Македонија
Владата ќе одлучи за продолжување на рокот за привремено сместување на поплавените

Владата на наредната седница, што треба да се одржи денеска или утре, на предлог на Министерството за труд и социјална политика, кој ќе се темели врз основа на извештаите на екипите на Центарот за социјална работа, ќе донесе одлука дали и за кого ќе биде продолжен рокот за сместување во „Сениќ“ и „Партение Зографски“ на лицата на кои во поплавите им беа оштетени домовите.
„Испративме екипи од Центарот за социјална работа да отидат на лице место и да утврдат кои од лицата имаат услови за враќање, кои не, така што ќе поднесеме предлог до Владата и таа да одлучи што понатаму. Но, нашата намера не е да ги оставиме лицата на улица бидејќи огромен број од нив примиле надоместок, односно обесштетување, а се уште не презеле никаков исчекор во делот на средување на условите. Сепак, оставаме на Владата да одлучи дали и до кога ќе го продолжи рокот за сместување во „Сениќ“ и во „Партение Зографски“, изјави министерот за труд и социјална политика Ибрахим Ибрахими.
Оние што веќе имаат услови ќе треба да се вратат, а за оние коишто немаат, МТСП ќе даде предлог до Владата за пролонгирање на нивниот престој во објектите каде што се сместени.
По поплавите во август минатата година, Владата одлучи лицата кои немаа услови да останат во своите домови да бидат сместени во одредени објекти не подолго од 180 дена, а оштетените имаа можност да аплицираат за средства од државата за санација на штетите во домовите./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вицепремиерот Николоски во работна посета на високо ниво на Велика Британија

Потпретседателот на Владата и министер за транспорт Александар Николоски, од попладнево е во дводневна работна посета на Обединетото Кралство, каде ќе оствари работнa средбa со Герет Томас, министер за бизниси, извоз и услуги, средба со министерот за Европа, Стефан Доти, како и со Дејм Карен, специјален пратеник на премиерот на Велика Британија за Западен Балкан. Исто така предвидени се средби и со претставници од бизнис заедницата во Лондон.
Тема на работните средби е зацврстување на стратешката соработка меѓу Република Македонија и Обединетото Кралство.
Предвидено е на средбите да се разговара за економската и трговска соработка со посебен фокус на инвестиции во инфраструктурниот сектор.
Покрај економските теми, ќе се потврдат и добрите политички односи меѓу двете земји.
Обединетото Кралство е стратешки партнер на Република Македонија во НАТО Алијансата и земја на второ место со која остваруваме најголем обем на трговска размена.
Македонија
Левица: Љутков ги повикал сметководителите надвор од работно време да изготвуваат плата спротивно на Колективниот договор

По денешниот протест на вработените во културните установи, кои за велигденските празници останаа без плата, попладнево им била дадена насока на директорите од културните установи да ги повикаат повторно на работа сметководителите за да пресметаат плата, но по нова методологија која деновиве ја изготвило Министерството за култура заедно со Министерството за финансии, тврдат од партијата Левица.
Од таму додаваат дека новата методологија, како што велат од Синдикатот за култура, не е според Општиот колективен договор и Колективниот договор за култура. Според Левица, и натаму остануваат спорни 10% од Општиот колективен договор за кои немало јасни насоки како да се пресметуваат.
„Додека вработените во културата протестираа, Министерството изготви сосема нов начин на исплата на платите според кој спорните 10% од Општиот колективен договор треба да се пресметуваат на поинаков начин, но институциите не почнале да ја изготвуваат платата затоа што насоките биле нејасни, а воедно не биле ни потпишани од министерот за култура, Зоран Љутков“, велат од партијата.
Левица најостро ги осудува игрите со културните работници кои траат со години и му порачува на министерот за култура дека не треба да им се извинува на вработените во културата туку да постапи според законските одредби за усогласување на платата според Општиот колективен договор и Колективниот договор за култура.
Македонија
Времето утре претпладне сончево, попладне пороен дожд и грмежи

Времето утре претпладне ќе биде сончево со умерена облачност. Попладне променливо облачно, на повеќе места ќе биде нестабилно со пороен дожд и грмежи, локално во форма на невреме со пообилен пороен дожд, грмежи, засилен ветер и изолирана појава на град, информира УХРМ.
Минималната температура ќе биде во интервал од 6 до 11, а максималната ќе достигне од 19 до 26 степени.
Во Скопје, променливо облачно, попладне во делови од котлината ќе има развој на нестабилна облачност со пороен дожд, грмежи и засилен ветер. Минималната температура ќе се спушти до 9, а максималната ќе достигне до 26 степени.
Под влијание на влажна и нестабилна воздушна маса во текот на оваа седмица времето ќе биде променливо облачно и нестабилно со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.