Македонија
Викендов 622 лица го прекршиле полицискиот час, а над 1.000 не носеле маски

Во текот на изминатите неколку денови, додека траеа ограничувањата на движењето, од страна на Министерството за внатрешни работи на територијата на целата држава констатирани се вкупно 622 непочитувања на одлуката, најголемиот дел од нив – 340, е констатирани на територијата на секторот за внатрешни работи во Скопје. Ова го истакна министерот за внатрешни работи, Наќе Чулев.
Вкупно досега констатирани се 5.397 прекршување на одлуките за ограничување на движењето на граѓаните од нејзиното воведување, рече Чулев.
Во однос на уредбата за задолжително користење заштитна опрема, според презентираните бројки, констатирани се вкупно 1.777 непочитувања, најголемиот дел од нив на подрачјето на СВР Струмица, каде што констатирани се 417 непочитувања, и на подрачјето на СВР Охрид – 356. Вкупната бројка на констатирани непочитувања на оваа уредба досега е 8.180 и за сите тие случаи, како што посочи Чулев, изготвени се соодветни поднесоци.
Исто така, полицијата во соработка со Државниот пазарен инспекторат учествуваше во вкупно 1.543 контроли во угостителски објекти, при што констатирани се вкупно 22 непочитувања: 18 на територијата на СВР Охрид и 4 при СВР Струмица. Истовремено, како што потенцира министерот Чулев, во посочениот период издадени се вкупно 1.648 решенија за изолација и потпишани се 584 изјави за самоизолација, а МВР извршило вкупно 8.701 контрола по основ на самоизолација и изолација.
„Бројките говорат за исклучително голем обем на работа и исклучително високата посветеност од страна на полициските службеници. И токму таа посветеност, наместо да биде соодветно валоризирана, многу често е злоупотребена во политички цели. Дозволете ми, на денешната прес-конференција да апелирам до јавноста, но и до сите политички структури во државата, да се воздржат од неосновани напади, кои ѝ нанесуваат штета на полицијата“, нагласи Чулев.
Тој, освен ова, изрази разбирање за револтот на граѓаните од одлуките со кои се ограничува нивното движење, притоа истакнувајќи дека граѓаните треба да се свесни оти сето тоа се прави со цел да се заштити нивното здравје.
„Ваквите одлуки се носат од страна на Комисија за заразни болести, во која учествуваат стручни лица и доктори, а полициските службеници, односно Министерството за внатрешни работи, имаат задача и обврска да го контролираат нивното спроведување“, нагласи министерот Чулев.
На крајот, осврнувајќи се на критиките, односно нападите упатени до него, министерот Чулев истакна: „Од првиот ден како министер за внатрешни работи мојот став е дека МВР треба да функционира, единствено врз принципите на професионалност, неселективност и законитост затоа што граѓаните тоа го заслужуваат. И во суштина, во изминатиот период тоа се покажа во пракса, во најголем дел успешно ги спроведовме одлуките на Владата, а со тоа го заштитивме здравјето на граѓаните. Грешки и пропусти има и тие се дел од работењето, но лошо е кога грешките се случуваат поради опструкции, несоработка и постапување по партиски директиви. Да бидам искрен, исклучително тешко е една моја идеја, замисла или директива да се спроведе во пракса, без да наидам на многу опструкции во Министерството за внатрешни работи, но и од страна на Владата“, рече Чулев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВЛЕН: Време е за ветинг на Муса Џафери – човекот сенка на Али Ахмети, најдобриот пријател на Сашо Мијалков

