Македонија
ВМРО-ДПМНЕ на трибина заклучи дека власта ги нарушила националните интереси и повика на одговорност

Опозициската ВМРО-ДПМНЕ на трибина повика на одговорност и ја обвини власта дека ги нарушила националните интереси во преговорите со Бугарија.
Портпаролката на опозициската партија Марија Митева рече дека власта одбила експерти на ВМРО-ДПМНЕ во тимот на надворешни работи, затоа што ќе се откриело за што преговараат со Бугарија.
„Причината поради која што се случуваат сега овие какафонични изјави лежи во тоа што планот на Социјалдемократскиот сојуз по однос на предлогот бил малку поразличен од тоа што сега се обидуваат да го презентираат во јавноста. Односно, при оние телефонски разговори или договарања јасно кажале дека ги прифаќаат сите услови кои што се предвидени во предлогот само да се отпочне првата меѓувладина конференција. Со тоа што од Социјалдемократскиот сојуз се надевале дека истиот ќе биде брзо изгласан во бугарското Собрание. Но, меѓутоа во бугарското Собрание состојбите тргнаа во друга насока, имено му се изгласа недоверба на премиерот Петков, И заради тоа имаше повеќе време јавноста да се запознае со предлогот кој што всушност Ковачевски, Бујар Османи и Маричиќ сами го договарале и го создале“, истакна Митева на денешната трибина насловена „Ќе има ли владина одговорност за трајното нарушување на националните интереси?“.
Митева рече власта се обидувала да го сокрие предлогот од јавноста.
„Времето е најдобар показател за состојбите, па чувствувам обврска да ги потсетиме граѓаните дека како политичка партија понудивме четири тима во четири клучни области, меѓу кои една од нив беше и надворешната политика каде што луѓе се добри познавачи на надворешната политика ќе бидат дел и ќе помогнат на оваа Влада во преговорите. Меѓутоа од денешна перспектива можеме да заклучиме зошто истиот беше веднаш одбиен, најверојатно од власта не сакале одблиску да ги видиме состојбите за што тие лично преговараат и договараат“, заклучи Митева.
Таа посочи дека националните интереси се нарушени од страна на власта и своите соговорници ги запраша кои се можните решенија што Македонија треба да ги преземе за да ги подобри преговарачките позиции и да ги поткачи на едно прифатливо ниво за разлика од тоа на кои позиции е денес државата.
„Тоа што е карактеристика на Владата на СДСМ и ДУИ е што тие почетокот на преговорите со ЕУ и тој фамозен датум не го претставуваа само како свој политички приоритет туку го претставуваа и го издигнаа на едно ниво на фаталност. Од самиот момент ние имаме реклами за ЕУ, имаме референдум на кој што едно од прашањата е дали сакате да го усвоиме тој и тој договор со цел да станеме членка на ЕУ, имаме фотографија од премиерот, од Бујар Османи и од клучните актери кои што ја соопштуваат на јавноста како историски успех за патот на Македонија кон ЕУ и дека сме добиле датум. Па дури и имавме разно разни билборди за бесплатно здравство, бесплатни вакцини, бесплатно образование во ЕУ за секого итн.“, потсети Антонијо Милошоски, пратеник и член на ИК на ВМРО-ДПМНЕ.
Милошоски посочи дека новиот концепт треба да биде инклузивен и доколку се случи смена на премиерот со сегашното мнозинство или смена на премиерот и неговиот тим преку нови избори со ново раководство и ново мнозинство кое што би добило доверба од граѓаните, тогаш треба сите партии без разлика кој е на власт и кој е на опозиција заеднички да одговорат на прашањето врз основа на податоците кои што ги има во телеграмите на МНР, кога ќе се случи следното полноправно членство и проширување на ЕУ.
„Мора да се стави крај на фаталистичкиот однос. А, кон фатализам посегаат или не се имуни на фатализам фрустрирани политичари, политичари кои го гледаат сопствениот, а не државниот и националниот интерес, политичари кои политиката ја сфаќаат како бизнис сфера, политичари олигарси, политичари кои се уморни веќе од товарот на моќта мислам особено на политичарите кои што произлегуваат од ДУИ. И тука би ги спомнала и политичари кои ЕУ ја доживуваат како Ел Дорадо, како совршена заедница догма иако врни политиколози зборуваат за проблемите внатре во ЕУ“, појасни Гордана Силјановска Давкова, пратеник од редовите на ВМРО-ДПМНЕ.
