Македонија
(Видео) Вице Заев: Брат ми Зоран нема потпишано ниедно решение за мене

Во Основниот суд Скопје 2 се одржа главна расправа за тужбата за клевета и навреда на братот на премирот, Вице Заев, против потпретседателот на ВМРО-ДПМНЕ, Александар Николоски. На рочиштето сведочеше Вице Заев, кој рече дека му е нанесена неправда.
„Во гостување на една национална телевизија тужениот изнесе груби лаги и манипулации со кои ми ги наруши честа и угледот не водејќи сметка дека сум семеен човек, имам мали деца и роднини и дека сум бизнисмен што ужива авторитет во средината каде што живеам“, рече Вице Заев пред судот.
Александар Николоски му предочуваше на Вице Заев написи од медиумите и го прашуваше дали е сопственик на одредени фирми што добивале тендери.
Вице Заев рече дека е стопроцентен сопственик и управител на две фирми од Струмица, „Тотал електрик“ и „Тотал инженеринг“, и дека има акции во уште 2 локални фирми.
На прашањето на Николоски дали Вице Заев се чувствува како јавна личност бидејќи е брат на премиерот, Вице рече дека не се чувствува така: „И да бев јавна личност, тоа не ви дава право да изнесувате невистини за мене“, рече тој.
„Брат ми нема потпишано ниедно решение за мене“, рече Вице Заев на прашање на Николоски дали купил парцела со предочен од текст од „Курир“. „Ве повикувам, ако имате документи за криминал, да ги доставите до Јавното обвинителство“, истакна Вице Заев.
„Вице Заев, ниту како физичко лице ниту со учество преку правните лица, не влегол, ниту има капитална и управувачка улога во таа фирма. Моите први братучеди имаат“, рече тужителот на прашањето од тужениот дали е поврзан со фирмата за одледување медицински канабис.
Братот на премиерот рече дека не е сопственик на туларницата „Еленица“, туку бил член на Управниот или Надзорниот одбор, а не сопственик. Вице Заев рече дека не бил сопственик на штедилницата „Пеон“, туку бил вработен како референт од 1996 година.
„Профитот од моите фирми е во рамките на маргините и овие податоци се јавно достапни“, рече Вице Заев.
Причината за тужбата е поради тоа што Александар Николоски во телефонско интервју за една телевизија рекол дека братот на премиерот Зоран Заев, Вице Заев, и неговото семејство ги добиваат сите главни бизниси во државата. Вредноста на спорот е 30 илјади денари. Адвокатот на Вице Заев во тужбата образложил дека поради таа изјава на Николоски, неговиот клиент чувствувал вознемиреност, црвенеел и имал главоболки. Следното рочиште судијката Кети Германова го закажа за 12 април кога треба да бидат изнесени и завршните зборови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова ги прими шпанскиот амбасадор и претставниците на ОН и УНДП во пресрет на Конференцијата во Севиља

Претседателката Гордана Сиљановска-Давкова ги прими амбасадорот на Кралството Шпанија, Рафаел Сориано Ортиз, постојаната координаторка на ОН, Рита Колумбија и претставникот на УНДП во Скопје, Армен Григориан, во пресрет на одржувањето на 4. Меѓународна конференција за финансирање на развојот (FfD4), што под покровителство на ООН ќе се одржи во Севиља, Шпанија, а на која ќе учествува Сиљановска-Давкова.
На средбата претседателката беше запознаена со целите, очекувањата и важноста на Конференцијата. Лидерскиот собир во Севиља, соговорниците го оценија како добра можност за изнаоѓање решенија за справување со финансиските предизвици во исполнувањето на Целите на одржливиот развој. Од Конференцијата, на којашто е најавено учество на повеќе од 50 шефови на држави и влади, се очекува да произлезе Платформа за акција, со конкретни иницијативи и финансии.
Сиљановска-Давкова смета дека без соодветни финансиски средства не е можно да се е реализира Агендата 2030. Таа укажа на потребата од реформирање на меѓународната финансиска архитектура, од поддршка на земјите во развој и поголема достапност на финансиите. Во инвестицискиот поттик на приватниот сектор и во јавно-приватното партнерство претседателката гледа решение за обезбедување на потребните средства. Потенцирајќи ги јасните цели, претседателката ја нагласи суштинската важност на мултилатералната и на регионалната соработка.
Претставниците на ОН ја поздравија силната посветеност на нашата држава на Агендата 2030, како и интегрирањето на целите за одржлив развој во националните стратегии и плановите за локален развој. Тие изразија задоволство од успешноста на Кредитната линија зa финансирање во зелена енергија (Green Financing Facilities), којашто овозможува инвестиции на малите и средни претпријатија во енергетска ефикасност и обновливи извори на енергија.
Претседателката изрази подготвеност за натамошно проширување на билатералните односи со Шпанија и продолжување на одличната соработка со институциите на ОН. Таа го поздрави ангажманот на целиот тим на ОН во развојот на Рамката за соработка за одржлив развој 2026-2030, како стратешки документ, усогласен со националните развојни приоритети и меѓународните обврски за човековите права.
Македонија
(Видео) Костадиновска-Стојчевска до Љутков: Се знае ли кој е државен секретар во Министерството за култура?

