Градоначалникот на општина Карпош Стевчо Јакимовски ја повика Владата на Република Македонија да ги покрие трошоците за греење на општинските основни училишта во висина од 8.3 милиони денари, затоа што локалната самоуправа не е должна да го прави тоа.

Јакимовски нагласи дека минатата година за децата да не останат без греење, општината издвои 6 милиони денари за оваа намена затоа што исто така Владата не сакаше да ги плати сметките. Тој се чуди, како централната власт си дозволува да одвои 36 милиони евра за споменикот на Мајка Тереза, но нема пари да си ги плати основните трошоци за да функционираат основните училишта.

„Локалната самоуправа само управува со основните училишта, а сите обврски кон училиштата ги покрива Владата, односно министерството за образование. Тие ги исплаќаат средствата преку т.н. блок дотации, кои што стигаат до општината,а ние само ги пренесуваме до училиштата. За жал, средствата што ги исплаќаат од министерството за образование до училиштата, ни од далеку не достасуваат за основните потреби на училиштата, а тоа е да се покријат основните трошоци за електрична енергија, да ги покријат трошоците за парно, за ѓубретарина, за вода и тн. Не станува збор за тековно и инвестиционо одржување. Сето тоа го покрива локалната самоуправа, а ние имаме обврска само да управуваме. Сето е на терет на Владата на Р. Македонија. Така стои во законот. Долговите на основните училишта на територија на општина Карпош изнесуваат вкупно 8.303.000 денари. Што тоа значи? Минатата година ова време, општина Карпош од својот Буџет одвои 6 милиони денари, и исто вака покри трошоци за греење на училиштата. Оваа година, гледате колку помалку има платено министерството за образование на училиштата за нивно нормално функционирање. Јас се обратив до министерството, а тие ми рекоа дека немаат денар пари, како знам да се снаоѓам. Е сега мене не ми е јасно. Како имаат пари за споменикот на Мајка Тереза 36 милиони евра, а да си ги платат основните трошоци за да функционираат основните училишта, за тоа немаат пари. Навистина е чудно. Јас и порачувам на Владата и на премиерот да го напуштат популизмот, бидејќи се нафатиле да водат држава. Ако водат држава, тогаш треба да обезбедат основните функции на државата, во кои што влегува и образованието да може нормално да егзистира и да функционира. Да се тргнат од голиот популизам во кои што сега ќе ги обезбедат тие 5 проценти за покачување на плати, а тоа го обезбедија преку не дозволување на вработување на ниту едно ново, повторувам, ново вработување во делот на образованието. Дали требало наставник, или технички персонал, и практично со тие средства тие вршат зголемување на тие 5 проценти, односно луѓето се спремаат за локални избори. Сакам да им кажам јасно дека локалната самоуправа се потруди максимално да постави скоро на сите училишта фотоволтаици. Сега набавуваме смарт табли, набавуваме и компјутери. Ништо од тоа, освен во времето на Груевски кога сме добиле компјутери, не сме добиле во делот на училиштата. Затоа ги повикувам овие 8 милиони и триста илјади денари Владата да си ги обезбеди и да си ги најде и да си ги плати на училиштата, затоа што локалната самоуправа не е должна ова да го прави, рече Јакимовски.

Основното јавно обвинителство Скопје поднесе Обвинителен предлог против 22-годишна жителка на Богданци која во периодот од 15 јули до 29 септември годинава измамила седум лица во Скопје, со намера за себе да прибави противправна имотна корист.

Кривичното дело – Измама согласно член 247 од Кривичниот законик обвинетата го сторила со лажно прикажување на факти дека ќе им изнајми сопствен стан во Скопје на оштетените и со тоа ги навела однапред да и исплатат во готово одреден паричен износ.

По претходно објавени огласи за изнајмување станови преку социјалната мрежа Фејсбук, секој од оштетените телефонски ja контактирал обвинетата и таа лажно им прикажала дека ќе им изнајми стан, барајќи да и исплатат пари како аванс пред да се вселат. По уплатата, на секој од оштетените им давала на рака клучеви како да се од изнајмените станови на различни локации во Скопје. Меѓутоа, клучевите не одговарале на становите што наводно им ги изнајмувала и во нив живееле други луѓе. На овој начин обвинетата од оштетените прибавила пари во вкупен износ од 74.200 денари.

Јавниот обвинител до Основниот кривичен суд Скопје достави и предлог за продолжување на мерката притвор за обвинетата, која и беше определена поради опасност од бегство.

Што содржи новиот закон кој ќе предвиди правична застапеност на сите заедници во институциите министерот за животна средина Изет Меџити вели дека сѐ уште не може да открие, но најави дека за него ќе има широка јавна дебата. Драфт верзијата, според Меџити, ќе ги помине сите потребни филтри за да не се случи повторно да имаме половичен закон, кој ќе биде проблематичен.

„Што ќе содржи не можеме да кажеме, но можам да кажам дека ќе има јавна дебата. Ќе се вклучат академци од сите универзитети, стручни, професионалци, сѐ во функција да се најде најдоброто решение, кое ќе биде долгорочно решение и кое не може утре-задутре да се оспори од некого. Мора да внимаваме на уставната категорија правична застапеност, но воедно са не дојдеме во судир со Уставот и пак да ни се случи ова ситуација“, рече министерот Меџити.

Министерот за здравство, Арбен Таравари, минатата недела извести дека веќе е готов нов закон кој превидува не само етничка, туку и полова и секаква друга застапеност во институциите.