Македонија
(Видео) Џафери – Ларсон Џеин: Со членството на Шведска алијансата станува поголема и поцврста

Претседателот на Владата на Република Северна Македонија, Талат Џафери, денеска се сретна со амбасадорката на Кралството Шведска во земјата, Ами Ларсон Џеин.
Премиерот Џафери упати честитки до амбасадорката Ларсон Џеин за членството на Кралството Шведска во НАТО и ѝ предаде писмо со честитки упатени до шведскиот премиер Улф Кристерсон. Притоа истакна дека со овој историски чин алијансата станува поголема и поцврста, а со тоа и севкупната трансатлантска безбедност. Посакувајќи ѝ добредојде на Шведска во НАТО, премиерот Џафери истакна дека од овој момент сојузниците продолжуваат да чекорат заедно кон зацврстување и проширување на заедничкото евро-атлантско семејство. Тој посочи дека во услови кога светот се соочува со нарушена безбедност и со предизвици за демократските вредности и принципи од страна на авторитарни актери секој заеднички потфат е придонес во одржувањето на стабилноста и безбедноста.
Шведската амбасадорка Џеин се заблагодари за честитките и за силната и широка поддршка добиена од Владата и Собранието на Република Северна Македонија во пристапниот процес. Упати посебна благодарност до Џафери, кој и во претходната функција како претседател на Собранието и во сегашната, како претседател на Владата, даде свој личен прилог во процесот. За возврат, истакна дека Шведска ќе биде силен и стабилен партнер во алијансата и доверлив сојузник на Северна Македонија. Ларсон Џеин се осврна на клучните елементи што Шведска ги внесува во алијансата со членството, меѓу кои и силните воени способности на копно, море и воздух, и познавањето на нордиските територии.
На средбата беше констатирано и дека Северна Македонија и Шведска во континуитет градат партнерски односи со политички дијалог на високо ниво и имаат соработка во многу области од заемен интерес. Премиерот Џафери се заблагодари за конзистентната шведска поддршка на Северна Македонија во процесот на евроинтеграциите и на важната шведска развојна помош во области корисни за нашите реформи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Полицијата на Тошковски повторно во служба на сеење страв – се легитимираат новинари!

„СДСМ ги осудува постапките на полицијата на Тошковски во Демир Хисар, каде полициски службеници легитимираа новинари на јавен простор, со видливо истакнати новинарски легитимации. Недозволиво е полицајци на јавен простор да ги третираат новинарите како „непознати лица“ кога на себе имаат легитимации“, велат од СДСМ.
„Знаеме дека Тошковски е уплашен од вистината, од силните реакции на јавноста за сите скандали што ги прави, но не може да ја претвори полицијата во инструмент за сеење страв и замолчување.
Нека ги остави Тошковски новинарите да работат и да известуваат за прашања од јавен интерес. Наместо да ги попречува, полицијата е должна да ги штити нив и новото право за работа без било каков притисок.
Секое друго однесување е директен удар врз слободата на медиумите“, соопшти СДСМ.
Македонија
Средба на градоначалникот Ѓорѓиевски со претседателот на Стопанската комора на Северозападна Македонија, Нухиу Алиу

Градоначалникот на општина Кисела Вода, Орце Ѓорѓиевски, денес оствари конструктивна средба со претседателот на Стопанската комора на Северозападна Македонија, Нухиу Алиу. На средбата се разговараше за можностите за унапредување на бизнис-климата и создавање услови за нови инвестиции.
Двајцата соговорници ја потенцираа важноста на институционалната поддршка за стопанството, како и заедничките заложби за создавање поволна средина за развој на претпријатијата. Беше истакнато дека добрата соработка помеѓу општината и бизнис-заедницата е клучен предуслов за економски раст, отворање нови работни места и задржување на младите во земјата.
„Како локална самоуправа, имаме јасна цел – да обезбедиме стабилна институционална поддршка за стопанството. Соработката со Стопанската комора на Северозападна Македонија може да овозможи побргу да ги препознаеме потребите на бизнисите, да ја намалиме административната бариера и да креираме политики што ќе резултираат со нови инвестиции и економски развој. Верувам дека заедно можеме да направиме значителен исчекор во создавање современа и конкурентна деловна средина“, изјави градоначалникот Ѓорѓиевски по средбата.
Претседателот на Стопанската комора на Северозападна Македонија, Нухиу Алиу, упати честитки до градоначалникот за досегашната успешна работа и му посака успех во неговите понатамошни кариерни чекори.
Македонија
„Влен“: Бујар Османи претставува симбол на дваесетгодишната корупција

„Граѓаните на Чаир добро знаат кој е Бујар Османи. Знаат дека за дваесет години политика никогаш не направил ништо за Чаир, ниту помогнал на некого од Чаир. Се враќа тука само кога му требаат гласови за да ја продолжи својата лична политичка кариера“, велат од „Влен“.
„Бујар Османи е симбол на кариеризмот – човек кој ја користеше секоја функција за сопствен напредок, а не за доброто на граѓаните.
Како министер за здравство доби амнестија во предмет на СЈО за незаконски набавки, а извештаите на Државниот завод за ревизија документираат милионски незаконски трошоци: милиони денари за деривати без покритие, сервисирање возила без докази, незаконски вработувања преку агенции.
Како министер за надворешни работи потроши над 120 милиони денари за Самитот на ОБСЕ, без документи, без фактури, без извештаи. Единствената „победа“ што ја запомнивме е тоа што го пречека рускиот министер Лавров, потег што и нанесе штета на меѓународната репутација на државата.
Како претседавач на ОБСЕ стана познат по тоа што застана на српска страна во спорот со Косово, и наместо да гради стратешко партнерство со Косово, организираше десетици средби и ручеци со српскиот државен врв, отворајќи го пазарот за српски капитал и сомнителни бизниси.
Како дел од Владата на ДУИ беше соучесник во дозволата за влез на МТЕЛ и српските казина во Македонија, од кои две лиценци завршија во рацете на компании со контроверзно српско и црногорско потекло.
Чаир не заслужува човек кој цела кариера ја помина далеку од проблемите на својата општина, кој се појавува само кога му треба поддршка, и кој зад себе остава само долгови, сомнежи и скандали.
Чаир ќе избере човек кој 20 години дише и живее со проблемите на оваа општина, кој ги решава проблемите на граѓаните, а не ги користи за лични договори и лични кариерни причини.
На 19 октомври, граѓаните на Чаир ќе му кажат јасно и гласно: Доста беше, Бујар! Доста абеше од твојот кариеризам!“, се наведува во соопштението на „Влен“.