Македонија
ВМРО-ДПМНЕ најави претставка до Уставниот суд за ставање привремена мерка на Законот за патните исправи
Ќе побарам поддршка од извршниот и од централниот комитет на ВМРО-ДПМНЕ за поднесување претставка пред Уставниот суд за ставање привремена мерка на Законот од 2021 година за патните исправи, објави лидерот на опозицијата, Христијан Мицкоски.
„Имаме две опции – едната е во парламентот да се донесе закон со кој рокот ќе се продолжи и тоа е една од опциите. И втората опција, на која работи ВМРО-ДПМНЕ, е дека денеска ќе побарам поддршка од извршниот и од централниот комитет е да се поднесе претставка пред Уставниот суд како суд што се грижи за Уставот, кој е над сите закони, и да се стави привремена мерка на законот од 2021 година да биде надвор од сила сѐ до следното одлучување дали е тој уставен или не, а се однесува на патните исправи или пасошите. Доколку Уставниот суд е експресен како што видовме во минатото, тогаш може уште во текот на следната недела да постапува и да ја донесе таа привремена мерка. Еве да не се сведе тоа на партиско-политичка преписка во парламентот, Уставниот суд одговорен за Уставот да донесе привремена мерка надвор од сила сѐ до следното негово одлучување дали е уставен или не е уставен и на тој начин другиот ден ќе нема редици такви какви што има“, заклучи Мицкоски.
Тој вели дека МВР не располага со доволен капацитет да може во брз рок да бидат променети приближно 2,5-2,7 милиони македонски пасоши во согласност со обврските што се преземени, а се дел од законското решение донесено во 2021-година.
„Таму имате два апарата кои работат од 7 до 10 часа на ден, секој од нив има капацитет од 120 пасоши на час или пак, ако тоа го сведеме во континуирана работа без прекин вие можете годишно максимум до половина милион патни исправи да промените. И тоа во идеални услови, под услов овие апарати да работат без дефект што значи дека се потребни 6 години со ова темпо и динамика да дојде до промена на сите патни исправи или со други зборови, ако 2021-ва година е донесен Законот тогаш најрано 2027-ма година може да се изврши промена на сите 2,5 – 2,7 милиони македонски патни исправи“, истакна Мицкоски одговарајќи на новинарско прашање.
Додаде и дека втора работа што МВР и Спасовски ја прават е тоа што доцнат со набавката за обрасци.
„Втора работа МВР на чело со Спасовски доцни со набавка на обрасците потребни за да се издадат овие патни исправи. Зошто тоа го прави? Затоа што доаѓа техничка влада, технички министер од редовите на ВМРО-ДПМНЕ и сега ќе се создаде вакум простор до март кога треба да дојдат новите обрасци и тогаш на примитивен простачки начин да се обвинува идниот технички министер кој ќе дојде од ВМРО-ДПМНЕ, тоа е целта политичка на Оливер Спасовски и тие кои моментално го водат МВР“, рече Мицкоски.
Мицкоски укажа на тоа дека и после 12 февруари личните карти се важечки.
„Трета работа која граѓаните треба да ја знаат е дека личните карти и после 12 февруари се важечки и дека пензионерите со тие лични карти ќе може да ја подигнуваат пензијата и понатаму. Тие лични карти во внатрешниот промет се валидни документи и немаат потреба да бидат загрижени дали ќе може да се гласа со тие лични карти бидејќи ќе може да се гласа бидејќи тие не се дел од промената на документите. Апелирам до граѓаните оние кои имаат важечка лична карта да бидат спокојни бидејќи таа и после 12-ти февруари останува во правниот промет во Македонија. Пензионерите ќе може да си ги подигнуваат своите пензии, вработените своите плати, студентите своите стипендии, кредити итн. Да не подлегнуваат на обидите на власта за манипулација а потоа да се сврти вниманието кон техничката влада односно кон техничкиот министер кој ќе дојде од ВМРО-ДПМНЕ“, вели Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.