Македонија
„Влен“: Ахмети и Села молчат за коруптивните случаи на нивните роднини и кадри
Од „Влен“ со потсетување дека изминаа 20 дена од скандалозното признание вина и спогодба меѓу членот на Советот на јавни обвинители, Иџет Мехмети и Ислам Абази, двајцата првенци на ДУИ.
„Изминаа 15 дена откако прашуваме каде е Дрин Ахмети и дали е точно дека одамна е спроведен надвор од државата. Изминаа 3 дена откако објавивме дека претседателот на огранокот на Села во Боговиње е уапсен за профитирање од криминални коцкарници преку интернет.
Од сите страни пристигнуваат информации и докази за скандали од различни институции поврзани со кадрите на минатата влада. Се однесувале буквално како државниот буџет да бил приватно чекмеџе кое треба да ја задоволува нивната алчност. Ахмети и Села упорно молчат, и наместо да се извинат, најавуваат посети на нивните ограноци. Изгледа дека го храбрат членството со нова порција лаги – дека час поскоро ќе се вратат на власт“, велат од „Влен“.
Продолжува, како што велат, нивното политичко слепило со кое упорно се обидуваат да ги направат Албанците штит за политичката корупција на нивните перјаници кои сакаат да уживаат во нелегално стекнатиот имот.
Ова раководство на ДУИ, според коалицијата, уште е заглавено во минатото од пред 15 години кога Албанците сеуште им веруваа дека навистина се борат за нивните права.
„Времето на тие заблуди одамна заврши. Допрва ќе почне да се одмотува клопчето кое ќе ги разоткрива вистинските лица на политичките богаташи чија единствена цел било безмилосно да се граба од народните ресурси. Бидејќи Ахмети и Села упорно ја игнорираат пораката на албанските гласачи од 8-ми мај, ќе добијат уште погласна и појасна порака на локалните избори следната година“, потенцираат од „Влен“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерот за европски прашања, Муртезани, назначен за главен преговарач со ЕУ
На денешната седница на Владата, министерот за европски прашања, Орхан Муртезани, беше назначен за главен преговарач со Европската Унија за членство на Република Северна Македонија во Европската Унија, а за заменик на главниот преговарач е назначена заменик-министерката за европски прашања, Викторија Трајков.
На оваа седница исто така беше задолжено Министерството за европски прашања да подготви нова одлука за воспоставување структура за преговори за пристапување на Република Северна Македонија во Европската Унија.
Македонија
Тошковски на конференција во рамките на Берлинскиот процес: неопходна е координација за справување со илегалната миграција
Денеска делегација предводена од министерот за внатрешни работи, Панче Тошковски учествува на конференција на министри за внатрешни работи во рамки на Берлинскиот процес, која се одржува во Берлин, Сојузна Република Германија.
Одбележувајќи ја десетгодишнината од постоењето на оваа иницијатива, беше истакнато дека регионот на Западен Балкан живее историски моментум во однос на неговата европска перспектива, а токму Берлинскиот процес може да постигне синергија на индивидуалните напори на шесте земји од Западен Балкан како механизам за подготовка за пристапување кон ЕУ.
Во рамки на сесијата посветена на борбата против нерегуларна миграција како и нелегално криумчарење мигранти, министерот Тошковски истакна дека миграцијата и миграциските движења веќе подолго време се еден од главните предизвици, не само за регионот на Западен Балкан, туку и за Европа и дека е неопходна координација на сите постоечки иницијативи и мерки за справување со илегалната миграција, криумчарењето мигранти и трговијата со луѓе, и тоа не само од страна и во регионот на Западен Балкан, туку и на ниво на Европската унија и нашите меѓународни партнери.
Во обраќањето во рамки на сесијата за борба против организиран криминал, Тошковски подвлече дека без оглед дали станува збор за организиран криминал, трговија со луѓе, илегални миграции, трговија со наркотици, навистина е важна секоја иницијатива за регионално поврзување во борбата против организираниот криминал и брзата размена на информации меѓу службите. Во таа заедничка борба против организираниот криминал, а особено кога станува збор за следењето на парите и финансиските структури на организираните криминални групи, од есенцијална важност е да се интегрираат сите надлежни институции, развивајќи на тој начин систем за рано предупредување како моќна алатка во борбата против организираниот криминал и другите незаконски активности.
Македонија
Филков – Солдатов: изразена подготвеност за продолжување на соработката во областа на бесплатната правна помош, зајакнување на капацитетите на затворскиот систем, економскиот криминал
Министерот за правда Игор Филков оствари средба со раководителот на Програмската канцеларија на Совет на Европа во Скопје, Олег Солдатов и претставници од Програмската канцеларија на Совет на Европа.
На средбата се дискутираше за соработката на Министерството за правда за проектите кои се имплементираат во рамките на канцеларијата на Советот на Европа во Скопје, а се поврзани со работата на Министерството за правда.
Министерот за правда изрази подготвеност да се продолжи со интензивна соработка во областа на бесплатната правна помош, зајакнување на капацитетите на затворскиот систем, слободата на изразување и медиумите, борбата против трговијата со луѓе, економскиот криминал , борбата против говорот на омраза, нетолеранцијата и дискриминацијата.
Министерот истакна дека соработката и поддршката на Советот на Европа е исклучително важна и значајна , сите области ќе бидат опфатени подеднакво и ќе се пристапи со заедничка соработка за успешно реализирање.