Македонија
Владата и ДКАФ потпишаа меморандум за реформа на разузнавачките служби
Претседателот на Владата, Зоран Заев, и Томас Гурбер, директорот на Женевскиот центар за демократска контрола на вооружените сили (ДКАФ), денеска потпишаа меморандум за разбирање за имплементација на програмата за реформа на Секторот на разузнавачките служби на Република Македонија за периодот 2017-2020 година.
„Женевскиот центар за демократска контрола на вооружените сили (ДКАФ) е меѓувладина фондација во чијшто основачки одбор Република Македонија членува од 2000 година. Оваа фондација обезбедува поддршка за државите и меѓународните фактори за истражувања и проекти со цел подобрување на владеењето и реформите на секторот за разузнавање и безбедност“, рече премиерот Заев.
Истакнувајќи ја исклучителната важност на меморандумот и стратешкото партнерство што ДКАФ по промените ѝ го понуди на Република Македонија за спроведување на реформата во безбедносниот сектор и разузнавачките служби и на институциите кои имаат мандат да ги надгледуваат и да ги контролираат овие служби, премиерот Заев истакна:
„Оваа соработка е клучна за нас, пред сè заради враќање на довербата на граѓаните во оние институции од безбедносниот сектор, кои во минатото беа означени како симбол на ‘заробената држава’ која ја наследивме, како главна асоцијација за кршење на човековите слободи и права“, оцени премиерот.
Заев информираше дека потпишувањето на денешниот меморандум за разбирање со ДКАФ е печат за гаранција на контролните механизми утврдени со новиот законски пакет, кој беше усвоен со консензус со опозицијата, во соработка со стручни лица од Европската Унија и кои нема да дозволат самоволно прекршување на граѓанските и човекови права и кои го минимизираат политичкото влијание врз можноста за незаконско и политички мотивирано прислушкување“.
Потсетувајќи дека со новиот законски пакет се предвидува формирање Оперативно техничката агенција (ОТА), чиј директор ќе се избира со двотретинско мнозинство и со дополнително Бадинтерово мнозинство, премиерот Заев рече:
„Тоа е нова вредност за реформскиот процес, но и гаранција дека никогаш повеќе нема ниту една политичка гарнитура да си дозволи да ги крши основните човекова права и слободи и да ги прислушкува сопствените граѓани незаконски, без контрола и од политички причини. Тоа го ветивме, тоа и го реализираме“.
Истовремено, премиерот Заев додаде дека меморандумот обезбедува соработка која ќе помогне за заживување и имплементација на донесените закони во пракса.
Потпишувањето на меморандумот за разбирање со ДКАФ премиерот Заев го оцени како еден од проектите кои преку гаранцијата за сигурноста на граѓаните и заштитата на нивните права ќе им овозможи и на меѓународните партнери да бидат уверени дека Република Македонија сигурно чекори по патот до европска и демократска држава, во која владее правото и во која институциите се грижат подеднакво за безбедноста на државата.
Во своето обраќање на прес-конференцијата директорот Томас Гурбер посочи дека актуелната влада што ја предводи премиерот Заев стави приоритет на реформите кои ги опфаќаат националните служби за безбедност и разузнавање, со што, како што рече, се трасира патот на еден поефикасен безбедносен сектор со јакнење на внатрешната отчетност на разузнавачките служби и истовремено јакнење на надворешниот парламентарен надзор и судската контрола.
Директорот Гурбер упати честитки до Владата на РМ и граѓаните на Република Македонија за добиената чиста безусловна препорака од Европската комисија за почеток на преговорите за членство на државата во ЕУ и истакна дека со денешниот настан и истакнатите заложби, земјата се носи еден чекор поблиску до нејзините аспирации во евро-атлантските интеграции.
На настанот присуствуваа заменикот на претседателот на Владата на Република Македонија и министер за внатрешни работи, Оливер Спасовски, амбасадори и претставници на амбасадите на Соединетите Американски Држави, Обединетотото Кралство, Германија, Холандија, Шведска, Швајцарската Конфедерација, Република Хрватска и претставници на делегацијата на Европската Унија во Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Првиот премиер Албанец на Македонија: Со мирна совест можам да кажам дека тоа што го најавив пред сто дена, го спроведов
Претседателот на Владата, Талат Џафери на денешната прес-конференција кажа дека се обврзал пред граѓаните дека ќе овозможи слободно изразување на граѓанската волја на двојните избори и тоа заедно со Владата го исполниле.
„Спроведовме европски избори во слободни, фер процеси и во двата изборни круга. Избори кои ќе се спомнуваат како може да се сработи во интерес на граѓаните и државата. Придонесовме во европското поведение на земјата која се стреми да биде членка на ЕУ. Изразувам благодарност до институциите и граѓаните, беа на висина на одговорноста и придонесоа кон нашите искрени заложби, државата да напредува според европските вредности. Вака на дело се работи за големата европска идеја. Очекувам овој процес да го следи и следниот владин состав, затоа што иднината на Северна Македонија, мирот, спокојот и перспективите на граѓаните се директно поврзани со напредок во евроинтеграциите и реализацијата на полноправното членство до 2030. Шансата е пред државата и пред новата влада, исто така и одговорноста“, рече Џафери.
