Македонија
(Видео) Цветаноски: Градоначалникот на Радовиш ги остави децата без негувателки и врши притисок врз вработените
Повеќе од 10 дена децата во детската градинка „Ацо Караманов“ во Радовиш се оставени без негувателска грижа поради неспособноста на локалната власт на ВМРО-ДПМНЕ и градоначалничкот Ацо Ристов, рече на денешната прес- конференција Симона Цветаноски, советничка од редовите на СДСМ во Советот на Општина Радовиш.
„Јас во моментот се наоѓам пред детската градинка, објект ‘Цветови’, каде што во неа повеќе од еден дена децата се оставени без негувателска грижа, пред сѐ, најмалите деца, а тоа се јаслите. Родителите збунето и без никаква информација дадена од надлежните не знаат кој им ги згрижува децата, а ниту, пак, се запознаени дека децата на овие минусни температури се преместуваат од една во друга зграда, без никаква согласност од нивните родители. Претставниците на локалната власт, наместо да ги вратат вработените што се дома, тие се занимаваат со смени на раководни лица, кои насилно бараат од нив со писмена изјава да си дадат оставки, без притоа да бидат свесни дека овие раководни лица се со законски предвиден мандат. Потребно е сите негувателки што седат дома да се повикаат да продолжат со работата како би продолжило редовното и нормално работење во детските градинки. Потребно е ветувањето, што беше дадено од страна на градоначалникот на една од претходните седници на Советот, каде што вети дека сите негувателки што се дома ќе почнат со работа од 1.2.2022 година. Денеска сме 2.2.2022 година, сѐ уште не се повикани“, изјави Цветаноски.
ВМРО-ДПМНЕ и Ацо Ристов за 100 дена од нивното раководење сѐ уште немаат почнато, а ниту, пак, реализирано ниту еден проект од програмата што беше ветена пред граѓаните. За разлика од тоа, СДСМ за оваа ситуација до крај ќе се залага бидејќи е партија што е избрана од граѓаните и сме должни нивните проблеми да бидат решени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЗНАМ ги соопшти кандидатите за министри во новата влада
Игор Филков, роден во 1979 година, е кандидат на Движењето ЗНАМ – За наша Македонија за министер за правда, а Горан Минчев (1972) е кандидат за министер за администрација.
Имињата за членови на новата влада од партијата на Максим Димитриевски беа утврдени на седница на партискиот Централен одбор вечерва, а потоа на прес-конференција ги соопшти Никола Мемов, портпарол на ЗНАМ.
Од ЗНАМ дополнително ќе ги соопштат имињата на замениците министри и на директорите кои им се доделени во коалициските договори.
Македонија
Таравари-Пападополу: Спроведувањето на договорите кои се веќе усвоени, треба да биде задолжително иако и во двете земји има одредени кругови кои не се согласуваат
Претседателот на Алијснса за Албанците, Арбен Таравари, заедно со пратениците Халил Снопче и Мимоза Муса остварија средба со заменик министерката за надворешни работи на Република Грција, Александра Пападополу, и амбасадорката на Република Грција, нејзината екселенција Софија Филипиду.
На средбата, страните се согласија за важноста на имплементацијата на меѓународни договори кои веќе се усвоени, и покрај тоа што во двете земји има одредени кругови кои не се согласуваат со тие договори, нивното спроведување треба да биде задолжително.
Таравари нагласи дека Северна Македонија нема друга алтернатива освен влез во ЕУ, а новата влада максимално ќе се посвети на европскиот пат и на зајакнување на односите со Република Грција, како мошне важен партнер на Северна Македонија.
Македонија
Гаши оствари средба со Пападополу: Северна Македонија има искрен пријател во Грција
Претседателот на Собранието на Република Северна Македонија, Африм Гаши, се сретна со заменик-министерката за надворешни работи на Република Грција Aлександра Пападополу, со која разменија мислења за јакнење на соработката и дијалогот меѓу двете земји на сите полиња, како и за понатамошниот процес на пристапување на земјава во Европската Унија.
Тој се заблагодари за поддршката од Грција за процесот на евроинтеграција на земјава, по зачленувањето во НАТО, што е резултат, како што рече, на постигнувањето на Преспанскиот договор.
Заменик-министерката на грчкото МНР му го честиташе на претседателот Гаши изборот на функцијата, при што порача дека Северна Македонија има искрен пријател во Грција. Тоа, рече Пападопулу, е пораката што ви ја носам од целото лидерство на Грција – дека ние сме пријатели, соседи, сојузници, партнери во НАТО, а еден ден ќе бидеме и партнери и во ЕУ.
Претседателот Гаши заклучи дека двете земји се на мошне добар пат во унапредувањето на билатералните односи, со оглед на интензивната соработка и комуникација меѓу граѓаните, во делот на економијата и туризмот,со потенцијали за интензивирање во патната инфраструктура, енергетиката, образованието, културата и во сите други области од заеднички интерес.
Соговорниците се осврнаа и на соработката на ниво на парламенти, при што претседателот Гаши покажа интерес за организирање официјални посети и истовремено ја информира заменик-министерката Пападопулу дека во Собранието на РСМ во секој нов мандат се формираат пратенички групи за соработка меѓу двете земји.