Македонија
ВМРО-ДПМНЕ: Додека министерот за здравство, Меџити, живее во куќа од речиси милион евра, животот на пациентите со цистична фиброза виси на конец

Додека Меџити живее во куќа од речиси милион евра, животот на пациентите со цистична фиброза виси на конец, лекот „трикафта“ и понатаму го нема за сите, обвини ВМРО-ДПМНЕ.
Од таму додаваат дека пет месеци пациентите со цистична фиброза се оставени без лекот „трикафта“.
„Пет месеци Владата на СДС, ДУИ и Алијансата за Албанците не може да обезбедат лек за сите 140 пациенти. Нов министер, стари проблеми. Пациенти умираат, другите едвај преживуваат, а министерот за здравство, Меџити, наместо да даде јасен одговор, изјавува дека не зависи сè од него.
Па јавно прашуваме, ако Владата и министерот за здравство, Меџити, не може да набават лек за 140 пациенти, тогаш како може да очекуваат граѓаните да ги подобрат состојбите во здравството?
Бараме под итна реакција од надлежните и одговор од министерот за финансии, Фатмир Бесими, уште колку ќе се чека лекот да биде набавен?“, прашаа од опозициската партија.
Како што велат, пратеничката група на ВМРО-ДПМНЕ дала поддршка за законските измени сè со цел да се обезбедат потребните финансиски средства за лекот, а лек сè уште нема.
ВМРО-ДПМНЕ ја обвини Владата на СДС, ДУИ и Алијансата за Албанците дека ги дели луѓето и по болест и целосно го урнаа здравствениот систем.
„Доста е од негрижата и неспособноста на Владата. Потребни се итни промени“, порачаа од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ароганцијата на некои во „Вреди“ станува одвратна, Чаир беше лекција, а секоја лекција се прифаќа со достоинство, вели Османи

Чаир беше лекција, а секоја лекција се прифаќа со достоинство, напиша на социјалните мрежи Бујар Османи.
„Ја презедов мојата одговорност и му честитав на победникот, бидејќи дури и во овие околности сакам да оставам зад себе наследство на политичка култура, како што правев во текот на целата кампања.
Но, ароганцијата на некои во „Вреди“ станува одвратна.
Не прифаќам дека поради оваа причина резултатот на ДУИ и коалицијата треба да биде погазен.
Со 114 илјади гласови, НАИ останува најголемата сила и легитимен претставник на Албанците.
Али Ахмети е и останува неоспорен идеолог и лидер на Албанците“.
Навредите кон него, како што додава Османи, не се знак на политичка сила, туку знак на морална слабост.
„Овие ниски напади имаат една цел, да донесат деморализација пред вториот круг,
но ќе се случи спротивното: единство и решеност.
Албанците дадоа масовна поддршка во првиот круг, а во вториот круг мора да потврдиме кој навистина ја држи нивната политичка волја.
НАИ останува гласот на Албанците, додека Али Ахмети, нивниот морален и идеолошки столб.
Ги поканувам сите Албанци во вториот круг да го потврдат ова достоинствено и масовно“.
Македонија
Герасимовски: Спроведуваме вонредна есенска дератизација на целата територија на Општина Центар

Службите на Општина Центар заедно со Институтот за јавно здравје Скопје, веќе 5 дена спроведуваат вонредна есенска дератизација, со која се опфатени 1.980 шахти, соопштија од Општина Центар.
Дератизацијата, како што е наведено во соопштението, се спроведува со цел уништување штетни глодари и превенција од заразни болести, како дел од мерките што општината ги презема за заштита на населението.
„Спроведуваме вонредна дератизација со цел да ги спречиме сите можностите од појава на зараза. Во услови на хаос во градот во однос на јавната хигиена, оваа акција е важен чекор за сузбивање на потенцијални извори на болести“ рече Герасимовски.
Општина Центар информира дека препаратот е специјално дизајниран за контрола на популацијата на глодари и е сертифициран од овластен производител, обезбедувајќи безбедност за другите животински видови.
Македонија
Утре променливо облачно со сончеви периоди, во наредните денови со повремени локални врнежи од дожд

Времето утре, променливо облачно со сончеви периоди. Кон крајот на денот и во текот на ноќта во западните делови ќе има повремен локален дожд. Ќе дува слаб до умерен јужен ветер. Минималната температура ќе биде во интервал од 6 до 13, а максималната ќе достигне од 16 до 22 степена.
Во Скопје, променливо облачно со сончеви периоди. Ќе дува слаб до умерен јужен ветер. Минималната температура ќе се спушти до 10, а максималната ќе достигне до 20 степени.
Во наредните денови следува период на променливо облачно време со повремени локални врнежи од дожд.
Во петок и понеделник врнежите ќе бидат поројни со услови за појава на грмежи, а во понеделник наместа и пообилни. Ќе дува засилен, повремено силен ветер од јужен правец кој ќе надминува брзина од 70 km/h.