Пратеничката на СДСМ, Бисера Костадиновска-Стојчевска, на денешната собраниска седница посветена на пратенички прашања, упати прашање до министерот за култура и туризам, Зоран Љутков. Прашањето се однесуваше на прекинувањето на значајни проекти во културата и на фактот дека незаконски се претставува кој е државен секретар во Министерството за култура.
„Драго ми е што ги продолжувате проектите коишто беа наследени, како што е еден од нив – реконструкцијата на кино „Партизан“. За волја на вистината, не ги продолжувате сите, меѓутоа сепак гледаме некое поместување.
Најголем дел од проектите ги прекинавте, како „Љубојно“ и ред други значајни проекти, меѓутоа никој не дозна зошто.
Не дознавме ни зошто нема резултати од конкурсот за креативни индустрии, како што не ги видовме ниту програмите на националните установи јавно објавени, за да знае јавноста што е тоа што е одобрено“, рече Костадиновска-Стојчевска.
„Не знаеме зошто не распишувате конкурс за капиталните дотации до ЕЛС, а имате 200 милиони денари на таа сметка – конкурс којшто се објавува најдоцна до април.
Знаеме колку потрошивте за Јапонија, и дека отсега имате купено авио карта за во септември повторно за Јапонија. Изгледа убаво е таму.
Но, не знаеме кој е државен секретар во Министерството за култура. Затоа моите три прашања до вас се следниве: Кој е државен секретар во Министерството за култура на 22 мај 2025 година? Кој е државен секретар во Министерството на култура на 24 мај 2025 година? Кој е државен секретар во Министерството за култура на 26 мај 2025 година“, праша пратеничката Костадиновска-Стојчевска.
Македонија
Арсовска: Висар Ганиу фатен со криминално легализирање дивоградби со фалсификат, документи се доставени до обвинителство

„Висар Ганиу фатен со криминално легализирање дивоградби со фалсификат, за што документи се доставени до обвинителство и има изјави кои сведочат за начинот на кој ги спроведувал овие незаконски постапки, институциите уште се мислат кога да ПОЧНАТ да постапуваат“, вели градоначалничката на Град Скопје, Данела Арсовска.
„Во меѓувреме Висар си брише имотни листови од Катастар, замислете овие луѓе кои до вчера имале имот, денес немаат, поради неговите фалсификати.
Фалсификатот го запишувал во Катастар на 20.03.2025 година сред денови на жалост за трагедијата во Кочани, користејќи период кога мислел дека нема никој да примети што прави.
1. Барање за упис во катастар
2. Решение за упис во катастар со фалсификат документи
3. Барање за бришење имотен лист од катастар
4. Решение за бришење да може да го уништи досието со фалсификатите
5. Катастар за 24 часа го брише досието со што директно овозможува да можат да се уништат докази за делото
Зошто само 2% доверба имаат граѓаните во правосудството? Во моментов во затвор лежат луѓе за влез во Собранието на 27 април и за 100 ќебапи. Таму се постапило веднаш! Во Чаир кај Висар Ганиу ќе влезат да обезбедат докази за некоја година, нека троши кеш и нека ужива до тогаш!“, додаде Арсовска.