„Со чист образ, мирна совет и должна почит кон граѓаните можам да оценам дека тоа што најавив кога стапив на должност, пред 100 дена, го спроведов. Потврдив дека моето именување за премиер како прв премиер Албанец на Северна Македонија е уште еден придонес за демократијата“, додаде Џафери.
Скопје
Герасимовски: Лицата со попреченост ќе може да користат бесплатен превоз до болница, издвоивме 500.000 денари за оваа намена
Градоначалникот на општина Центар Горан Герасимовски ги повикува граѓаните со попреченост да ја користат услугата за бесплатен транспорт до здравствените установи за што општината има потпишано Меморандум за соработка со Црвен крст на Република Северна Македонија.
Станува збор за бесплатен превоз до здравствените установи со наменски возила на Црвениот Крст за корисници над 18 години, кои користат ортопедско помагало (инвалидски колички, дубаци или одалки), а живеат на територија на Општина Центар, како и лица над 18 години кои не користат ортопедско помагало, но поради болест се во лежечка состојба (неподвижни). За оваа услуга општината издвои 500.000 денари од сопствениот буџет со цел да им го олесни пристапот до болниците и лекарите на граѓаните кои имаат најголема потреба за тоа. Оваа услуга само за еден месец ја искористиле 42 граѓани. Градоначалникот на општина Центар Горан Герасимовски упатува апел до граѓаните кои ги исполнуваат условите да го закажат својот бесплатен превоз до потребната болница.
„Бесплатниот превоз до болниците верувам дека е големо олеснување за семејствата и корисниците кои не се во можност често да ги користат здравствените услуги. Ова е исклучително важна мерка особено за лицата кои немаат помагала или не се во состојба да се движат. Затоа доколку корисникот е подвижен превозот ќе биде реализиран со мало наменско возило на Црвениот крст, а доколку тој е неподвижен превозот ќе се спроведе со специјално наменско возило. Граѓаните кои имаат потреба ги повикувам да ја користат оваа услуга. Бесплатниот транспорт граѓаните мора да го закажат минимум 24 часа однапред јавувајќи се на телефонскиот број 02/15330, во контакт центарот на ЦКРСМ или секој работен ден од 6:00 до 0:00 часот. Со остварување на еден телефонски повик може да се закаже превоз за еден корисник, до една конкретна дестинација од 8:00 до 16:00 часот. И еден корисник бесплатниот превоз во еден правец може да го користи максимум 10 пати во текот на 1 година, но доколку имаат потреба од повеќе истиот може да го платат согласно ценовникот на Црвен крст“, потсетува градоначалникот Герасимовски.
Герасимовски исто така потсетува и на другите проекти кои се реализираат во општината како едукативните работилници и обуки за давање прва помош со кои воспитувачите, негувателите, наставниците, осмооделенците и другиот стручен кадар во детските градинки и училиштата се здобија со знаења и вештини за соодветно и навремено постапување во ургентни ситуации, односно давање на прва помош, пред се, на децата. Како и едукативните работилници преку кои децата од возрасните групи од сите градинки и клонови се здобиваат со знаења во врска со здравите навики и одржувањето на личната хигиена како и многуте реализирани крводарителски акции за обезбедување крвни компоненти за потребите на здравствениот систем.
Општина Центар ќе продолжи да ги негува проектите со Црвениот Крст кои имаат за цел да им помогнат на граѓаните и го олеснат нивното секојдневие.
Македонија
Макрон упати честитка до Силјановска-Давкова: Се отвора нова страница кај нашите македонски пријатели
Честитки на македонски јазик за победата на Гордана Силјановска-Давкова, вчера, 9 мај 2024 година на социјалната мрежа фејсбук, упати претседателот на Република Франција, Емануел Макрон.
Во честитка се потенцира француската поддршка за Македонија кон целосна евроинтеграција при што е наведено следново:
„Се отвора нова страница кај нашите македонски пријатели. Ја поздравувам храбрата посветеност на Стево Пендаровски, а на Гордана Сиљановска-Давкова ѝ ги упатувам моите срдечни честитки за изборот за Претседател. Франција остнува на страната на Македонија за да ја придружува во реформите и нејзината европска иднина.“
Професорката Гордана Силјановска-Давкова упати благодарност за честитиката на македонски и на француски јазик, истакнувајќи ја улогата на Франција како една од основачите на ЕУ и потенцирајќи дека како претседателка ќе се залага за градење на консензус кој ќе овозможи македонските граѓани да живеат европски. А исто така, ја потенцира и билатералната соработка за зајакнување македонско-француските односи.
Во одговорот на професорката Гордана Сиљановска-Давкова стои:
„Претседателе Макрон, Ви благодарам за честитките! Франција, како една од земјите основачи на ЕУ има најважна улога и одговорност за успех на европскиот проект. Вашата поддршка се надевам ќе го отвори патот на Македонија кон Европа, а она што можам да се заложам е дека ќе градам консензус за реформи кои ќе им овозможат на македонските граѓани да живеат европски. Воедно, како две пријателски земји во мојот мандат ќе работам на зајакнување на билатералните односи, особено економската, културната и научната размена.“