Македонија
Владата една и пол година ги слави празниците на Груевски, Законот за празниците нечепнат

Владата една и пол година ја разгледува можноста за укинување дел од неработните денови и измена на Законот за празниците, а во меѓувреме ги слави празниците воведени по иницијатива на кабинетот на поранешниот премиер, Никола Груевски. Зоран Заев и пред да стане премиер, во изборната кампања, но и кога ја презеде функцијата, ветуваше измени на Законот за празниците алудирајќи дека се воведени вмровски празници кои треба да се укинат, но можноста сè уште се разгледува.
„Владата на РМ сè уште ги разгледува можностите за измените на Законот за празниците и доколку се пристапи кон нив, ќе бидат вклучени сите засегнати страни, како што се граѓанските организации, претставници на стопанските комори, а ќе има целосно отворена јавна дебата. Евентуалните измени треба да бидат исклучиво во интерес на економскиот развој на Република Македонија“, изјавија од Владата за „Макфакс“.
На почетокот на минатата година, по една од најавите дека ќе се прават измени на Законот за празниците, граѓаните ги преплавија социјалните мрежи со барања 2 јануари и 2 мај повторно да бидат прогласени за неработни денови, а Министерството за труд и социјална политика објасни дека ќе бидат земени предвид сите барања. Место измена на Законот, Владата на 25 декември го прогласи 2 јануари за неработен, но само за државната администрација, со препорака одлуката да ја прифати и приватниот сектор. Без најава и без образложение за одлуката, административците добија уште еден неработен ден во јануари.
И од Министерството за труд и социјална политика велат дека не се работело на измена на овој закон.
„Министерството за труд и социјална политика досега нема направено промени во Законот за празниците. Сакаме да потенцираме дека доколку би се правеле корекции на законската регулатива, тие би биле во претходна консултација со работниците и со работодавците, од која би произлегле најсоодветни заеднички прифатени решенија“, велат од Министерството за труд.
Министерството за труд и социјала ги објави неработните денови за 2019 година. За сите граѓани, и во 2019 година има 11 неработни дена, за граѓаните од православна вероисповед има дополнителни 5 неработни дена, за католиците има дополнителни 3 неработни дена, за муслиманите еден дополнителен неработен ден и по еден неработен ден има за припадниците на албанската, српската, ромската, влашката, еврејската, бошњачката и на турската заедница во Република Македонија. Овие празници беа воведени во 2007 година со последната измена на Законот за празниците иницирана од кабинетот на тогашниот премиер Никола Груевски. Тогаш како неработни денови беа укинати 2 јануари, 2 мај и 29 ноември, а на листата беа додадени три нови државни празници и шест верски празници и празниците на заедниците. Од 2007 година како државни празници неработни се 24 Мај – Св. Кирил и Методиј, 23 Октомври – Денот на македонската револуционерната борба и 8 Декември – Св. Климент Охридски, а како верски празници се воведени Бадник, Велипеток, Водици, Задушница, Голема Богородица, Рамазан-бајрам, за католиците како неработен е воведен Денот на мртвите, а неработни денови добија и заедниците во РМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Исцрпени средствата за велосипеди, повикот за дополнителна опрема сѐ уште е во тек

Општина Центар информира дека се исцрпени средствата за субвенционирање на велосипеди, електрични велосипеди и е-тротинети во рамки на јавниот повик „Цел Центар на точак“.
„Проектот „Цел Центар на точак“ е потврда дека центарци се подготвени да направат вистински избор за поеколошки и поодржлив начин на движење низ градот. И овојпат интересот беше толку голем што за кратко време се искористија средствата. Ова е доказ дека сме на вистинскиот пат,“ порача градоначалникот Горан Герасимовски.
Од вкупно предвидените 600.000 денари, субвенционирани се 197 жители на Општина Центар, додека јавниот повик за субвенционирање на дополнителна опрема останува активен.
Овој долгогодишен и популарен проект предвидува субвенции за купување велосипед, електричен велосипед или е-тротинет, во износ од 30% од цената, но најмногу до 3.000 денари, како и субвенции за набавка на дополнителна опрема,, во износ од 30% од цената, но не повеќе од 1.000 денари, велат од општината.
Под дополнителна опрема се подразбираат: детско седиште, заштитна кацига, светло, катадиоптри, ѕвонче, безбедносна сајла, катанец и други елементи што го зголемуваат нивото на безбедност при користење.
Македонија
Македонската дипломатија нема да биде ничија партиска сопственост, одговори МНР по прозивките од СДСМ

