Македонија
(Видео) Чулев: МВР на Спасовски извршило неправилен избор, „Индустри сервис“ има неправилно пополнета спецификација

И денес продолжуваме со објавување докази за милионски тендер преку кој се исцрпуваат средства од буџетот на Министерството за внатрешни работи за набавка на храна за компанијата „Индустри сервис“. Компанија блиска до Оливер Спасовски, кој, наместо да обезбеди соодветно услови за работа на полициските службеници, спроведува сомнителни тендери фаворизирајќи една компанија, изјави Наќе Чулев од ВМРО-ДПМНЕ.
„Станува збор за процес за спроведување јавна набавка, спроведен на чуден и крајно сомнителен начин. Имено, ‘Индустри сервис’ понудила производи од производители што ги нема на пазарот ниту по грамови ниту по асортиман. Наместо фотографии и примероци од производители, ‘Индустри сервис’ доставувале изјави од производители дека може да произведат производи што ги немаат во нивната палета на производи на пазарот. Но, притоа нема доказ дали тие ќе бидат доставени во фаза на реализација на набавката во согласност со потребите на договорниот орган или за нив ќе се користи замена, односно истите производи што ги доставиле фирмите конкуренти и за што биле исклучени во евалуација.
Комисијата на Министерството за внатрешни работи уште во првата фаза на одлучување покажала пристрасност кон „Индустри сервис“. Економските оператори, конкуренти на „Индустри сервис“, биле исклучувани поради неусогласеност во делот на личните податоци за вработените при разните потврди, како дипломи, уверенија и лични документи, односно тие биле отфрлани на овој начин. За ова Државната комисија утврдила пропусти и враќала кај МВР на повторно постапување поради неправилна евалуација. Но, пристрасноста не завршила тука.
Тој додаде дека во конечното решение „Индустри сервис“ не е правилно избрана, има неправилно пополнета техничка спецификација, каде што наведуваат увозници наместо производители и ова им било укажано во жалбите што се поднесени од другите понудувачи.
„Ваквиот начин на спроведување на јавната набавка отвора сомнеж дека во текот на целата постапка од страна МВР и на Оливер Спасовски се фаворизира компанијата ‘Индустри сервис’, а на целиот процес уште поголема дамка фрла фактот што самиот Оливер Спасовски бил на камен-темелникот на фабриката на „Индустри сервис“, каде што е фотографиран со нејзиниот сопственик.
Се поставува прашањето дали блискоста со Спасовски помогнала „Индустри сервис“ да биде добитник на двата тендери од над 13 милиони евра? Дали другите економски оператори се шиканирани во постапката поради блискоста на министерот за внатрешни работи со сопственикот на „Индустри сервис“?
Почитувани, индициите и сомневањата изнесени на досегашните прес конференции отвораат и простор за надлежните институции да постапат и да утврдат кршење на законите, кои се направени од страна на комисијата и одговорните лица во МВР“, порача Чулев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.