Таа потсети дека сегашната власт ги доби претседателските избори, парламентарните избори па дури и се обидуваше на локалните избори со реториката за ЕУ и Брисел, дека Македонија само што не добила датум.
„Во контекст како понатаму, јас сметам дека Македонија сама по себе претставува сопствен автентичен вредносен систем со сите недоследности, со сите слабости, цивилизациски градени низ вековите, хармоничен спој на просторот и времето и сега го имаме како таков. Тој не е идеален, и има многу проблеми, но проблемите произлегуваат од тоа кога политичката интерпретација навлегува во категории во кои што не е дозволено политиката да ги интерпретира. Тука е проблемот. Ние мораме да го надградуваме нашиот македонски вредносен систем. Мораме да создадеме амбиент и тоа во институциите, да продолжиме со стриктна поделба на власта – претседател, извршна власт, законодавна власт и судска власт. Реформи се потребни во правосудството, во здравството, градење на економскиот систем во смисла на нова инфраструктура. И сето тоа претставува наша македонска автентична домашна задача и таа мораме да си ја сработиме“, нагласи Марјан Ѓорчев.
Ѓорчев додаде дека целта на Македонија е наградување на вредносниот систем.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ганиу ќе ја тужи Арсовска: Моите адвокати спремаат тужби за невистините што ги зборува за мене чесната жена од Град Скопје

Во Чаир нема 150 згради дивоградби, нема дивоградби изградени на државно земјиште и нема темели за 50 нови дивоградби, кажа денес градоначалникот на Општина Чаир, Висар Ганиу. Најави тужба за градоначалничката на Скопје Данела Арсовска која два месеца шета по градилишта за дивоградби низ Чаир, го обвинува Ганиу за криминал, а минатата недела побара негово итно апсење.
„Моите адвокати работат на тужби за сите невистини за мене. Чесната жена од Градот Скопје манипулира со зборовите. Манипулира и со тоа што го кажа на прес-конференција. Во 2005 година кога стана градоначалник Изет Меџити имаше 13.000 дивоградби или над 75% од сите објекти во Општина Чаир беа дивоградби. Ние тоа го затекнавме, а таа често кажува дека 13.000 дивоградби се од мое време“, вели градоначалникот Ганиу.
Градоначалникот Ганиу тврди дека не е точна бројката од 150 дивоградби во Чаир што ја кажува градоначалничката Арсовска, ниту пак дека има дивоградби на државно земјиште.
„Не е вистина дека тие објекти што се изградени се на земјиште на РМ бидејќи Чаир е три квадратни километри и се е сопственост на некого, нема РМ земјиште, многу малку има. 150 згради што таа ги објавува се невистина и тоа може да се потврди. Најновата лага што ја кажува е 50 нови темели се отворени по Чаир. И тоа е лага“, рече градоначалникот Ганиу.
Лажните тврдења, Ганиу вели дека имаат цел да го дискредитираат него. Последниве денови Ганиу смета дека обвинувањата намалиле по објавите дека тој нема да биде кандидат за градоначалник на Чаир.
„Целата оваа афера што таа ја направи со дивоградбите во Чаир покажа дека само требаше да биде мегафон на ДУИ. Инструкциите ги добиваше од ДУИ“, обвини Ганиу.
За да го поткрепи ова тврдење, Ганиу кажа дека Општина Чаир не е прва по број на дивоградби ниту во земјава, ниту пак е на прво место по број на дивоградби во Скопје.
„Имаме записници во ЗЕЛС во кои стои изјава на министер за транспорт и врски дека во земјава од 2011 година кога истече рокот за легализација па наваму се изградени 130.000 дивоградби. Тогаш беше оваа полемика кога се даваше новиот закон за легализација. Од целава држава значи ние сме над дваесетто место по број на дивоградби, а во градот Скопје сме шести. Пет општини се пред нас. Со ниедна општина не се занимаваше госпоѓа Арсовска чесната жена од Градот Скопје, ова го велам бидејќи така ја знаат граѓаниве во Скопје. Се занимаваше само со Чаир бидејќи тоа им беше мета и тоа им беше работа што им ја даваше ДУИ“, вели градоначалникот Ганиу.
Категорично тврди дека не издавал одобренија за градење згради на деца,како што тврди Арсовска, а дали издадените одобренија понатака на нотар некој со наследни решенија ги ставил на име на деца вели дека не е негова работа да проверува.