Македонската дипломатија не е, и нема да биде ничија партиска сопственост. По години на политичка злоупотреба, ја враќаме дипломатијата на државата, институционално, професионално и во согласност со законот, реагираат од МНР по прозивките од страна на СДСМ кои на прес -конференција кажаа дека Муцунски и ВМРО-ДПММЕ ја узурпираат дипломатијата.
„Автентичното толкување на член 39 став 3 од Законот за надворешни работи е легитимна, уставно заснована постапка, донесена од Собранието – единствениот орган со надлежност за толкување на законите. Министерството нема ниту овластување, ниту влијание врз овој процес.
Членот на Комисијата за надворешни работи од СДСМ, Фатон Бејта, го упатуваме на предметот Уставно право на кој било правен факултет во државата, каде што ќе може да се потсети дека државата се темели врз начелото на поделба на власта – законодавна, извршна и судска.
Целта на ова толкување е да се воведе дополнителен демократски филтер и јавна отчетност при изборот на амбасадори – не да се одземе уставната надлежност на Претседателот, туку да се зајакне транспарентноста пред граѓаните.
Собраниската процедура, спроведена пред Комисијата за надворешни работи составена од пратеници од сите политички партии, е доказ за инклузивност и независност на процесот.
Наместо да одржуваат безпредметни прес-конференции, СДСМ треба да одговори зошто нивните амбасадори со години беа апатични, невидливи или отворено политизирани, а именувањето на дел од нив беше спроведено спротивно на Законот за надворешни работи“.
Нашата цел не е партизација, велат од МНР, туку системска професионализација.
„За првпат по долг период се воспоставуваат јасни критериуми, јавни постапки и механизми за унапредување на кариерните дипломати. Најсилна потврда за ова се измените на Законот за надворешни работи, кои неодамна беа усвоени во Собранието, а чија главна цел е токму професионализацијата на дипломатијата.
Амбасадорите што чесно и професионално ја извршувале својата функција немаат од што да се грижат. Но оние што амбасадите ги третираа како партиски трофеи, нивниот мандат завршува“.
Оваа влада, се нагласува во реакцијата од МНР, гради модерна, отчетна и компетентна дипломатија, со амбасадори што ја претставуваат државата, а не партијата.
Македонија
(Видео) Дали СВР Велес фалсификува службени документи за да ги заштити УМС на ВМРО-ДПМНЕ, прашува Цветаноски

Денеска поставуваме сериозно и алармантно прашање: Дали СВР Велес фалсификува службени документи за да ги заштити УМС на ВМРО-ДПМНЕ од одговорност, прашуваат од СДММ.
„Откако УМС на ВМРО-ДПМНЕ славеа со пиротехника во момент кога цела Македонија тагува по трагедијата во Кочани скандалот стана уште поголем. УМС објави демек „доказ“ дека го пријавиле настанот и пиротехниката, но дали е валидно и дали станува збор за фалсификат? Нема повратница од Министерството за внатрешни работи – со што би се потврдило дека оваа пријава навистина е доставена и примена во законскиот рок“.
Не е наведена количината на пиротехнички средства што ќе се користат, што е обврска според член 39 од Законот за употреба на пиротехнички средства, вели Бојан Цветаноски, претседател на ЛК СДММ Прилеп.
„Но што е клучно. На документот стои ознака со број 23.23.5.5188/2.
Според нашите информации ова е интерна ознака, која не ја става известителот, туку ја додава началникот на СВР по приемот на актот. Тоа значи, оваа ознака не може да биде дел од документот што го објавува УМС туку е службена ознака по прием. Со други зборови, оваа хартија што се обидоа да ја протнат како легален документ постои голема веројатно дека не е релана“.
Очекува, како што нагласи, одговори од МВР и Панче Тошковски и праша дали е ова фалсификат.
Според него, нема правда ако институциите фалсификуваат документи за да ги штитат партиските членови на ВМРО-ДПМНЕ.
Ако ова се потврди, ќе бараме, потенцира Цветаноски, кривична одговорност за сите инволвирани, од извршителите до политичките наредбодавци.