Македонија
Владата ќе одлучи за продолжување на рокот за привремено сместување на поплавените

Владата на наредната седница, што треба да се одржи денеска или утре, на предлог на Министерството за труд и социјална политика, кој ќе се темели врз основа на извештаите на екипите на Центарот за социјална работа, ќе донесе одлука дали и за кого ќе биде продолжен рокот за сместување во „Сениќ“ и „Партение Зографски“ на лицата на кои во поплавите им беа оштетени домовите.
„Испративме екипи од Центарот за социјална работа да отидат на лице место и да утврдат кои од лицата имаат услови за враќање, кои не, така што ќе поднесеме предлог до Владата и таа да одлучи што понатаму. Но, нашата намера не е да ги оставиме лицата на улица бидејќи огромен број од нив примиле надоместок, односно обесштетување, а се уште не презеле никаков исчекор во делот на средување на условите. Сепак, оставаме на Владата да одлучи дали и до кога ќе го продолжи рокот за сместување во „Сениќ“ и во „Партение Зографски“, изјави министерот за труд и социјална политика Ибрахим Ибрахими.
Оние што веќе имаат услови ќе треба да се вратат, а за оние коишто немаат, МТСП ќе даде предлог до Владата за пролонгирање на нивниот престој во објектите каде што се сместени.
По поплавите во август минатата година, Владата одлучи лицата кои немаа услови да останат во своите домови да бидат сместени во одредени објекти не подолго од 180 дена, а оштетените имаа можност да аплицираат за средства од државата за санација на штетите во домовите./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„СДС сака да ги спаси организаторите на прислушкувањето со лажни барања за декласификација“, реагира ВМРО-ДПМНЕ

„СДС блефира и свесно бара нешто што е невозможно да се направи ако сакаме да постои правна постапка. Ваквиот однос само ги јакне сомнежите дека тие стојат зад нарачките за следење и прислушкување, бидејќи преку лажни обиди за „декласификација“ сакаат да ги спасат организаторите, пуштајќи ги доказите во јавност“, реагира ВМРО-ДПМНЕ на ставовите на претседателот на СДСМ, Венко Филипче.
„Декласификација на документи се врши исклучиво согласно закон, и тоа во судска постапка, по барање и одлука на надлежните органи.
Со оглед на тоа дека за сите информации поврзани со незаконското работење во АНБ е веќе известено Јавното обвинителство, понатамошното постапување останува во нивна надлежност. Прашањето за декласификација на документи може да биде дел само од постапките што се водат од страна на обвинителството и судот, а не од партиска нарачка на СДС.
СДС, со овој однос јасно потврдува дека се плаши, а кога Венко Филипче зборува за „инфантилност“, тоа е исто како доктор Менгеле да зборува за права на пациентите или барон Минхаузен за етика и држење до зборот.
Нема поголем комплимент за нас од тоа марионетата на струмичкото семејство да не етикетира со погрдни зборови. Човек кој одамна го продал својот морал за неколку песни на Харис Џиновиќ и две кружења со јахта, и кој е заробен меѓу амбиции, базични инстинкти и заеднички бизниси со семејството кое го има киднапирано СДС.
Со оглед на чувствителноста на темата, неопходно е да се почитуваат строго пропишаните процедури. Утврдувањето на одговорност и евентуално кривично гонење е во надлежност на обвинителствата и судовите, а не на СДС“, се додава во реакцијата на ВМРО-ДПМНЕ.
Македонија
Пожарот кај Вардариште е ставен под контрола, ЦУК извести дека нема активни пожари

Центарот за управување со кризи соопшти дека денеска на територија на државата регистрирани се вкупно 18 пожари на отворен простор, од нив нема ниту еден активен, под контрола се ставени пет, додека 13 пожари се изгаснати.
Под контролан се пожарите кај Општина Долнени, с.Долгаец – с.Стровија (нискостеблеста вегетација); Општина Гази Баба, Депонија Вардариште (ѓубре); Општина Гевгелија на планината Кожуф (приземен пожар); Општина Македонски Брод, Повеќенаменско подрачје Јасен (мешана шума); Општина Липково, с.Никуштак (мешана шума), соопшти ЦУК во извештајот.
Македонија
Учество на министерот Муцунски на Самитот на Светскиот економски форум во Женева, Швајцарија

Министерот за надворешни работи и надворешна трговија, Тимчо Муцунски, од денес до петок престојува во работна посета на Женева, Швајцарија.
Во рамки на посетата, министерот ќе се обрати на Самитот на млади лидери, во организација на Светскиот економски форум, што се одржува во Женева.
Покрај обраќањето, министерот ќе го отвори Почесниот конзулат на Република Северна Македонија во Женева, а во пресрет на одбележувањето на Денот на независноста, ќе говори и на прием организиран за македонската дијаспора во овој дел на Швајцарија.
Предвидени се и билатерални средби со генералниот директор на Светската трговска организација, со заменикот висок комесар за човекови права, со директорот на Женевскиот центар за безбедносни политики, како и со специјалниот известувач за малцински прашања при Советот за човекови права на Обединетите нации.