„ДУИ повторно глуми дека ќе се „чисти“ од криминал, но вистината е сосема поинаква – тие што треба да „чистат“ се 20 години во врвот на политиката и бизнисите! И глумат дека нешто ќе чистат за тие самите да останат на врвот“, велат од ВЛЕН.
„Време е за вистински ветинг – време е да се отвори темата за Муса Џафери, еден од клучните луѓе на Али Ахмети, кој со години беше највлијателната фигура во сенка. Човекот што ги договараше сите најважни „зделки“, човекот што ги влечеше конците зад политичката сцена и најдобриот сојузник на Сашо Мијалков.
ДУИ, до кога ќе ја лажете јавноста? Како е можно човек што беше десна рака на Ахмети и учествуваше во секој коруптивен проект да биде дел од наводното „прочистување“?
Зошто неговите синови преку фирми блиски до власта добиваат милионски тендери? Како се отпишуваат долгови од милиони евра за фирмите блиски до Муса Џафери?
Како е возможно судовите во Америка да досудат корупција за давањето мито на високи функционери на ДУИ во Македонија, а судовите во Македонија да останат неми? До кога ќе дозволувате вашите функционери да се богатија на грбот на граѓаните, додека државата тоне во сиромаштија?
Оставете ја јавноста на мир – заминете од политика! ДУИ веќе 20 години ја контролира политичката и економската моќ на Албанците во Македонија. Нивните луѓе од сенка како Муса Џафери никогаш не биле ставени на тест на правдата. Доста е!
Ако навистина сакате ветинг, почнете од него! Ако не сте подготвени за тоа, тогаш вашето „прочистување“ е само уште една лага“, соопштуваат од ВЛЕН.
Македонија
Меџити: Каналот и детската градинка во Ченто стануваат реалност

Првиот вицепремиер и министер за животна средина и просторно планирање Изет Меџити денеска заедно со претседателот на Собранието Африм Гаши, министерот за социјална работа, демографија и млади Фатмир Лимани и градоначалникот на општина Гази Баба, Бобан Стефковски, беше на посета во скопската населба Ченто каде најави наскоро започнување на два капитални проекти за оваа населба.
„Ветување неисполнето со години од минатите влади сега станува реалност! Хасанбег конечно ќе ги добие атмосферскиот канал и државната детска градинка кои одамна беа ветени, но никогаш реализирани“, изјави Меџити.
„Да не заборавиме: страшните поплави во 2016 година однесоа 23 животи и уништија домови, земјишта и бизниси. Но, тогашната влада не ги презеде неопходните мерки за да спречат слични трагедии во иднина. Недостатокот на соодветна дренажа беше еден од главните фактори за катастрофалните штети. Сега, оваа грешка ќе биде исправена!“, рече Меџити.
Тој најави дека оваа значајна инвестиција, вредна 38 милиони денари, ќе овозможи изградба на канал во должина од 1.350 метри и ширина од 4 до 10 метри, во зависност од близината на куќите.
„Овој проект не е само инфраструктурна интервенција, туку посветеност на безбедноста, животот и достоинството на жителите на Хасанбег“, изјави првиот вицепремиер Меџити.
Проектот ќе се реализира со поддршка на Министерството за животна средина и просторно планирање, во соработка со општина Гази Баба, со што ќе се означи важен чекор кон правдата и безбедноста за жителите од овој крај.
Македонија
Герасимовски: Центар ја совлада екипата на Кисела Вода во фудбал на 41-те маџирмаалски средби

Денеска, екипата на општина Центар, предводена од градоначалникот Горан Герасимовски издвојува победа против екипата на Општина Кисела Вода, на ревијалниот натпревар во рамки на 41-те Маџирмаалски средби.
„Игравме фанта – стара, но добро зачувана игра, со што ја негуваме традицијата и спортскиот дух на нашата заедница. Гордост ми е што и оваа година сме заедно на овие прекрасни Маџирмаалски средби! Нашата традиција живее преку спортот, дружбата и заедништвото, а мојата поддршка ќе продолжи и во иднина. Изненаден сум од оваа позитивна енергија, од ова другарство и од целокупната организација, ви симнувам капа. Да славиме уште многу години! Да сте ми живи и здрави, мои Центарци, мои Маџирмаалци!“, истакна Герасимовски.
Маџирмаалските средби, по 41-ви пат почнаа вчера, традиција којашто се одржува со децении и го чува духот на Маџир Маало, како едно од најстарите и најавтентичните скопски маала. На самото отворање, Герасимовски потенцираше дека има голема чест што заеднички со маџирмаалците се одбележуваат овие денови.
„Маџир Маало е едно од најстарите и најавтентичните скопски маала – место со душа, каде што се чувствува посебната магија на градот. Нека оваа прекрасна традиција продолжи уште многу години!“, рече Герасимовски.