СДС во работната група за уставните измени како да пресликал своја општинска организација, сите кадри на Кацарска-судството и дежурни платени пера на СДС и ДУИ сакаат да го кројат Уставот, соопшти ВМРО-ДПМНЕ.

Очигледно е дека ниту еден експерт, интелектуалец од областа и професор не сака да биде дел од циркусот на власта, па најдоброто што го предлагаат се партиски луѓе и поранешни функционери извадени од пензија. Кога во врвот на списокот на СДС е Бранко Наумовски, татко на поранешниот градоначалник на Ѓорче Петров, Александар Наумовски, јасно е колку таа работна група навистина е експертска и независна. Одиме со ред.

Сали Мурати, претседател на Уставниот суд пред Кацарска, е судијата што им ги зголеми платите на судиите под образложение дека се гладни, а самиот тој има куќа во Гостиварско, стан во Гостивар и стан во Скопје. Како независен експерт власта ја продава и Беса Арифи, сестра на долгогодишниот функционер на ДУИ и градоначалник на Тетово, Теута Арифи, но и Маргарита (Цаца) Николовска, кадар на СДС од претседател на ДИК, судија до судија во Стразбур.

Бајрам Положани, дежурен поддржувач на криминалното СЈО, кој не испушташе дебатна емисија да дава легитимитет на обвинителите криминалци. Ана Чупеска, која себе си претставува за експерт, а во слободно време поддржува повици за апсење новинари и нивно затворање. Самата Чупеска му даде поддршка на Бранко Тричковски, кој се придружи во хајката на Ахмети кон новинарите на националните телевизии, како „Телма“ и „Алфа“, велат од партијата.

Од таму додаваат дека по мерка на СДСМ е и Јагода Митревска, која нагласува дека има искуство од набљудување кампањи во Русија. Па, така, од набљудувач на кампањи во Русија до креатор на уставните измени во Македонија, велат од ВМРО-ДПМНЕ.

„На листата експерти на СДС се најдоа и нивните дежурни поддржувачи во дебатните емисии, како Марија Пандевска и Јетон Шасивари. Составот на работна група е доказ дека СДС и ДУИ не уживаат никаква поддршка за своите политики во стручната јавноста, па морале да вадат партиски луѓе, кои ги користат како дежурни напаѓачи врз ВМРО-ДПМНЕ, поранешни функционери и луѓе со контроверзни ставови“, порачаа од опозициската партија.