Македонија
ВМРО-ДПМНЕ: СДС и ДУИ сè што фатија запустија, а најмногу образованието

На први септември уште една учебна година започна катастрофално. Две години поминаа и се уште не се испечатени учебници во основното образование, а за средното стручно образование добивме признание од министерот дека немаат пари, велат од ВМРО-ДПМНЕ и додаваат дека тоа е фијаско, после кое секој министер во Европа би си поднел оставка.
Од опозицијата посочуваат дека и материјалите кои учениците ќе ги користат се со недозволиви грешки.
– Ако лани владата на Ковачевски испечати учебници кај што Албанија е наш источен сосед, а Бугарија западен, годинава реките Еуфрат и Тигар ги лоцираат во Африка. Не би не зачудило утре Ковачевски да излезе во обвинување дека ВМРО му е виновно, или можеби дека се работи за хибриден напад и што ли уште не, само и само да не ја признае неспособноста на својата влада и да понесе одговорност, велат од ВМРО-ДПМНЕ.
Според партијата, хаосот во образованието го надополнува и новата концепција со споени и модуларни предмети во која наставник од хемија предава и физика, во која тројца наставници предаваат три модули во еден предмет.
– Оваа концепција која спектакуларно ја најавуваа и ја нарекуваа фински модел, сега признаваат дека е пропадната. И за ова никој не сака да признае дека погрешил, дека направил штета и на наставниците и на децата и на целиот образовен процес, велат оттаму.
Во овие 7 години власт на СДС и ДУИ во образованието нема апсолутно никаков успех. И тоа што го прикажуваат како покачување на платите на просветните работници не е ниту половина од зголемените трошоци за живот, што би се рекло, денес наставниците живеат посиромашно од било кога порано, констатираат од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.