Македонија
ВМРО-ДПМНЕ: СДСМ и Шилегов потрошија 4 години и ништо не направија за јавниот транспорт

СДСМ и Петре Шилегов како ексградоначалник на скопјани им потрошија 4 години, а ништо не направија за јавниот транспорт во градот и сообраќајниот хаос. Четири години мавтаа со хартија и зборуваа за проектот „БРТ“, кој патем крајно нетранспарентно без мислење на експертската јавност го наметнуваа. На крајот уште понетранспарентно непосредно пред изборите и го тендерираа, соопшти ВМРО-ДПМНЕ.
Од партијата додаваат дека овој проект е поврзан со големи сомнежи за корупција, кои, како што велат, ќе бидат детално истражени и презентирани пред јавноста.
„Петре Шилегов и СДСМ на скопјани им должат одговори зошто цело време кријат колку зеленило треба да се уништи за спроведување на проектот ‘БРТ’? Да потсетиме Шилегов освен што ќе остане запоменет како градоначалник кој изгради мост кој завршува во дневна соба , предвиде и уништување на мостот Обединети нации еден од клучните мостови во Скопје, содржано токму во проектот ‘БРТ’.
И на крајот и најважно, овој проект за кој говорат од СДСМ, освен што не е комплетно и детално испланиран, освен што чини огромни милиони, треба да се спроведе дури за 10 години. На Скопје му требаат проекти кои ќе понудат решение на актуелната состојба со сообраќајниот хаос и јавниот транспорт, која Шилегов ја остави и ништо не презеде во таа насока“, се вели во соопштението на партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
32-годишен скопјанец осомничен за разбојништво во Бучимци: маскиран и со ловечки нож ограбил соселанец

Јавен обвинител од Основното јавно обвинителство Скопје поведе постапка против едно лице осомничено за кривично дело – Разбојништво од член 237 став 4 во врска со став 1 од Кривичниот законик.
Осомничениот 32-годишен скопјанец, на 18 август, маскиран со маица со која си го покрил лицето и капа, преку незаклучена влезна врата влегол во домот на негов соселанец во селото Бучимци. Во рацете држел ловечки нож и кога во една од собите го затекнал сопственикот, му се заканил дека ќе го убие ако не му даде пари.
Оштетениот, исплашен за својот живот, извадил 4.000 денари од комодата, но го замолил разбојникот да му дозволи да задржи барем 1.000 денари, бидејќи му се неопходни.
Осомничениот се согласил и го напуштил местото со 3.000 денари кои противправно ги одзел од сопственикот.
Јавниот обвинител до судијата на претходна постапка достави предлог за определување мерка притвор за осомничениот, бидејќи постојат околности кои укажуваат на опасност од бегство, можност за влијание врз сведокот/оштетен со заплашување и уценување, како и можност да го повтори делото.
Македонија
Зголемена фреквенција на возила на граничните премини Табановце и Богородица

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП „Табановце“ времето на чекање за влез е околу 20 минути, за излез е околу 40 минути.
На ГП „Богородица“ времето на чекање за излез знесува околу 20 минути, додека на останатите гранични премини од македонска страна нема подолги задржувања при влез или излез од државата.
Македонија
Вицепремиерот Николоски во Будимпешта на прослава на Националниот ден на Унгарија

Вицепремиерот Александар Николоски на покана на премиерот на Унгарија, Виктор Орбан, присуствува на Националниот ден кој се слави во чест на Свети Стефан основачот на унгарската држава и христијанството во Унгарија.
Покрај учеството на прославата на националниот ден, предвидени се повеќе средби со високи претставници на владата на Унгарија, неколку министри и потенцијални инвестиции. На средбите е предвидено да се разговара за динамиката на проектите во Македонија како и за идната засилена економска соработка помеѓу двете држави.
Посетата на вицепремиерот е уште една потврда за одличното пријателство и соработката помеѓу Македонија и Унгарија, се додава во соопштението на Министерството за транспорт.