Македонија
ВМРО-ДПМНЕ: Груби и СДС кријат милиони од корупцијата во судството

ВМРО-ДПМНЕ во последното соопштение ги обвини Артан Груби и неговите соработници од СДС за системско мешање во правосудството во текот на седумгодишното владеење на коалицијата. Според партијата, со притисоци врз судиите и обвинителите, судските одлуки се носеле под нивен диктат.
„Артан Груби, поддржан од СДС, со години влијаел врз судството. Судиите и обвинителите се бирале во партиските штабови на СДС и ДУИ, а одлуките што ги носеле биле под негов диктат“, велат од ВМРО-ДПМНЕ, истакнувајќи дека Груби бил „алфа и омега“ во правосудните органи.
Од партијата прашуваат: „Колку одлуки биле донесени под диктат на Артан Груби, и колку предмети се спречени да стигнат до суд?“ и потенцираа дека најновите обелоденувања од САД ја потврдиле корупцијата, поставувајќи го Груби на црната листа поради вмешаност во незаконско влијание врз судските одлуки.
„Колку пари зел Артан Груби за да влијае врз судски одлуки? Со кого ги делел парите што ги спечалил на сметка на правдата?“, прашаа од ВМРО-ДПМНЕ, нагласувајќи дека довербата на граѓаните во судството е во пад, најмногу поради вмешаноста на Груби и СДС во неправедното судење.
Од ВМРО-ДПМНЕ сметаат дека сега, кога повеќе не можат да влијаат на судските одлуки, ДУИ и СДС се во паника. Тие обвинија дека им следи одговорност за сите криминални активности кои се случувале под нивно владеење, за што ќе мораат да одговараат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сообраќајот се одвива непречено, по суви коловози

Сообраќајот на државните патишта се одвива непречено, по претежно суви коловози. Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Мостот на река Вардар на регионалниот пат Р1312, кај Башино село е затворен за секаков вид на сообраќај.
Македонија
Денес во Дебар Маало настан по повод 73. роденден на големиот драмски автор Горан Стефановски

По повод 73. роденден на големиот драмски автор Горан Стефановски, денеска, кај спомен-клупата во Дебар Маало ќе се одржи настанот „Горан е тука“.
Како што стои во соопштението на Општина Центар, на одбележувањето ќе настапи музичката група „Аудио Скопје“ и ќе се читаат одбрани текстови од и за Горан, во изведба на Саша Димитриевска, Мирјана Трпковска – Костовска и Трајанка Илиева – Вељиќ.
Со свои настапи, додаваат, ќе се приклучат и пријатели од неговата младост, актери и уметници, Дарко Вељиќ ќе изведе пантомима, додека неговиот син Игор Стефановски ќе приреди музички сет како симболичен поздрав до ликот и духот на својот татко.
-Горан Стефановски не беше само писател – тој беше совеста на едно време, гласот што не потсетува кои сме и каде одиме. Неговите зборови сè уште одекнуваат во културниот простор на Македонија, во нашите мисли, во улиците на Дебар Маало. Со секој збор што го напишал, тој создал светови во кои се огледува нашето минато и иднина. За нас е чест што преку овој настан, дел од Програмата за култура за 2025, му оддаваме почит на еден од најголемите умови што ги имала оваа земја. Придружете ни се во овој свечен и искрен омаж на човекот чиј дух продолжува да живее преку неговите реченици и идеи. Горан не е само спомен – тој е присуство. Горан е тука, вели градоначалникот на Општина Центар Горан Герасимовски.
Организатор на настанот е Здружението на граѓани Тим Театрос К од Скопје, кое со години го негува сеќавањето на Стефановски.
Македонија
Денес и утре облачно, од вторник сонце

Времето во Македонија денеска ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и услови за изолирана појава на град.
Во Скопје, променливо облачно, попладне во делови од котлината ќе биде нестабилно со пороен дожд, грмежи, засилен ветер и услови за изолирана појава на град.
Утре времето ќе биде променливо облачно и посвежо со повремен локален дожд, претежно во западните делови. Ќе дува слаб до умерен ветер од источен правец. Минималната температура ќе се движи од 5 до 11, а максимална од 15 до 22 целзиусови степени.
Од вторник ќе имаме сончево време со мала локална облачност. Максималните температури ќе се движат од 18 до 25 целзиусови степени.