Македонија
(Видео) Ќе го блокираат патот кон Бугарија оти државата им го пресече локалниот пат до село Страцин

Жителите на кратовското село Страцин се заканија дека ќе го блокираат патот кон Бугарија преку Крива Паланка оти државата им го пресече локалниот пат што нивното село го поврзува со Ранковце. Јавното претпријатие за државни патишта го пресекло локалниот пат како дел од градежните активности за изградба на експресниот пат Ранковце – Крива Паланка.
Жителите бараат да се најде алтернатива на локалниот пат со која ќе бидат поврзани сите куќи од селото за да може непречено да си ги завршуваат вообичаените обврски.
„Ни го пресекоа патот и сега овците, за да ги префрлам од едната на другата страна, морам да ги пуштам преку патот што води за Бугарија. Имам 200 овци и секој ден по двапати треба да го поминуваат патот. Исто и за тракторите. Ни стојат во селото, а за да ги однесеме на нивите, мора да поминеме по истиот автопат. Досега си го користевме локалниот пат и за Ранковце, ама дојдоа, ставија знаци и нè отсекоа“, се жалат жителите.
Тие денес се собраа на местото на кое е пресечен патот и на градоначалниците на Кратово и на Ранковце, Тодорче Николовски и Борче Спасовски, им покажаа дека немаат друг начин, освен со стоката и тракторите да минуваат по патот за Бугарија. Добија ветувања дека ќе се бара ново решение во соработка со Јавното претпријатие за државни патишта (ЈПДП).
Од Јавното претпријатие потврдија дека локалниот пат е пресечен, но дале налог веднаш да се овозможи сообраќај по него.
„ЈПДП до денеска нема добиено претставка од месното население за овој проблем, но и дека надзорот над работите веќе остварил средба со градоначалникот на Кратово и со претставник на месното население, при што известиле за настанатиот проблем. Во моментот изведувачот со двата крака на клучка ‘Чатал’ го има пресечено стариот пат по кој се одвивал запрежниот сообраќај. На изведувачот му е даден налог веднаш да овозможи сообраќај по стариот – некатегоризиран пат и да изготви девијација на местата на кои има направено прекин. Исто така, надзорот и изведувачот веќе се на терен на предметната локација, со цел да добијат поцелосна слика за моментната состојба и да организираат побрзо оспособување на патот, како и да се изврши процена на самото место за можност трајно решение на проблемот“, велат од Јавното претпријатие за државни патишта за „Макфакс“.
Изведувач на патот е австриската компанија „Страбаг“, а надзор е „Диви Македонија“ заедно со „Евроконсалтинг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вреди“ бара истрага за намерна манипулација со бројот на Aлбанците на пописот

Од „Вреди“, известуваат дека ќе поднесат кривична пријава до Основното јавно обвинителство – Скопје против поранешното раководство на Државниот завод за статистика, други одговорни и раководни лица во врвот на поранешната Влада на ДУИ и СДСМ, како и други лица со моќ на договарање во тогашната политичката власт во врска со пописот на населението.
Причина за пријавата, како што појаснуваат е сериозниот сомнеж за политичко договарање и следствено на тоа, фалсификување на резултатите од Пописот во 2021 година. Од „Вреди“ се сомневаат дека е извршено кривично дело Злоупотреба на службена положба и овластување (чл. 353 од Кривичен Законик).
„Последиците од овој чин се далекусежни: драстично и свесно е намален бројот на прикажаните Албанци во многу села, населени места и градови низ државата. Со тоа Албанците лично и поединечно губат многу права (гарантирани со Уставот) како вработувања, политичка застапеност и јазична еднаквост. Но и институциите се доведени во ситуација да олучуваат за намена на средства и фондови по погрешни и намалени бројки, со што повторно се оштетени граѓаните во многу општини“.
Бараат Јавното Обвинителство да ги испита овие наводи.
„Дополнително, овие денови високи функционери на ДУИ јавно признаа дека „пописот бил во рамки на договореното“, што уште повеќе го поткрепува сомнежот за политичка режија на целата операција“.
Од „Вреди“ велат дека ја преземаат ваквата иницијатива во одбрана на законитоста, еднаквоста и реалната статистичка слика на државата. Очекуваат ОЈО итно да отвори предмет, да ги обезбеди сите материјални докази и да спроведе темелна истрага.
„Нема компромис кога се повредува достоинството и бројноста на нашата заедница. Борбата за вистината започнува сега и ќе ја истуркаме до крај, во интерес на сите граѓани на Република Северна Македонија“.
Македонија
Поради сообраќајна несреќа, во прекин сообраќајот кај село Луково

Од 12:42 часот, сообраќајот на патниот правец Струга – Дебар кај с.Луково е во прекин во двата правца, поради случена сообраќајна незгода, соопшти АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
50-60 магационирани БТР, „хермелини“ и „пинцгауери“ ќе гаснат пожари летово, им се вградуваат резервоари за вода, рече Мицкоски

Застарените и магационирани возила на министерствата за внатрешни работи и за одбрана се приспособуваат за гаснење пожари на непристапен терен. Премиерот Христијан Мицкоски вели дека годинава државата е драматично поподготвена за пожарите во однос на претходните години. Тој рече дека пожари ќе се гаснат како и досега со армиските и со полициските хеликоптери, како и со авионите на Дирекцијата за заштита и спасување, чие дополнување ќе бидат приспособените возила, кои досега стоеле во магацините.
„Она што ќе биде новитет е дел од застарената и магационирана опрема, како што се БТР 70, 80, старите ’хермелини’, ’пинцгауери’ и слично, кои беа во магацините на министерствата за одбрана и за внатрешни работи, се модернизираа, обработија, им се инсталираа посебни резервоари за вода, се купија пумпи што работат на висок притисок и може да пристапуваат на непристапни терени. Тие се за она што многу ни беше важно, навечер, кога огнот, како што велат, спие, да може да му пристапиме и да го изгаснеме за да не се распламти преку ден. Се подготвуваат и многу бргу од денеска ќе бидете сведоци на една таква показна вежба како од ништо направивме нешто. Очекувам 50-60 вакви возила да бидат подготвени со соодветен инсталиран волумен за вода до шест кубни метри, шест тона. Очекувам подготвено да ги пречекаме пожарите и мислам дека драматично сме многу поподготвени од претходните години“, рече премиерот Мицкоски одговарајќи на новинарски прашања по посетата на компанијата „Реплек“.
Премиерот извести дека двата авиона за гаснење пожари на Дирекцијата за заштита и спасување (ДЗС) се тука, а третиот се чека да пристигне од сервис.
ДЗС денес извести дека го надминале и проблемот со недостиг на пилоти за авионите за гаснење пожари со тоа што повторно ги ангажирале двајцата пензионирани пилоти.