Градоначалничката Арсовска, пак, за утре најави дека пред медиумите ќе ги покаже сите досега утврдени незаконитости поврзани со нелегалните и небезбедни градби откриени во Чаир.
Македонија
Таблетарната онколошка терапија од 4 август ќе може да се подигнува директно во аптеките

Денес, во рамките на континуираните активности за унапредување на здравствените услуги, генералните директори на Фондот за здравствено осигурување, Сашо Клековски и Бранко Аџигогов, заедно со заменик-министерот за здравство, Јовица Андовски, остварија работна посета на ЈЗУ Општа болница Велес.
Во фокусот на посетата беа состојбите со здравствените услуги на регионално ниво, унапредувањето на соработката помеѓу болницата и Фондот, како и презентирањето на новите мерки за подобрување на достапноста до онколошката терапија за пациентите.
Од 4 август 2025 година, пациентите кои се лекуваат со таблетарна онколошка терапија – анастрозол и летрозол, ќе можат својата терапија да ја подигнуваат директно во аптеките, на товар на Фондот.
„Со оваа мерка, пристапот до терапијата значително се олеснува, а пациентите ќе имаат поедноставена процедура. Потребно е само да добијат извештај од својот онколог, да земат рецепт од матичен лекар и со тоа да ја подигнат терапијата во аптека. Партиципацијата ќе изнесува околу 50 денари“, истакнаа генералните директори.
Во текот на посетата, беше најавена и набавка на нова медицинска опрема за потребите на болницата.
„Велешка Општа болница ќе набавува медицинска опрема за Интерно, за Очно, Детско и за Одделението за неврологија и психијатрија. Набавката е обезбедена од вкупно издвоените 40 милиони денари фондовски средства, од кои поголемиот дел се за подмирување на долгот на установата, а дел за плати на нововработените и за нова опрема,“ нагласи Клековски.
„Ќе се набавува медицинска опрема за повеќе одделенија. Ќе ја потенцирам најзначајната – за Одделението за офталмологија, каде веќе е набавен вакум апарат, а сега ќе се набави и микроскоп, со што ќе се комплетира опремата за редовна работа. Тоа значи дека во Велес ќе можат да се изведуваат и хируршки зафати на очи“, додаде Клековски.
Работната посета на Велешката болница е дел од пошироките активности на Фондот за приближување на здравствените услуги до граѓаните и воспоставување одржлив модел на лекување кој ги става пациентите во центарот на вниманието, велат надлежните.
Македонија
Сиљановска-Давкова со Советот на амбасадори: потенцирана важноста од именување на кариерни амбасадори

Претседателката Гордана Сиљановска-Давкова денеска прими претставници на Советот на амбасадори, предводени од претседателката, амбасадорката Александра Наќева Ружин. На средбата присуствуваа и амбасадорите: Мухамед Халили, Љупчо Арсовски, Иљаз Сабриу, Тихомир Илиевски и Ивица Боцевски.
Тие изразија подготвеност за соработка и поддршка на институцијата претседател, преку утврдувањето на надворешно-политичките приоритети, независни и стручни анализи, јавни дебати, совети и консултации за меѓународните прашања.
Беа детектирани потенцијалните области за меѓусебна соработка и понудени идеи, предлози и иницијативи, коишто би придонеле за зајакнување на надворешно-политичките капацитети на државата.
Со цел унапредување на македонската дипломатија, соговорниците ја потенцираа важноста од именување на кариерни амбасадори како прв избор, истакнувајќи го значењето на нивното искуство за соодветно и достоинствено претставување на земјава во светот.
Претседателката ги поздрави амбициите на амбасадорите за поттикнување на професионален дијалог за прашања од национален интерес и изрази подготвеност за натамошна комуникација. Укажувајќи дека првата слика за државата е најбитна, Сиљановска-Давкова посочи дека искуството и потенцијалот што го имаат членовите на Советот може да претставува драгоцена помош во носењето на одредени одлуки.
На средбата таа ги реафирмираше заложбите за правична застапеност на жените во дипломатијата и придобивките од формирање на Регионален центар за извонредност за жени, мир и безбедност.
Соговорниците разменија мислења за македонската надворешна политика, односите со соседите, за Преспанскиот договор и членството на државата во меѓународните организации.