Седми ден нема разврска за случајот со насилникот градоначалник Курто Дудуш. Зоран Заев и Јавното обвинителство го штитат градоначалникот пулен Курто Дудуш за кој целата јавност слушна како малтретира и се изживува врз човек во неговата канцеларија, велат од ВМРО-ДПМНЕ преку соопштение.

„Седми ден, иако Јавното обвинителство има материјален доказ што го слушна целата македонска јавност, не го вика Дудуш за да земе исказ од него ниту, пак, од другото лице што се слуша во аудиозаписот. Седми ден Јавното обвинителство, наместо да го гони Дудуш за изживувањето, истражува за тоа дали снимката е легална или не.
Да беше Македонија правна држава и со неа да не управуваше оваа криминална влада, досега во најмала рака Дудуш требаше да биде повикан на исказ, а истрагата ќе беше во поодмината фаза“, велат од ВМРО-ДПМНЕ.

Опозицијата обвинува дека Зоран Заев и Јавното обвинителство на секој можен начин се обидуваат да го забошотат случајот со Курто Дудуш и да го спасат од одговорност.

„Вчера, на собраниска седница им се гасеа микрофони на пратеници кога сакаа јавно да зборуваат за случајот.
Срамно и недозволиво е власта да ја држи јавноста во мрак, а институциите во грч, само за Курто Дудуш да не оди во затвор. Зоран Заев и Јавното обвинителство треба да знаат дека јавноста го следи случајот и дека нема да биде заборавен. Зоран Заев и Јавното обвинителство треба да знаат дека одговорност ќе има како за Дудуш така и за луѓето од власта што го затскриваат случајот“, додава ВМРО-ДПМНЕ во соопштението.