Македонија
(Видео) Царовска: Креираме концепт за дуално образование приспособен на локални услови

Заменик-претседателка на Владата задолжена за економски прашања, Мила Царовска, заменик-министерка за образование и наука, Елизабета Наумовска, и директорот на Делегацијата на германското стопанство, Патрик Мартенс, го посетија Општинскиот електромашински центар „Св. Наум Охридски“ во Охрид, едно од техничките училишта во кои се спроведува проектот за дуално образование на Делегацијата на германското стопанство.
Царовска посочи дека Владата и Министерството за образование се посветени на креирање соодветен систем на дуално и стручно образование, со кое би се продуцирале квалитетни и добро обучени кадри, особено од техничките струки, за задоволување на понудата и побарувачката на пазарот на трудот.
„Еден од најголемите предизвици за економски раст и развој на Северна Македонија е наоѓање соодветен и добро обучен кадар за реалните потреби на стопанството. Во моментот спроведуваме проект за финансирање на техничкото образование, а тенденција е да креираме квалитетен систем на дуално образование во согласност со реалните состојби и потреби на македонското стопанство. Би сакале до почетокот на новата учебна година да креираме систем кој би го имплементирале на територијата на целата држава и со кој би се создавале добро образовани и стручни кадри за потребите на индустријата“, нагласи вицепремиерката Царовска.
Заменик-министерка за образование и наука, Елизабета Наумовска, посочи дека Министерството веќе спроведува проект за развој на вештини и поддршка на иновации (SDIS), кој се спроведува во соработка со Светската банка, а со кој се овозможува набавка на опрема за спроведување техничко образование.
„Преку овој проект се набавува техничка опрема за спроведување практична настава за потребите на училиштата во вредност од 20 до 30 илјади евра за секое стручно училиште, а вкупната вредност на проектот е околу 6 милиони евра. Во изминатите 2 години многу повеќе е инвестирано во средното образование отколку во претходните 10 години“, нагласи Наумовска.
Директорот на Делегацијата на германското стопанство, Патрик Мартенс, која го спроведува проектот за дуално овразование, посочи дека е важно Владата заедно со локалната власт и приватниот сектор да работи и на креирање систем, но и набавка на соодветна опрема за спроведување практична настава за учениците во средните стручни училишта.
„Пред 2 години почнавме со проектот во Охрид и Кавадарци, со 4 вклучени компании, а денес проектот се спроведува во 5 града и 10 вклучени компании. Ме радува што е подигната свеста кај родителите, кои го прифаќаат дуалното образование како добра опција и навистина е така затоа што преку овој тип на образование учениците ги добиваат потребните вештини и знаења за професии побарувани од пазарот на трудот, како што се мехатроничар, машински техничар и други технички професии“, рече директорот на Делегацијата на германското стопанство, Мартенс.
За време на посетата се одржа средба со директорите на компаниите „ОДВ електик“, „ЛТХ леарница“ и „Костал“, како и со претставници на локалната самоуправа и наставници што спроведуваат пракса, на која имаше дискусија за можностите и предизвиците на дуалното образование.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорѓиевски : Љубљана ќе биде град-партнер за развојот на Скопје

