Македонија
(Видео) Шекеринска-Трента: Имаме заедничка иднина во евро-атлантската заедница, напредокот на Македонија е видлив

„Италија е убедена дека нашата заедничка иднина е во евро-атлантската заедница, а тоа значи припаѓање кон заедничките вредности, принципи на демократија, владеење на правото, солидарност кон заедничките предизвици што се пред нас. Напредокот на Македонија е голем, тоа е напредок кон ЕУ и НАТО и во областа на внатрешните реформи и добрососедските односи“, рече министерката за одбрана на Италија, Елизабета Трента, која престојува во официјална посета на Република Македонија.
Посетата на Македонија рече дека е сигнал оти земјата е во еден многу посебен сензитивен момент. Трента порача дека клучниот референдум ќе одлучи за најбитното нешто, т.е. иднината во евро-атлантската заедница, кон која македонскиот народ има позитивен став.
По средбата во Министерството за одбрана, министерката Шекеринска се заблагодари за континуираната, искрена и многу јасна италијанската поддршка, особено во важни моменти кои ја обликуваат иднината на Македонија, но и на Балканот.
„Македонија на самитот на НАТО почувствува што значи најмоќните земји на светот и со дело и со збор да покажат дека навистина ги ценат сите наши напори, посветеноста оваа земја не само да ја ослободиме од изолација, од страв, од бесперспективност, туку и да поставиме нови стандарди за тоа што значат добрососедство, соработка, владеење на правото, реформи, заеднички успех и напредок на целиот регион. Сега сме поблиску до алијансата од кога било порано, сега успеавме во напорите што во 2008 година не вродија со плод“, рече Шекеринска.
Министерката потенцира дека зборовите на поддршка од Италија за сè она што сите граѓани на Македонија здружено и сплотено успеаја да го направат за еден релативно кус период значат многу и дека она што беше направено за враќање на земјата на патот кон НАТО и ЕУ, сите внатрешни реформи, треба да се потврди на референдумот на 30 септември.
„Ги вративме демократијата и правната држава, ги ослободивме медиумите, отворивме и обезбедивме дебата во јавноста, а патот кон просперитетна држава треба да го потврдиме и запечатиме на 30 септември. Убедена сум дека граѓаните на Македонија на овој клучен датум за иднината на земјата ќе одлучат да бидеме безбедна, сигурна и просперитетна држава интегрирана во двата најмоќни сојуза на денешницата“, потенцира министерката Шекеринска.
Министерката Трента додаде дека Армијата на Република Македонија може да се потпре на италијанските вооружени сили како на партнер кој е секогаш расположен за поддршка во процесот на трансформација и модернизација во согласност со стратешкиот одбранбен преглед.
Двете министерки се согласија дека Македонија и Италија имаат одлична билатерална одбранбена соработка, која се гледа и преку фактот дека Македонија ќе испрати двајца штабни офицери во рамките на италијанскиот контингент во мисијата на ООН во Либан – УНИФИЛ. Со тоа се потврдува дека сојузниците ја гледаат Армијата на Република Македонија како армија која е целосно интероперабилна со другите земји членки на НАТО.
Во рамките на посетата на Македонија, министерката Трента заедно со министерката Шекеринска ја посети црквата „Св. Спас“, како и Старата скопска чаршија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.