Македонија
ВМРО-ДПМНЕ бара расправа за адвокатските услуги на власта
ВМРО-ДПМНЕ поднело иницијатива до собраниската комисија за финансирање и буџет за надзорна расправа за склучените договори за консултантски, адвокатски и нотарски услуги на Владата, државните органи и претпријатијата со целосна, делумна или доминантна сопственост на државата.
Во иницијативата се наведени примерите за кои „А1он“ веќе истражуваше во два наврати – станува збор за огромни суми пари кои се одлеваат од буџетот на јавните претпријатија за адвокати кои се блиски до владејачките структури.
„Можноста за склучување договор во четири очи со дискреционо право на раководното лице или топ-менаџментот отвора сомнеж за излевање огромни финансиски средства кон одредени адвокати, нотари и консултанти за нивни услуги. Во изминатиот период во повеќе наврати протекоа бројни информации за ангажирани адвокатски друштва на лица носители на јавни функции или во роднинска врска со носители на јавни функции. Очигледна е тенденцијата одредени адвокатски друштва да склучуваат со Владата, органите на државната управа и јавните претпријатија“, се вели во иницијативата.
Како примери се наведени случаите за кои „А1он“ веќе пишуваше – дека адвокатското друштво „Де Леге“ кое е ангажирано од ЈП „Водовод и канализација“, а еден од сопствениците е пратеничката од СДСМ Снежана Калеска-Ванчева. Тука е и Стефан Јосифовски, адвокат кој го застапува СДСМ, а воедно е ангажиран и како адвокат на „Водовод и канализација“, Мери Младеновска Ѓорѓиевска, која е советник во кабинетот на Кочо Анѓушев а се јавува како адвокат во повеќе јавни претпријатија, советникот на премиерот Зоран Заев, Миле Зечевиќ, кој исто така се јавува како адвокат во државните служби.
Целта на надзорната расправа, како што стои во иницијативата до Собранието, е да се подобри транспарентноста и да се види колку пари добиваат адвокатите кои се на јавни функции или, пак, нивните роднини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Арсовска: „Храбриот“ Меџити наместо да дојде во Чаир заедно со неговата „принцеза на дивоградбите“, промовира туѓи проекти

Изет Меџити наместо да дојде во Чаир, таму каде што е најповикан заедно со неговата „принцеза на дивоградбите“, тој се исмева со граѓаните додека промовира туѓи проекти, вели градоначалничката на Град Скопје, Данела Арсовска, по промоцијата на електричните автомобили.
Арсовска вели дека проектот за споделување на автомобили е проект започнат во соработка со приватна компанија и претпријатијата на градот Скопје.
„’Храбриот’ Меџити никаде го нема да се соочи на терен со мене за дивоградбите кои тој и Висар Ганиу со години спротивно на закон ги граделе и легализирале во Чаир, со фалсификување на документи и одобренија за тие дивоградби“, вели Арсовска.
Срам за Македонија и оваа влада, додава таа, се Изет Меџити и Висар Ганиу.
„Замислете, човек кој стои позади стотици дивоградби, ставил во ризик илјадници граѓани, фалсификувал документи со својот измеќар, сега е вицепремиер и промовира туѓи проекти пред медиумите и граѓаните“, вели Арсовска.
Македонија
ВМРО-ДПМНЕ: Заев се сончаше по плажите додека беснееја пожари

Заев се сончаше по плажите додека беснееја пожари, Владата предводена од ВМРО-ДПМНЕ има конкретен план за справување со пожари во претстојната сезона, реагира ВМРО-ДПМНЕ на обвинувањата од СДСМ.
„Во време на СДС, Заев се сончаше по плажите и не се врати во државата додека во Македонија беснееја пожари. Седум години државата беше оставена без пилоти и со стари возила и технички средства. 7 години двата авиони за гаснење на пожари беа вон функција и без пилоти. 7 години СДС не инвестираше во возила за гаснење на пожари и во технички средства. Владата предводена од ВМРО-ДПМНЕ работи на сериозна и целосна трансформација на целиот систем за управување со кризи“, пишува во реакцијата.
Од таму велат дека „Ер тракторите“ моментално се на сервисирање и во краток рок се очекува да има три „ер трактори“ во пресрет на сезоната на пожари.
„Владата предводена од ВМРО-ДПМНЕ работи посветено и има план за полесно справување во претстојната сезона на пожари“, велат од партијата.
Македонија
Јавно објавен предлог – законот за ратификација на Договорот со Обединетото Кралство

Предлог законот за ратификација на Договорот со Обединетото Кралство пристигна во Собранието, сѐ ќе биде јавно и транспарентно, објави пратеникот Никола Мицевски од ВМРО-ДПМНЕ.
„Само што пристигна во Собранието – Предлог на законот за ратификација на Договорот меѓу Владата на Република Македонија и Владата на Обединетото Кралство на Велика Британија и Северна Ирска во врска со партнерството за реализација на инфраструктурните проекти. Ништо нема да биде скриено до јавноста и секој детал ќе биде јавно објавен и транспарентен. Ова е историски договор. Ова е историска работа за нашата држава“, вели Мицевски.
Заедно со граѓаните, додаде тој, се обврзавме на обнова на Македонија и тоа го правиме секој ден.
„Тие се нашиот партнер. Железница, студентски дом, болници, хидроцентрали и многу нови проекти. После стратешкиот договор со Обединетите Американски Држави – ова е уште еден огромен успех за Република Македонија“, рече Мицевски.