Како пратеници, како парламентарно мнозинство, велиме „не“ за дискриминацијата. Цврсто сме посветени на градењето едно општество за сите, без поделби, без дискирминација, еднакво општество на еднакви граѓани со еднакви можности. Во таа насока, законот за спречување и заштита од дискриминација ќе биде изгласан во Собранието до средината на март, порача пратеничката од СДСМ, Јагода Шахпаска.

„Претходно, Комисијата за труд и социјална политика во Собранието ќе заседава и ќе ги заврши сите свои обврски поврзани со овој закон. Со измените првпат како основи за дискриминација се воведуваат сексуалната ориентација и родовиот идентитет. Се додава и нов облик на дискриминација, со кој треба да се справуваме, а тоа е сегрегацијата“, рече Шахпаска.

Таа нагласи дека измените ќе ѝ ги прошират надлежностите на Комисијата за спречување и заштита од дискриминација во насока на превенција.
Новиот закон, како што истакна таа, предвидува јасни критериуми за избор на членови на Комисијата, кои ќе добијат статус на функционери со цел да се професионализира Комисијата.

„Истовремено, од судски трошоци се ослободуваат лицата што ќе поведат судска постапка за заштита од дискриминација, а се зголемува и износот на прекршочните одредби за правни и физички лица за кои ќе се докаже дека сториле дискриминација.

Здруженијата на граѓани и неформалните групи, кои имаат оправдан интерес за заштита на одредена група или се занимаваат со заштита од дискриминација, ќе може да поднесат тужба ако со постапувањето на тужениот се дискриминирани поголем број лица.

Мораме да дадеме приоритет на заштитата на правата и слободите на граѓаните и на борбата за еднакви можности во ова наше заедничко општество. Очекуваме поддршка од сите пратеници, без разлика на партиската определба.

Продолжуваме заедно со граѓаните, со институциите, да градиме систем што ќе заштитува од секаков вид дискриминација“, додаде Шахпаска.