партија и на таа картичка за банковната партија има потпис и печат на секоја нејзина страна, со што неоспорно се потврдува веродостојноста на доказот. Од друга страна, при образлагањето за обвинителниот предлог и на што тој се темели, доказите за овој обвинителен предлог се изведени во текот на постапката. Ниту Обвинителството не достави нови докази со поднесување на обвинителниот предлог. Ценам дека судот има доволно докази врз основа на кои може да ја утврди фактичката состојба во предметот. Се противам на одбраната да ѝ биде дадено дополнително време за спремање на одбраната од причина што, во согласност со утврдената динамика, на следното рочиште само Јавното обвинителство ќе дава завршни зборови, па дури потоа е планирано да се почне со завршни зборови за одбраната. Имајќи го предвид временскиот рок, како и фактот дека сите докази се изведени, меѓу кои и доказите на обвинетиот Рашковски, одбраната има време за завршни зборови на рочиштето за кое беше планирано“, врати Трајчева.
Судијката Фанка Јанчулева-Михаиловска не го прифати предлогот за раздвојување на постапката и рече: „Специфична ситуација е дека делото е сторено во текот на главната расправа. Тоа се содржи во списите на предметот“.
Трајчева на рочиштето направи и измена на обвинителниот акт.
Прашана од „Макфакс“ дали со измените му се олеснува положбата и дали може да добие поблага казна, Трајчева одговори: „За казната јас не би можела да кажам бидејќи тоа е одлука на судот дали ќе има осудителна или ослободителна пресуда и доколку има осудителна, колкава би била казната. Но, има само намалување во поглед на износот на паричните средства и временскиот период со оглед да финансиската состојба на обвинетиот Драги Рашковски беше испитувана од страна на Обвинителството за целиот временски период додека бил генерален секретар, а потоа советник. Со оглед на тоа што не се отвори точно од кое кривично дело потекнуваат парите од 2017 година до првата уплата од предметните јавни набавки, а притоа од сите податоци, односно докази што се набавени не произлегува дека можел да ги стекне на легален начин овие парични средства, од тие причини денеска јас како обвинител што постапува по предметот направив измена, го намалив временскиот период и го намалив износот на паричните средства, но истото кривично дело му останува. Но, за периодот од 2017 до првата уплата од парите од јавните набавки за овој временски период сосе доказите во согласност со склучениот меморандум помеѓу ДКСК и Јавното обвинителство на Република Северна Македонија, Обвинителството испрати известување со прилог документација како надлежна институција до комисијата за да го испита овој временски период, односно дали овие парични средства имаат легално потекло или не бидејќи, според Обвинителството, немаат легално потекло“, рече обвинителката Трајчева.
Следното рочиште е закажано за 12 мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.
Македонија
(Видео) Битиќи: Над 75% од граѓаните се за членство во ЕУ, власта да каже која е алтернативата
Во сите анкети над 75% од граѓаните велат дека се за членство во ЕУ. Политичарите имаат обврска да носат одлуки, за да одговорат на нивното очекување. Владата треба да каже кој е нивниот план. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, рече пратеникот на СДСМ, Фатмир Битиќи во одговор на новинарско прашање.
На власта беше да ги подобри условите како што ветуваше, додаде тој.
-И сегашната партија ВМРО-ДПМНЕ нема добиено повеќе од 25% од вкупниот број граѓани на изборите Легитимитетот на изборите не мора да значи дека се носат добри одлуки. Но и да прифатиме дека е тоа така, нивно беше да ги сменат условите. Да го сменат и Францускиот предлог, да ја сменат и преговарачката рамка, и да го вратат името. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, додаде Битиќи.
Која е алтернативата? Власта треба да каже како понатаму после одвојувањето на европскиот пат, рече Битиќи.
-Наредната недела изминуваат 100-те дена и убаво на следните пратенички прашања Владата да дојде со план каде ќе се движи Македонија во наредните години, кога е очигледно одвојувањето на европскиот пат од другите земји.