Македонија
(Видео) Шкријељ: ВМРО-ДПМНЕ не чувствува одговорност за граѓаните и за државата
Не чувствувате одговорност дека вие со вашето однесување и со вашата реторика како партија придонесувате вашето членство, 62 проценти од вашите поддржувачи, идентично, што сигурно не е случајно, како и поддржувачите на Левица, да се тие кои не мислат дека за земјата е добро да биде членка на ЕУ, не чувствувате одговорност дека вие со вашето однесување и со вашата реторика ја буткате земјата кон некои други сојузи, запраша од собраниската говорница, пратеничката на СДСМ Санела Шкријељ, при реплика на пратеникот на ВМРО-ДПМНЕ Тони Јаревски.
Шкријељ нагласи дека пратениците на ВМРО-ДПМНЕ исто така седат заедно во Собранието, иста плата земаат со пратениците од владеачкото мнзинство, за да се носат мерки кои се во интерес на граѓаните.
„Не чувствувате одговорност за тоа што не гласавте за кривичниот законик, што не гласавте за стратегијата за родова еднаквост, тоа што не гласавте за измените во законот за социјална заштита, што значеше дополнителна финансиска помош за ранливите, тоа што 2020 година не гласавте за младински додаток, а сте полни со реторика за иселувањето, тоа што се обидовте во време на најголема пандемија да го спречите носењето на мерките. Сериозно не чувствувате одговорност“, ги запраша Шкријељ, пратениците од ВМРО-ДПМНЕ.
Таа одговори и на повикот на ВМРО-ДПМНЕ, пратениците од владеачката коалиција да и свртат грб на Владата.
„Никогаш нема да го свртам грбот на оваа политика која значи подеднаква грижа за сите граѓани и на онаа политика која мене како Санела Шкријељ не ме третира како бројка за правење етнички баланс или дисбаланс, реторика којашто вие ја промовирате, туку вас ве повикувам да му го свртите грбот на оној што знам дека и самите не го сметате за претседател, да ги напуштите неговите штетни политики и да почнете да работите за доброто на земјата“, порача Шкријељ од собраниската говорница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.