Остваривме извонредна и пријателска средба со долгогодишниот градоначалник на Љубљана, господинот Зоран Јанковиќ, објави актуелниот градоначалник на Општина Кисела Вода и кандидат за градоначалник на Скопје, Орце Ѓорѓиевски.
Средбата, додава тој, поминала во пријателска атмосфера, при што биле разменети значајни искуства и визии за идната соработка помеѓу Скопје и Љубљана.
„Добив драгоцени совети и поддршка од градоначалникот Јанковиќ, со јасна определба Љубљана да биде град-партнер и вистински пример за развојот и модернизацијата на Скопје.
Посебен акцент ставивме на најголемите предизвици со кои се соочува нашиот град – јавниот превоз и чистотата.
Градоначалникот Јанковиќ ни даде ветување дека експертски тимови од Љубљана ќе бидат континуирана поддршка за Скопје, но не само во овие сфери, туку и во секоја област во која ќе побараме помош.
Договоривме интензивна соработка и зајакнување на капацитетите на градот Скопје во насока на креирање, планирање и спроведување европски проекти.
Верувам дека преку ова партнерство ќе изградиме поефикасен и поевропски град Скопје, достоен за своите граѓани.
Со задоволство го потврдивме статусот на побратимени градови и во таа насока упатив срдечна покана до господинот Јанковиќ за негова официјална посета на Скопје, град кој сака да учи од најдобрите“, вели Ѓорѓиевски.
Македонија
Божиновска: Секој рудар мора да се врати дома безбеден и горд, инспекциите се засилени, а казните построги од кога било

Министерката за енергетика, рударство и минерални суровини Сања Божиновска денеска по повод Денот на рударите присуствуваше на свечената манифестација во РЕК Битола, заедно со претседателот на Владата, Христијан Мицкоски, и раководството на АД ЕСМ. Настанот беше можност да се оддаде почит кон рударите и да се нагласи нивното значење за економијата на државата.
Во своето обраќање, Божиновска истакна дека рударите се економски столб кои секојдневно се соочуваат со предизвици за да обезбедат стабилност и иднина за државата.
„Секојдневна битка со длабочината и темнината за ресурси кои ја движат економијата. Наша цел е секој рудар да се враќа дома безбеден и горд. Министерството стои цврсто зад секој рудар – со современа опрема, безбедни услови за работа и фер стандарди за сите,“ порача министерката.
Таа испрати и јасна порака кон компаниите што работат во секторот:
„За оние што вложуваат во безбедноста на рударите и заштитата на животната средина, поддршката е целосна. Но за оние што мислат дека можат да ја заобиколат законската регулатива – нема компромиси. Инспекциите се засилени, контролите се редовни, а казните построги од кога било. Законот важи за сите – без исклучок“, нагласи Божиновска.
Македонија
Шаќири: Албанците во Македонија се одлучувачки и државотворен фактор

Албанците во Северна Македонија се одлучувачки и државотворен фактор, и затоа оваа улога мора да се гарантира и почитува во секоја институција и на секое ниво на одлучување, велат од Алијанса за Албанците.
„Нашата политичка платформа се раководи од три основни принципи: Традиција, Одговорност и Развој. Овие принципи се столбовите врз кои го градиме нашиот визион за функционална, ефикасна и правична држава, каде Албанците и Македонците заедно ја градат подобрата иднина.
Убедени сме дека дојде време за нов политички договор меѓу Македонците и Албанците, кој ќе се темели врз реална еднаквост, заемна почит и стратешко партнерство. Само така може да се изгради стабилно општество и модерна, европска држава еднаква за сите“.
Алијанса за Албанците, како што нагласи Њомза Шаќири, портпарол на партијата, е политичка сила, позиционирана десно од центарот, која го брани албанскиот идентитет, јазикот и националните традиции, промовирајќи како што велат, истовремено индивидуална слобода, приватна сопственост, пазарна економија и одржлив развој.
„Наш приоритет е локалниот економски развој и зајакнување на општините преку реална децентрализација. Поддршката за младите, семејствата и локалните бизниси е во центарот на нашето политичко ангажирање, бидејќи само така се гарантира еднаков развој и долгорочна стабилност.
Ќе се залагаме за активна вклученост на граѓаните во одлучувањето и за тесна соработка со албанската дијаспора, која останува драгоцено национално и економско богатство“.
Според неа, Алијанса за Албанците, е решена да биде гласот на вистинската еднаквост и гарант на албанскиот национален интерес.
„Со нашата платформа и со нов договор меѓу Македонците и Албанците, ја отвораме патеката кон еднаква, функционална и европска држава“.