Македонија
ВМРО-ДПМНЕ: Обвинителниот акт за модуларната во Тетово не ги опфаќа вистинските виновнци

Најавениот обвинителен акт за трагедијата со модуларната болница е нецелосен и не ги опфаќа вистинските виновници, туку лица што се далеку подолу на прирамидата на одговорноста, обвинуваат од ВМРО-ДПМНЕ. Како што наведуваат од партијата, тоа само покажува дека и случајот со модуларната болница, исто како и со трагедијата со „Дурмо турс“ и „Беса травел,“ се водат без да се најде вистинскиот системски причинител поради што десетици животи беа предвреме згаснати.
„Обвинителниот акт не ги дава одговорите која е улогата на Министерството за здравство во изградбата на овие објекти, како од надлежните инспекции добиле дозвола да работат, која е одговоноста за материјалите од кои беше изграден објектот и редица други фактори што доведоа до трагедијата.
Семејствата на настраданите во ваков случај, со вакво судство и обвинителство нема да ги добијат вистинските одговори, како и поради што настрадаа нивните најблиски. Нивната болка нема утеха, но уште поболно е што во Македонија се создава систем на неказнивост, во која, наместо по коњот, се удира по самарот. Затоа, за жал, системот на неказнивост создава нови и нови трагедии. Тоа мора да престане. Вистинските виновници мора да одговараат и во случајот со тетовската модуларна болница и во секој друг случај затоа што само така може да се изгради владеење на правото и правна држава“, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Истрагата за пожарот во „Пулс“ проширена на уште 19 лица: министри, инспектори, директори меѓу новоосомничените

Основното јавно обвинителство Кочани денеска донесе Наредба со која ја прошири истрагата во врска со пожарот во кочанската дискотека „Пулс“ на нови 19 лица. Сите тие се осомничени за Тешки дела против општата сигурност од член 292 во врска со член 288 од Кривичниот законик.
Станува збор за службени лица, кои во периодот од 2012 година до 16.03.2025 година, заеднички но секој од аспект на своето својство, надлежности и одговорности, воопшто не постапиле според прописите за мерките за заштита и со тоа предизвикале опасност за животот и телото на луѓето и имот од големи размери. Меѓу новите осомничени се овластени градежни инспектори во Општина Кочани, директори и генерален инспектор од Дирекцијата за заштита и спасување, министри за економија, државни секретари и други службени лица од тоа министерство, како и инспектори од Државниот пазарен инспекторат.
Постојат сомненија дека нивните незаконити дејствија и пропусти во континуитет довеле до тоа кабаре КЛУБ ПУЛС во Кочани од самиот почеток во подолг временски период па се до настанување на пожарот да продолжи да врши угостителска дејност без воопшто да исполнува законски услови за тоа и со нарушување на сите безбедносни правила по животот на лицата кои го посетувале објектот. Како резултат на тоа, при користење на пиротехнички средства на 16.03.2025 година за време на настапот на музичката група ДНК, бил предизвикан пожар во кој настапила смрт на 61 лице меѓу кои 6 деца, а биле повредени уште 197 лица од кои 25 деца.
До крајот на денов, Основното јавно обвинителство Кочани до Основниот суд во Кочани ќе достави предлози за определување соодветни мерки за обезбедување на присуството на секој од новоосомничените.
Со ова, до овој момент, кочанското обвинителство во врска со пожарот поведе истрага против вкупно 45 физички и три правни лица. Еден од нив, по отворањето на истрагата почина како последица на повредите здобиени во пожарот и од тие причини, по целосно прибавување на медицинската документација, постапката за него ќе биде запрена.
Македонија
(Видео) Граѓани со часови се заглавени во подземниот паркинг на ГТЦ оти автоматите за наплата не работат, а службите се отстутни

Вистински хаос се случува попладнево во подземниот паркинг на ГТЦ. Вознемирени граѓани кои се обратија до нашата редакција велат дека два часа се „заробени“ на паркингот, откако паркоматите престанале да работат, а службата за наплата била отсутна.
На шалтерите каде досега рачно се плаќаше паркингот, сега има залепено листови на кои пишува дека наплатата се извршува на автоматите.
Но, граѓаните кои се таму велат дека работел само еден автомат, но бил многу бавен, па се создала целата колона.
Дел од граѓаните се со мали деца, дел, пак, коментирале дека брзаат за на аеродром и ќе го испуштат летот.
Како што ни рекоа сведоци, по некое време рампите биле кренати и сега возилата излегуваат бесплатно. Тоа, сепак, ќе потрае со оглед на тоа што има голем број возила внатре на паркингот, а надвор има семафор.
Од ГТЦ сè уште нема официјално соопштение за причините за дефектот.
Лани во февруари поскапе паркирањето во ГТЦ и наместо 50, чини 70 денари.
Македонија
(Видео) „Задоцнета реакација“ – протест на семејствата на загинатите во трагичниот пожар во дискотеката „Пулс“

Во Кочани и денеска семејствата на загинатите во трагичниот пожар во дискотеката „Пулс“ излегоа на протестен марш.
Маршот се одвиваше под мотото „Задоцнета реакција“.
Граѓаните, симболично, тргнаа од Паркот на Револуцијата во 12 часот и 5 минути, за да го искажат незадоволството од задоцнетата реакција на надлежните институции, како една од причините за големата трагедија.
Колоната помина пред Трговскиот центар кратко задржувајќи се пред кафе барот чиј сопственик ја имаше и дискотеката, а оттаму се упатија пред зградата на Општина Кочани каде се наоѓаат и просториите на Државниот пазарен инспекторат. Продолжија пред Полициската станица, а потоа пред Основниот суд и Основното јавно обвинителство побараа информации за досегашната истражна постапка.
Граѓаните на маршот истакнаа транспаренти со натписи „Нашите ангели заслужуваат правда“, „Стоп за селективна правда“, „Ова не е несреќа, ова е убиство“ и слично.
Присутните најавија дека ваквите протести ќе продолжат сѐ додека не се откријат и казнат виновниците за трагичниот настан.