Македонија
(Видео) Јакимовски: Чувствува ли власта одговорност за хаосот во Скопје
Градоначалникот на Општина Карпош, Стевчо Јакимовски, реагира на нефункционалноста на државниот систем, укажувајќи на сериозните проблеми со кои се соочува локалната самоуправа во обезбедување на основни услуги за граѓаните.
„Морам да ја информирам јавноста за големите потешкотии со кои секојдневно се соочуваме во Карпош, како резултат на нефункционалниот државен апарат. Имаме апсурдна ситуација, од две градинки да правиме една, бидејќи нема персонал. И покрај тоа што градинките ни се полни, родителите ако сакаат да плаќаат, ние да сакаме да вработим, не можеме. Веќе една година Владата не успева да реши основно прашање: издавање лиценци за негувателки и воспитувачки. Без лиценци – нема вработувања, иако парите се предвидени во државниот буџет“, посочи Јакимовски.
Тој истакна дека во градинката „Орце Николов“ минатата година заминале осум вработени: негувателки, воспитувачки и технички персонал и за ниту едно место не е добиено одобрение за вработување. Слична е состојбата и во градинките „Распеана младост“ и „Пролет“, каде во пензија заминале повеќе негувателки и воспитувачки, но за ниту едно место нема добиено дозвола за нови вработувања.
„Министерството за финансии на 3 декември ни одобри пет вработувања со важност до 31 декември, а Министерството за труд и социјална политика ни ги достави одобренијата дури на 3 февруари. Ете така функционира системот во кој живееме, нефункционален и партизиран. Истите барања повторно ги поднесовме, пак сме одбиени, иако средствата се веќе одобрени во буџетот на државата“, нагласи градоначалникот на Карпош.
Јакимовски исто така реагира на одлуката на Министерството за образование да ѝ одземе на општината 16 милиони денари за образованието, како и на фактот дека Министерството за транспорт и врски ги држи заглавени три важни урбанистички планови.
„Немаат одобрување, сè стои“, додаде тој.
Особено загрижувачки, како шрто рече, е барањето на Министерството за внатрешни работи, кое доставило допис до Општина Карпош да достави цела легализациска документација за објектите на потегот од „АБЦ“ клубот до раскрсницата со булеварот „8-ми Септември“.
„Јавно го прашувам министерот, дали вакво писмо сте испратиле и до Чаир? Или можеби до Аеродром?“, праша Јакимовски.
Тој укажа и на апсурдната ситуација што на седница на Генералниот секретаријат на Владата, како точка на дневен ред, се разгледува предлог-одземање на спортската сала „Партизан 4“ од локалната самоуправа на Карпош, иако општината вложила средства во нејзиното одржување.
„Прво ни ги земаа бараките, сега сакаат и спортската сала. Во Карпош не дозволуваат да се вработи ниту еден човек во градинките, каде имаме зголемен наталитет. Додека ние се бориме за подобри услови, централната власт не прави ништо“, рече Јакимовски.
Тој заклучи дека државата не може да ја водат луѓе кои создаваат проблеми наместо решенија. „Имаме нефункционален систем кој ја разединува државата. Никакви реформи нема, особено во урбанизмот. Целата ‘реформа’ се сведува на тоа да се оневозможи граѓаните да знаат дека нивниот сосед гради“, порача Јакимовски.
Градоначалникот на Карпош предупреди и за проблемите со инклузијата во образованието: „Можно ли е во едно училиште да имаме 25 деца со лесни, умерени и тешки пречки во развојот, плус деца што не се категоризирани, а да нема дефектолог?“.
Јакимовски упати прашања до централната власт: „Чувствува ли одговорност за состојбата во град Скопје? За хаосот во јавниот превоз? За полните контејнери и нехигиената? Оваа власт нема појма како се води држава. Таму каде што поднесуваме жалби, чекаме одговори со месеци. Јас ова го зборувам затоа што во мој Карпош, никој не чека за услуга од општината“, истакна Јакимовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Претседателката на ЛДП, Моника Зајкова, со поддршка на Горан Герасимовски за втор градоначалнички мандат
Претседателката на ЛДП Моника Зајкова, денеска даде поддршка за втор градоначалнички мандат на Горан Герасимовски, којшто воедно е и актуелен градоначалник на Општина Центар.
Таа, потенцира дека сега е моментот да се изберат резултати, одговорност и отчетност, а не празни ветувања, токму затоа ја дава поддршката на Горан Герасимовски, кој, според Зајкова, ја препознава граѓанската визија, има искуство и е подготвен да работи посветено за доброто на заедницата.
„Одејќи накај Собрание (бидејќи работиме на новиот Предлог- закон за комунална полиција), наидов на предизборните активности на кандидатот за градоначалник на општината во која живеам. Водејќи се од визијата дека на граѓаните им се потребни искусни луѓе кои испорачуваат резултати, а не изговори, упатувам особен повик до сите граѓани кои во првиот круг гласаа за кандидати кои не влегоа во вториот круг: Поддржете кандидат кој ги разбира вашите потреби, кој со своето искуство и посветеност ќе испорача повеќе резултати и веднаш ќе започне со работа – со завршување на започнатите проекти и реализација на нови решенија во интерес на сите нас. Затоа давам поддршка за луѓе како Горан – кои ја препознаваат граѓанската визија, имаат искуство и се подготвени да работат посветено за доброто на заедницата. Сега е моментот да избереме резултати, одговорност и отчетност, а не празни ветувања“, напиша Зајкова, на својата објава на Фејсбук.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла

